Read SEBR SÕNGO, 1998 1MAKABE 6 Bible Online

1MAKABE 6 - SEBR SÕNGO, 1998 bible

1MAKABE 6

¹Dĩm a Antiyokus da bee tẽn-zugẽ. A ra wʋmame tɩ tẽng n be Pɛrs rãmb soolmẽ n boond tɩ Elimayis. B ra gomda tẽnga yelle, n pẽgd a arzɛka, a sãnem la a wanzurf.

²Tẽnga ra tara wẽnd doogo sẽn da pid ne arzɛka. Be b ra bĩnga zab-teedo sẽn dõog ne sãnem n paas zab-futu la gãndo. Yaa Masedoan dĩm a Filip biig a Aleksãndr n da bas-b be la yaa a Filip n yɩ Grɛk rãmb pipi dĩma.

³A Antiyokus kẽngame n na n tɩ soog tẽngã la a wʋk a laogo la a pa tõog ye tɩ tẽnga rãmb bãnga tiiri.

⁴B yii ne b zab-teedo n gɩdg-a n tol n dig-a t'a zoe ne sũ-sãang kãseng n leb Babilon.

⁵A ra nan ket n bee Pɛrs rãmb tẽngẽ tɩ b wa togs-a tɩ b zaba ne a tãb-biisã n tõog-ba.

⁶Yaa a Liziyas la b reng n dig ne tãb-biis zembala t'a zoe n bas Zʋɩf rãmb laafi. Sɩda Zʋɩf rãmb da lebga pãn-dãmba tɩ b ra tõoga neb wʋsgo n deeg zab-teedo la b laog ka tɛka.

⁷Zʋɩf rãmb tusa wãab sabaabã n lubi. A Antiyokus ra zaoolg-a-la maan-kugra zug, Zerizalɛɛm. B mee lals sẽn ya bɛda n gũbg tẽn-sõngã la b maana boto me ne tẽng a ye sẽn boond tɩ Bɛtsur la sẽn da ya dĩma soolem.

⁸Dĩma wʋma rẽ n digimd waoodo. A yɩɩr yɩɩ kãsenga t'a gãand a gãagẽ n yik bãaga tɩ yɛla ka yɩ wa yẽ sẽn da geelg n dɩgla ye.

⁹A paa be dasem a wãna, t'a yĩnsa ka tol n yẽegdẽ ye. A waa n tẽeme t'a na n kiime,

¹⁰a boola a zo-rãmba fãa n yeel-ba: «M nin zãgsda gõeem, m gãe ne yɩɩre.

¹¹Dẽ la m yeel m sũurẽ: Ges f sẽn zĩ ne sũ-sãang la sũ-beed ningã. Pãng sẽn waa n ketẽ f ra ya nin-bʋgsgo tɩ wʋsg nong-fo.

¹²M sẽn tẽr marsã ya tʋʋm-wẽnsã m sẽn tʋm Zerizalɛɛm, m sẽn wʋk wanzurf la sãnem teedã la m sẽn kɩt tɩ b kʋ Zɩɩda rãmb zaalem.

¹³M mii marsã tɩ yaa rẽnd yĩnga la yɛl a woto fãa pak maam tɩ m na n ki ne sũ-sãang tẽn-zẽndẽ.»

¹⁴A kɩtame tɩ b bool a zoa a yembre, a Filip, la a rɩka a soolma n gũnug yẽnda;

¹⁵A kõ-a-la a naam pugla la a naam kobre n paas a nug-bĩnga la a yeel-a lame t'a gʋʋl a biiga neere t'a sã n bɩ bɩ a rɩ a ba naam.

¹⁶A Antiyokus wẽneg n kiime la yɩɩ koabg la pis-naas la a wɛ yʋʋmde.

¹⁷A Liziyas sẽn wʋm a kʋʋre, a kɩtame t'a biigã a sẽn da wubdã, a Antiyokus, reeg naam. Yẽ la Antiyokus Ewupator, a ba sõng biiga.

¹⁸Bɛɛba tãb-biis niyns sẽn da ket Zerizalɛɛm tãnsoben-dooga pʋgã ra maanda b sẽn tõe n na n gɩdg Israyɛl kamba tɩ b ra tõog n kẽnd wa b sẽn dat wẽnd dooga sɛɛg ye. B ra baood-b-la ne wẽng wakat buud fãa, b ra baood n na n sõnga bu-zẽmbã n lub-ba.

