Read SEBR SÕNGO, 1998 1MAKABE 7 Bible Online

1MAKABE 7 - SEBR SÕNGO, 1998 bible

1MAKABE 7

¹Koabg la pis-nu la a ye yʋʋmde, a Selewukus biig a Demetriyus soos n yii Rom la a waa n kẽe ne neb a wãn bal koom noorẽ tẽng a ye n yet tɩ yẽ la rĩma.

²A sẽn dɩk sore n digd a ba rãmb na-zakẽ, la tãb-biisã sẽn yõk a Liziyas la a Antiokus n na n wa kɩs-a.

³A Demetriyus wʋma rẽ n tool n yeel-ba t'a pa rat n yãend-b ne a nif ye.

⁴Tãb-biisa kʋ-b lame la a Demetriyus lebga dĩma.

⁵Israyɛl nin-yaalsã la wẽn-kɩɩsdba waa a nengẽ, la a Alkime n da lʋɩ b taoore, yẽ ra baooda maan-kʋʋr naam.

⁶B rõda b saam-biisa dĩma taoore n yeele: «A Zɩɩda kʋ-la y zo-rãmba fãa la a riga tõnd n zãag ne d ba-yiri.

⁷Y sã n dat bɩ y bao pʋ-peen-neda n tʋm-a t'a tɩ ges tʋʋm bɛd niyns a Zɩɩda sẽn tʋm yãmb soolmẽ ne d saam-biisã, la y sɩbg-a, yẽ ne a sõangdba.»

⁸Dĩma yãka a Bakidɛs, a zoa a yembre, t'a rʋʋg kʋɩlgã n n lebg be kombere.

⁹A kõ-la a Alkime, wẽn-kɩɩs menga, maan-kʋʋr naam la a kɩtame t'a yãag-a la a kʋʋ Israyɛl kamba n dok a sũuri.

¹⁰B yii ne tãb-biis wʋsgo n dɩk Zɩɩda sore. A wilga a Zɩɩda ne a ba-biisã t'a wata ne koe noogo, mik yaa zirẽ.

¹¹B sẽn yãend-b ne tãb-biis ka tɛkã, b pa tẽ-b ye.

¹²B baas n tigsa sɛb-mitba, a Alkime ne a Bakidɛs nengẽ, n ges b sẽn na n maaneg tɩ zems.

¹³Sẽn boond b rãmb tɩ wẽn-waoogdba, Asidim rãmba, n yɩ pipi Israyɛl kamba sʋka, n gom laafi goama.

¹⁴B ra yetame: «Yaa maan-kʋʋd sẽn yit a Aarõ buudẽ n tũud tãb-biisã, dɩlla d da maan dabeem tɩ bũmb kõn maan-d ye.»

¹⁵Sɩd me a Alkime meng goma ne b noogo n tol wẽen: «D pa rat n maan y bũmb ye, yãmb ne y zo-rãmba fãa.»

¹⁶Bãmb tẽe-a lame la badaar bala, a kɩtame tɩ b kʋ bãmb pisoobe. Yɩɩ wala Sebr sõng sẽn togse:

¹⁷«Nin-sõma wã nemd yʋlma zĩig zãnga la b raaga b zɩɩm n gilg Zerizalɛɛm. Ned ka sẽn na n bao yaoog n kõ-b ye.»

¹⁸Yɩɩr yõka nebã la b riga rabeem kãsenga la b ra yetame: «Bãmba ka tar sɩd la pʋ-peelem ye, b wẽena wẽen-faado la b ka pids b pʋlemd ye.»

¹⁹A Bakidɛs yii Zerizalɛɛm n dig Betzɛt. A kɩtame tɩ b tɩ yõg nin-bɛd kẽer sẽn da zoe n wa kẽ yẽnda n paas tẽnga rãmba. A kɩtame tɩ b lob-b bul zulung a ye pʋgẽ.

²⁰A rɩka a soolma n bas ne a Alkime. A basa tãb-biis me sẽn na n sõng-a la a lɛɛg n babsa rĩma.

²¹A Alkime maoome n wa lebg maan-kʋʋd kãsenga.

²²Sẽn da pa rat-b tẽnga ne laafi wã fãa pʋga a poore; bãmb n waa n soog tẽngã la b namsa a Israyɛl.

²³B tʋʋm-yooda waa n yɩɩda bu-zẽmba dẽnna,

²⁴dẽ la a Zɩɩda me saag tẽngã n sɩbg nin bɛd niyns sẽn zoe n bʋʋg b bɛɛbã. A pa le sak tɩ b gõ b yam ye.

