Read SEBR SÕNGO, 1998 1MAKABE 5 Bible Online

1MAKABE 5 - SEBR SÕNGO, 1998 bible

1MAKABE 5

¹Bu-zẽmba sẽn pẽ-ba waa n wʋmame tɩ maan-kugra leb n meeme la wẽnd doogra manegame t'a le wẽnd pĩnda la b sũur puugame.

²Dẽ la b wẽen yã tɩ b na sãam a Zakoob yagensã sẽn vɩ-b bãmb sʋka la b sɩnga neb wʋsg kʋʋb la b koodgo.

³A Zɩɩda kẽnga Idume la Akrabatɛn n zab ne a Ezayu yagens sẽn da gũbg a Israyɛl la sẽn da ka basd a laafi ye. A tõog-b lame, n ning b yãnde la a zɛɛ b laogo.

⁴A tẽega a bɛã kamba yelle, n tẽeg b pʋ-toogã, n tẽeg tɩ b yaa wa bẽdgo a Israyɛl yĩnga, wa b sor zugu kugr tɩ b lakd n lʋɩtẽ.

⁵A pag-b-la b tãnsoben-tẽnsẽ, n kãab tɩ ned ba a ye kõn põs ye la a sɩd yõoga rotã ne a neba bugum.

⁶Dẽ poore a bʋʋga a Amon yagensã, bãmb da yaa zãma kãsenga, n tar tãb-biis ka tɛka tɩ b naab yaa a Timote.

⁷A zaba ne b naoor wʋsgo, n tõog-ba, n kʋ b neb wʋsgo.

⁸A reega Iyazɛr ne a tẽn-toosã fãa n yaool n leb Zɩɩda.

⁹Sẽn be-b Galaad sũu taaba n na n tak zabr ne a Israyɛl kamb sẽn be ne bãmba, n kʋ-b zãnga. Israyɛl kamba bãngame, b zoee n tɩ soonda Datema.

¹⁰Be la b zĩnd n gʋls a Zɩɩda ne a ba-biisa sebre la b yeelame: «Bu-zẽmba sẽn gũbg tõndã sũu taaba n na n zab ne do la b menes-do.

¹¹B segend n na n wa reega b tãnsoben-tẽngã d sẽn zoe n kẽ a soab pʋgẽ wã la a Timote n ya b naaba.

¹²Marsã bɩ y zoe n wa fãag tõnd bãmb nusẽ. B sẽn zoe n kʋ tõnd neba labsa.

¹³D saam-biisa sẽn da kẽed-b ne Tobi tẽng rãmba kii zãnga; b wʋka b pagb la b kamba n maan yemse, b wʋka b laog zãnga. Sẽn ki-ba taa tusri.»

¹⁴B pa yãe n karem sebrã n baase, la neb a taab sẽn yi Galile ne fu-kʋɩdse.

¹⁵B yeelame: «Tir la Sidõ dãmb me sũu taaba n na n naag bu-zẽmb Galile n wã tõnd zãng kas.»

¹⁶B sẽn wʋm dẽ a Zɩɩda ne a neba maana tigsg kãsenga la b yẽsa me n bãng b sẽn na n maanega n sõng b saam-biisi b yel-pakra pʋgẽ, bɛɛba pãn-tõoga pʋgẽ.

¹⁷A Zɩɩda yeela a ba-biig a Simo: «Bao neb n tɩ fãag sẽn be-b Galile wã tɩ maam ne m ba-biig a Zonatã, tõnd na kẽng Galaad dãmb tẽnga.»

¹⁸A basa a Zakari biig a Zozɛf Zɩɩda, ne tãb-biisa sẽn kellã tɩ b yõneg n gũ tẽngã.

¹⁹A yeel-b-la woto: «Yõdg-y n tall nebã la y ra tak zabr ne bu-zẽmba ye, tɩ d kẽng la d lɛɛg n wa.»

²⁰A Simo paama neb tus a tã n kẽng Galile t'a Zɩɩda paam tus a nii n kẽng Galaad dãmb tẽngẽ.

²¹A Simo sẽn ta Galile a zaba wʋsg ne bu-zẽmbã n tõog-ba tɩ b zoe.

²²A rig-b lame n tãag Ptolemayis noore. Tãb-biis na ta tus a tã n pa zabrẽ t'a Simo wʋk b zab-teedo.