¹⁹Yaa rẽ me yĩng la a Zɩɩda wẽen t'a na kʋ-ba la a sɩd boola a nebã tɩ b wa gũbg tãnsoben-doogã n zabe.

²⁰B waa n gũbga tãnsoben-doogã koabg la pis-nu yʋʋmde. B lugla teed sẽn tõe n po lalse la b palga raodgo.

²¹Sẽn da pag b rãmba kẽer wẽe n yiime, bãmb ne Zʋɩf niyns sẽn ka le tũud Noorã.

²²La b tɩ yeela dĩma: «Yãmb na n le zĩndame n ta wakat bʋgo n yaool n wa ges d saam-biisa yelle la y zab n kõ-ba?

²³Tõnd saka ne yamleoogo n na n tũ f ba, n deeg a noya.

²⁴Dẽ meng kɩtame tɩ d buuda rãmb da kis-du, n tol n kʋ b sẽn paam b rãmb fãa tõnd sʋka la b rɩ d paoong fãa.

²⁵Ka tõnd bal la b wã ye, yaa f soolma fãa.

²⁶Yaa Zerizalɛɛm tãnsoben-doogã la b gũbg rũnna n na n soog-a la b ninga lals sẽn ya tagdo n gũbg do-sõngã ne Bɛtsur.

²⁷Fo sã n ka maan yãgbo b na n paasame tɩ yɩɩg wã la f kõn le tõog n yals-b ye.»

²⁸Woto la b gom yã, la dĩma sũur puuga al wʋsgo t'a na n tɩgs a zo-rãmba la a tãnsoaben-dãmba sẽn ya wed-dʋʋdba.

²⁹Tãb-biis a taab me n da yi rĩund a taaba la tẽnsa sẽn puk mogra sʋka n waa n na n sõng-a n zab n deeg ligdi.

³⁰Sẽn kẽnd-b tẽng ra yaa tus koabga, wed-dʋʋdb tus pisi, wobd sẽn mi zabre pis-tã la a yi.

³¹Idume la b tũ n wa gũbg Bɛtsur ne zab-teed sẽn tar n wãad lalse. La Bɛtsur dãmb da soosd n yit n yõogda b zab-teeda bugum, b sɩd ra maanda raoodo.

³²A Zɩɩda ne a tãb-biisa wudg n wa gãnega tãp Bɛtzakariyas n tot ne dĩma zakã.

³³Dĩma yika tõd-beoogo la Bɛtzakariyas la a tees a tãb-biisã wa nin-yende. Tãb-biisa tonga b zabr tongre la b sɩnga tõntõodo peebgo.

³⁴B ninga tɩ-biis rãamẽ n tẽgen wobdã, tɩ b yũ n lebg zab-zabdba.

³⁵B pʋɩ wobda sak-saka. Sak fãa ra tara a wobgo; sak fãa ra yaa zab-zabdb tusri. Neb tusrã da yera kut-fut la b fõgnega kut-zug peto. Wed-dʋʋdb kobs-nu sẽn mi wobda leglgo n da paase.

³⁶Bãmb n da legend wobgã, n ka tol n zãagd ne-a ye. Wobga sã n kẽnda, bãmb me kẽndame la a sã n yaase bãmb me yaasdame.

³⁷Rapegd koglg la b ra maneg n sẽb wobg fãa poore. Zab-zabdba a tã n paas wob-kɩɩma a ye n da be a pʋgẽ.

³⁸Tãb-biisa goabg la b rɩtgo dĩma ninga wed-dʋʋdba sẽn kellã la bãmb da bee taoor bilfu n na n pʋg bɛɛbã la b kogend tãb-biisã.

³⁹Wĩndga sẽn wẽ gãndã, sãnema la wanzurfa tãoosa vẽenem n bui tãmsã la yaa waa b wita bugum.

⁴⁰Dĩma ra welga a neba sags a yi, tɩ kẽer dʋ tãngã, tɩ kẽer be a pennẽ. Fãa ra naaga taab n kolgdẽ tɩ ned pa kẽnd tʋʋlg n yɩɩd a to ye.

⁴¹Ned ning fãa sẽn wʋma zãma wã kelemse, b kẽnda rãamde, b zab-teeda wãgbo da yɛɛsdame. B ra yaa ka tɛka la b pãng ka be to ye.

⁴²A Zɩɩda ne a tãb-biisa kolgame tɩ zabra kaooge, tɩ dĩma tãb-biis kobs-yoob wẽneg n gãand tẽnga.

