Read SEBR SÕNGO, 1998 1MAKABE 8 Bible Online

1MAKABE 8 - SEBR SÕNGO, 1998 bible

1MAKABE 8

¹A Zɩɩda waa n wʋmame tɩ b gomd Rom dãmb yelle. A wʋmame tɩ b yaa pãng rãmba n nong sẽn be-b bãmb poorẽ, n yõgd zood ne neb niyns fãa sẽn date.

²B ra wilg-a-la zab niyns a sẽn zab ne Galatsã, n wilg tɩ bãmb n tõoge n kɩt tɩ b yaood fadgo.

³B tẽega b sẽn maan ne Iberi rãmba n vaag b sãnema la b wanzurfã.

⁴B tẽega b sẽn maan sɩlem ninga la b sẽn tall raood ninga. B tẽegame tɩ dĩm dãmb n da yi mooga sɛtmẽ n wa n na n zab ne-ba la Rom dãmba tõog-b lame la b kɩtame tɩ sẽn põs-ba yaood b fadgo.

⁵B tẽega b sẽn tõog Masedoan dĩm dãmba, a Filip la a Pɛrsɛ, la neb niyns fãa sẽn zẽk b zug ne bãmba.

⁶B tẽegame tɩ Azi dĩm a Antiyokus sẽn wa n na n tak zabr ne wobd koabg la pisi, ne wiidi, ne bilim-bilm la tãb-biis ka tɛka, b tõoga yẽnd me.

⁷B paama yẽnd meng n yõk vɩɩga la b modg-a lame, yẽnd ne sẽn led-ba a zaoorẽ, tɩ b yaood ligd wʋsgo yʋʋmd-yʋʋmd fãa. B yõka neb n zĩndg b sɛɛgẽ tɩ b ka le tõe n serg sã n ka pʋlemdã n pidsi, bɩ yella neng n yãk ye.

⁸B reega a tẽn-bɛd wala Ẽnd, Mɛdi la Lidi n paas tẽns sõma a taaba. B ra zaba ne a Antiyokus n deeg tẽn-kãense la b wẽneg n dɩk-b lame n kõ dĩm a Ewumen.

⁹B tẽegame tɩ Grɛk rãmb da sedame n na n tɩ wã b tẽngã.

¹⁰Rom dãmba sẽn bãnge, yɩɩ tãnsoab a ye bala la b yiis t'a seg-ba. B kʋʋ Grɛk rãmb neb ka tɛka, b wʋka b pag b la b kamba, n zɛ b laogo, n soog b tẽngã, n wã b tãnsoben-tẽnse, b kẽes-b-la yembdo la ket n yaa boto ne rũnna.

¹¹Tẽng la buud ning fãa sẽn zẽka a meng ne bãmba, ba tẽns niyns sẽn be-b mogr sʋka, Rom tõog b la gill fãa, Rom soog-b-la gill fãa.

¹²B zood yaool n pa sãamd ne b zo-rãmb la sẽn pelg-b pʋg ne-b ye. B ra zabame n tõog b yagse la tẽn-zãorgẽ dãmba. B sã n da wʋm Rom yʋʋr bala, b yɛɛsdame.

¹³B sẽn sõng b rãmba la b sẽn tʋlg b rãmb ne naam bala n dɩt naam, b sẽn tʋlg n sik b rãmba fãa b sik-b lame; b pãnga sɩd taa pãng zĩigẽ.

¹⁴Ne rẽ fãa b nin-yɛng meng pa fõgneg naam pugla, pa yeelg naam fuug ne wilg-m-meng ye.

¹⁵Beoog sẽn vẽeg fãa nin-kẽems kobs-tã la pisi n tigimd taaba n ges tẽnga yɛl sẽn yɛs zĩig ninga tɩ yaa neb sẽn baood tẽnga manegr bala.

¹⁶Yʋʋmd fãa b rɩkda tẽnga fãa naam n dogl nin-yend zugu la fãa sakda nin-yendã tɩ sũ-kiir la zoe-bõn kaẽ ye.

¹⁷A Zɩɩda tũusa a Zã biig a Ewupolem, a Akos yagenga n paas a Elazar biig a Zasõ la a tʋm-b-la Rom tɩ b tɩ yõg zood ne bãmba.

¹⁸A Zɩɩda ra tẽedame tɩ woto a na fãag Israyɛl Siri rãmba nugẽ sẽn da kẽesd-b yembdo.

¹⁹A Ewupolem ne a Zasõ teesa Rom. B sor yɩɩ woko la b waa n taa nin-kẽemba tigsg zĩigẽ la b yeela woto:

²⁰«A Zɩɩda Makabe ne a ba-biisi la Zʋɩf rãmba fãa n tʋm-do tɩ d wa yẽs laafi yẽsgo la d yõg zood ne yãmba. D datame tɩ neba fãa bãng tɩ y gʋls-d-la y zo-rãmba sʋka.»

²¹B koɛɛga taa b yam.

²²La ad b sẽn gʋls bũmb ning kut zugu n tool Zerizalɛɛm wala bãmb ne Zʋɩf rãmba zood la zĩnd-n-ta-noog kaseto.

²³«Wẽnd na kɩt Rom la Zɩɩda rãmba vɩɩnd ne sũ-noogo, zamaan woo zamaana, tẽn-koɛɛngẽ wala mogr sʋka! Wẽnd na zãag-b ne b bɛɛba la b zabr sʋʋga!

²⁴Zabr sã n yik ne Rom dãmba bɩ ne b zo-rãmba, sẽn ya zĩig ning fãa,

²⁵Zʋɩf rãmba me na yik n zab n sõng ne b sũur fãa, b sẽn tõe wakat ning fãa.

²⁶Bɛɛba kõn paam b nengẽ koodo, bɩ zab-teedo, bɩ ligdi, bɩ koom-kogend ye. Wala b sẽn kaool ne Rom dãmbã, ned kam fãa na n pidsa a noor sẽn yeele la ligd gomd ka le be sʋk ye.

²⁷Sã n ya zabr la b sɩng ne Zʋɩf rãmbã, Rom dãmb me na sõng-b ne b sũur fãa, b sẽn tõe wakat ning fãa.

²⁸Bɛɛba kõn paam b nengẽ koodo, bɩ zab-teedo, bɩ koom-kogend ye. Rom dãmba na pids b pʋlengo tɩ belgre ka zĩnd sʋk ye.

²⁹Zʋɩf rãmb ne Rom dãmba sẽn sed ne taaba la woto.

³⁰Sã n wa mik tɩ bũmb bee sẽn na yãk bɩ sẽn na paase, bɩ zems taab kell n zĩndi la woto na yɩ tɩlɛ tɩ b tũ sẽn paase bɩ b bas sẽn base.

³¹D gʋlsa a Demetriyus a sẽn da ka zãad y neera poorẽ la d yeel-a-la woto: ‹Yaa bõe tɩ f namsd Zʋɩf rãmba, d zo-rãmba?

³²B sã le wɩd-f tɩ d wʋme, d na sõng-b la d na zab ne foo tẽng zug la koomẽ.› »