²³A peega Zʋɩf rãmba sẽn da be-b Galile la Arbata, bãmb ne b pagb la b kamba la b sẽn so. A peeg-b-la ne sũ-noog kãsenga n leb Zɩɩda tẽnga.

²⁴Sã n yaa a Zɩɩda meng ne a Zonatã, bãmb dʋʋga Zʋrdẽ n kẽn dasma a tã,

²⁵n ta Nabat dãmb tẽngẽ tɩ b reeg-b ne zoodo, n togs Zʋɩf rãmba sẽn yãet naong ning Galaad pʋgẽ.

²⁶B ra pag-b-la tẽns sẽn gũbg lalse, wala Bosora, Alema, Kasfo, Maked la Karnayin.

²⁷B tol n paasame tɩ Galaad tẽnsa a taab pʋsẽ, b ra paga kẽere la yaa beoog rãara la zabra na n zab, la tẽnsa na n wãame tɩ b neba naag taab n ki raar a ye.

²⁸Woto wã a Zɩɩda leba a poorẽ n tũ zĩ-pɛɛlẽ, n dɩk Bosora sore. A tõog n kooda dapa fãa, n zɛ b laogo la a yõog tẽnga bugum.

²⁹A yii be ne yʋngo n ta Datema noorẽ.

³⁰Beoog sẽn wẽege, tẽnga rãmb yãee neb ka tɛka sẽn wat ne raodg la zab-teedo, n na n deng n wã lalsã n paam n kẽ tẽngã. Tao-tao tɩ zabra kaoogame.

³¹Zabra sẽn sɩng la kɛleng sẽn kelem tẽnga pʋga tɩ tõntõod peebdẽ.

³²T'a Zɩɩda yeel a tãb-biisa: «Zab-y Wẽnd la y saam-biisa yĩngã.»

³³A yaool n welg-b-la sags a tã tɩ b na n pʋg b bɛɛbã, b me peebd tõntõodo la b zẽkd b koees n pʋʋsd Wẽnde.

³⁴A Timote neba sẽn bãng tɩ yaa a Makabe, b zoeeme. A Zɩɩda tõog-b-la sõma. Sẽn pa b zabrẽ baraar taa tus a nii.

³⁵A Zɩɩda wẽnemdame n kẽng Alema, n tõog be rãmba, n kʋ rapa fãa, n wʋk b teedã la a yõog b tẽngã.

³⁶A tɩ wãa Kasfo, Makɛd, Bosor la Galaad tẽns a taaba.

³⁷Dẽ sẽn looge, a Timote le tigma tãb-biisi la a wẽ a sik Rafõ taoore, kʋɩlga rʋʋnde.

³⁸A Simo neba kẽngame n tɩ bãng b sika zĩiga n lɛɛg n wa yeel woto: «Ad-y bu-zẽmba fãa sẽn gũbg tõndã tɩ tigma a Timote nengẽ la tãb-biisa sõor ka tɛk ye.

³⁹Arab rãmba me la b yaood tɩ b zabdẽ; b wẽe b sikã kʋɩlga rʋʋnde la zabra ka na n kaoos n yik ye.»

⁴⁰A Timote goma ne a tãnsoaben-dãmba woto, a Zɩɩda sẽn wa n kolgd kʋɩlgã: «A sã n dẽng tõnd n dʋʋg kʋɩlgã, d kõn le tõog n yals a taoor ye, yẽ n na n lub-du.

⁴¹A sã n bas tɩ rabeem yõka t'a pa saag n dʋʋg kʋɩlgã, tõnd na rʋʋg-a la d na tõog bãmbã.»

⁴²B kolga kʋɩlgã t'a Zɩɩda yeel a nebã: «Ned ba a ye ra yals n bao roog ye, b fãa loog zabre.»

⁴³A Zɩɩda n yɩɩ pipi n dʋʋg kʋɩlgã la a neba pʋg-a lame. B sẽn kaoog zabre, bɛɛba loba b zab-teed n kʋɩ tĩiga la yaa Karnayin wẽnd doog pʋg la b tɩ soonde.

⁴⁴A Zɩɩda ne a neba pãba Karnayin dãmba n yaool n yõog b wẽnd dooga bugum ne sẽn da be-b a pʋgẽ. Karnayin wãame, la rẽnd tɛka b pa le saag n zab ne a Zɩɩda ye.