⁴³A Elazar, b boond a lame yɛs t'a Awarã, yãee wobg a ye sẽn yɩɩd a taaba la sẽn baglemd ne naam teedo. A tẽeme tɩ dĩma da be a zugu.

⁴⁴A kõ-la a meng vɩɩm n na n fãag a buudu la a reeg yʋʋr sẽn kõn menem.

⁴⁵A wudga ne raoodo n kẽ zab-zabdba sʋka, n lubd goabg la rɩtgo, n wedg a sore.

⁴⁶A kẽe wobga tẽngre n kõs-a ne sʋʋg n kʋ. Wobga me sẽn lʋɩ n bʋʋg-a, yẽ me maana yõore zĩ-kãnga bala.

⁴⁷Zʋɩf rãmba mikame tɩ b bɛɛba zabda ne pãng la raoodo tɩ b na n zãag n bas-ba.

⁴⁸Bɛɛba basa dĩma tãb-sikã n dʋ Zerizalɛɛm n na n zab ne Zʋɩf rãmbã. Yaa Zɩɩda tẽn-peelma gill la a ra rat n wã la a waa gũbga Siõ tãnga.

⁴⁹Dĩma reng n maana zood ne Bɛtsur dãmba. Bɛtsur rãmb zoe n yiime n basa b tẽngã. B ra ka tar sẽn na n dɩ n kaoos ye tɩ ra yaa tẽnga vʋʋsg yʋʋmde la koob pa ko ye.

⁵⁰Dĩma tãb-biis zoe n kẽ a pʋgẽ n soog-a, n ning neb sẽn na n gũ-a.

⁵¹B kẽngame marsã n tɩ gũbg wẽnd doogã n kaoose. B yalsa zab-teed sẽn pood lalse, ka tɛka. Zab-teed kẽer da tãoosda bugum, tɩ keer tãoosd peem la kuga.

⁵²Zʋɩf rãmba me yiisa b zab-teedo n na n dig bɛɛbã la woto zabra kaoosame.

⁵³Rɩɩba waa n paoogame tɩ ra yaa vʋʋsg yʋʋmde, n paas me Israyɛl kamb wʋsg yii bu-zẽmba sʋk n lɛɛg n wa la b rɩɩ sẽn da tigs n bĩnga fãa.

⁵⁴Koma yĩnga Siõ tãnga rãmb da ka waoog ye. Wʋsg ra zoe n leba b tẽnsẽ.

⁵⁵Dĩm a Antiyokus da yãka a Filip t'a gʋʋl a biigã t'a wa tõog n led-a a zaoorẽ.

⁵⁶La a Filip sẽn yi Pɛrs ne Mɛdi n lɛɛg n wa ne tãb-biis sẽn da yãag dĩma zembalã, a ra baoodame n na n lʋɩɩs a meng taoore.

⁵⁷Woto a Liziyas sẽn wʋm dẽ a segla a tẽngẽ lebre. A goma woto ne dĩma, ne a tãnsoaben-dãmba la a tãb-biisã: «D zĩig ka le ya noog ye, rɩɩb ka ye, la d sẽn gũbg tẽng ninga tara pãnga. Yɛl a taab bee rĩunga pʋg sẽn dat manegre.

⁵⁸Wa-y tɩ d tud d nugu n yẽs laafi yẽsgo ne nin-bãmba la b buudã.

⁵⁹D bas-b tɩ b tũ b rog-n-mik wa pĩnda tɩ yaa d sẽn gɩdg-ba yĩng la b sẽn zabd ne tõndã.»

⁶⁰Dĩma ne taoor dãmba gesame tɩ yaa sɩda, b tʋmame tɩ b tɩ yẽs laafi yẽsg ne Zʋɩf rãmbã la b sakame.

⁶¹Dĩma ne taoor dãmba wẽename tɩ b na n tũu b sẽn yals bũmb ningã la b sẽn da gũbg b rãmba tõog n yiime.

⁶²Dĩma kẽe Siõ tãnsoben-dooga pʋga la a sẽn yãend a pãnga sẽn be zĩig ninga, a yɛɛsame, a lebsa a zelemd poorẽ n kɩt tɩ b wã a lal-gũbrã.

⁶³Dẽ poore a rɩka Antiyos sore la a sẽn ta be, a mikame t'a Filip reega zĩigã n yãmb la a zabame n deeg a tẽng ne pãnga.