²⁵A Alkime mikame t'a Zɩɩda ne a poorẽ dãmba pãng n yɩɩde t'a pa tõe n yaas b taoor ye. A leba dĩma nengẽ n tɩ rõd b rõadg buud fãa.

²⁶Dĩma tʋma a tãnsoab kãseng a ye, a Nikanor, Israyɛl dãmb bɛ menga, t'a wã buuda zãnga.

²⁷A waa Zerizalɛɛm ne tãb-biis ka tɛka la a goma ne a Zɩɩda la a ba-biisã zãmb goama. A yeela woto:

²⁸«Zabr ka tog n zĩnd maam ne yãmb sʋk ye. M dat n seg-y lane ne neb sẽn ka zem fɩ tɩ d yẽs laafi yẽsgo.»

²⁹A sɩd waa a Zɩɩda nengẽ tɩ b pʋʋs taaba, la bɛɛba ra ninga b yamẽ tɩ b na yõk a Zɩɩda.

³⁰A Zɩɩda bãnga b raab wẽngã n yeel t'a ka le rat-ba a sɛɛgẽ ye.

³¹A Nikanor mikame tɩ sẽn maand le ka ye, a Zɩɩda bãnga a raab wẽngã t'a na n tak zabr ne-a, Kafarsalama.

³²A Nikanor neb kobs-nu gãandame tɩ sẽn kell-ba zoe n kẽ a Daviid tẽngẽ.

³³Dẽ poore, a Nikanor dʋʋ Siõ tãnga tɩ maan-kʋʋdb ne buuda kãsem-dãmb yi n seg-a zood segbo, la b wilg-a yũ-noog maoongã b sẽn da kʋ a yĩnga.

³⁴A Nikanor la-b lame, n yaal-ba, n sẽoos-ba, n puug a sũur n kãab-b woto:

³⁵«Y sã n pa yõk a Zɩɩda n kõ-ma, yẽ ne a tãb-biisã, m sã n zab n sɛ n lɛɛg n wa ne laafi, m na yõog ro-kãnga.» La a yi n looga ne sũ-puuri.

³⁶Maan-kʋʋdba lɛɛg n kẽeme n yals maan-kugra la sõmblem dooga taoore n yetẽ la b yãbda:

³⁷«Soaala, yãmb n yãk do-kãnga t'a yɩ yãmb pẽgr la y pʋʋsg zĩiga, buuda fãa yĩnga.

³⁸Tug-y beem ne nin-kãnga tãb-biisi, kɩt-y tɩ sʋʋs kood-ba. Tẽeg-y tɩ b tʋʋsa yãmb yʋʋre, la ba a ye ra põs ye.»

³⁹A Nikanor sẽn yi Zerizalɛɛm a tɩ wẽe a sik Bɛtorõ la tãb-biis yii Siri n wa bʋʋg-a.

⁴⁰Yaa Adasa la a Zɩɩda sig yã, ne neb sẽn ta tus a tã. A pʋʋsa Soaala Wẽnd woto:

⁴¹«Wala Asʋr dĩma tãb-biisa sẽn tʋʋs yãmba, Soaala, tɩ malɛka yii n kʋ bãmb tus koabg la pis-nii la a nu,

⁴²woto me bɩ y beds rũnna, d fãa nifẽ, nin-bãmba sẽn gom sẽn pa segd ne y do-sõngã. Ges-y yã a Nikanor wẽnema n kao a bʋʋdo!»

⁴³Adar kiuug piig la a tãab raare, b kaooga zabre. B bedsa a Nikanor tãb-biisã la yẽ meng n deng lʋɩɩse.

⁴⁴A Nikanor tãb-biisa sẽn yãe t'a lʋɩta, b loba b zab-teedo n kʋɩ tĩiga.

⁴⁵Zʋɩf rãmb rig-b-la daara tõre n ta Gezɛr. B ra pʋgd-b lame la b naag taab n peebd bardo.

⁴⁶B sẽn taẽ fãa Zʋɩf rãmba ra yit n beoogd-b lame la b mii n lɛɛg n kẽe taaba.

⁴⁷B kood-b-la fãa gilli, ba a ye ka põs ye. B sẽn wʋk sẽn ya yõodã n sɛ, b fiuuga a Nikanor zug la a nug rɩtgo, nug ninga a sẽn da zẽk n kãab Zerizalɛɛma. B talla zuga ne nugã n wa wilg Zerizalɛɛm dãmba.

⁴⁸B sũur yɩɩ noogo, baraar yɩɩ wa kibsa.

⁴⁹B Yeelame tɩ b na n tẽega raarã yʋʋmd-yʋʋmd fãa Adar kɩuug piig la a tã daare.

⁵⁰A Zɩɩda yaa n paam n vʋʋsa bilfu.