⁴⁵A Zɩɩda tigma a Israyɛl kamba fãa sẽn da be Galaad, nanamse, talse, pagba la kamba, la b sẽn tar fãa, la a peeg-b lame n leb Zɩɩda tẽnga.

⁴⁶B taa tẽn bedr a ye sẽn ya tãnsoben-tẽnga. B ra ka tõe n gil-a n bas goabg bɩ rɩtg ye, tɩ b kong n na n pɩʋʋg-a.

⁴⁷Tẽnga rãmb zãgsame n wʋk kug n pag b tẽnga noore.

⁴⁸A Zɩɩda tʋmame tɩ b tɩ yẽs ne tẽnga rãmb yẽsgo. B yeel-b lame: «Kõ-y d sore tɩ d pɩʋʋg y tẽngã n leb d tẽngẽ; zãmb ka ye, d dat n pɩʋʋgame bala.» Tẽnga rãmb kell n zãgsame n ka pak b kʋɩlens tɩ b loog ye. Woto wã gãndaada segla b mens zabr yĩnga.

⁴⁹A Zɩɩda yeelame tɩ ned kam fãa paa a zĩigẽ.

⁵⁰Gãndaadã n teeg ne bɛɛbã n zab tɩ wĩndg kẽ, n tõog b sõmbo.

⁵¹A Zɩɩda kɩtame tɩ b kood rapa fãa, n wã tẽnga zãnga, n wʋk tẽnga laog, n tab-b sẽn kʋ b rãmbã n looge.

⁵²Zʋɩf rãmba lɛɛg n dʋʋga Zʋrdẽ n tees Betsã.

⁵³A Zɩɩda tãsa sẽn da pa b poorẽ wã tɩ b wɩng. Sor zugu a kenga b pɛlg n ta Zɩɩda tẽn-peelmẽ.

⁵⁴B rʋʋ Siõ tãnga ne sũ-noogo, ne kɩdengo la b sẽn lɛɛg n wa zãnga yĩnga b kʋʋ yũ-noog maando.

⁵⁵A Zɩɩda ne a Zonatã sẽn waa n be Galaad tẽnga t'a kẽem a Simo be Ptolemayis.

⁵⁶A Zakari biig a Zozɛf ne a Azariyas wʋma tãnsoaben-dãmba sẽn tʋm daoodo, n zab ne sũuri.

⁵⁷Dẽ la b me yeel taaba: Wa-y tɩ d me tɩ bao yʋʋre, d me kẽng n tɩ zab ne bu-zẽmba sẽn gũbg tõndã.

⁵⁸B kõo tãb-biisa noor tɩ b rɩk Zamniya sore.

⁵⁹A Gorziyas yiime n zab ne-ba.

⁶⁰A riga a Zozɛf ne a Azariyas tɩ b zoe n tãag Zɩɩda toaaga la a Israyɛl kamb sẽn pa zabrẽ baraar taa tus a yi.

⁶¹Yɩɩ ko-yũud kãsenga tɩ b pa kelg a Zɩɩda ne a saam-biisã n na n yik n zab n bao yʋʋre.

⁶²Da ka bãmb la Wẽnd yãkr tɩ b fãag a Israyɛl ye.

⁶³Gãndaoog a Zɩɩda ne a ba-biis paama yʋʋr la ziiri, b kibara sẽn ta zĩig ning fãa.

⁶⁴Neba ra gũbgd-a lame n kilsd-a.

⁶⁵A Zɩɩda ne a ba-biisã teesa tẽns niyns sẽn be b nug rɩtgã n tɩ zab ne a Ezayu yagense. A tõoga Ebrõ ne a tẽn-toosã, n wã a tãnsoben-dotã la ro-wogdã sẽn da me n gilgã la a ninga bugum.

⁶⁶A sẽn yi be, yɩɩ Filisti rãmb tẽngẽ la a ta yã, n tol n pɩʋʋg Marisa.

⁶⁷Baraare maan-kʋʋdb wʋsg n pa zabrẽ. B tʋlg n wilga b raoodo n yaool n pa maan gũusg tɩ sek ye.

⁶⁸A Zɩɩda sãag n taa Azot, Filisti rãmb tẽng a ye, a tusa maan-kugrã n lub, n yõog a wẽn-naandsa bugum, n kɩt tɩ b zɛ tẽngã. Dẽ poore b leba Zɩɩda tẽnga.