Read SEBR SÕNGO, 1998 1MAKABE 9 Bible Online

1MAKABE 9 - SEBR SÕNGO, 1998 bible

1MAKABE 9

¹A Demetriyus wʋmame t'a Nikanor ne a tãb-biisa paa zabrẽ, dẽ la a le yiis neb a taab tɩ b rɩk Zɩɩda sore la a Bakidɛs ne a Alkime n lʋɩ b taoore.

²Tãb-biisa rɩka Galile sore la b sẽn ta Arbelɛs tẽn-peelmẽ, b wẽe Mesalot tẽng gũbri. B tõog-a lame la b kʋ neb ka tɛka.

³Koabg la pis-nu la a yi yʋʋmd pipi kiuugu, b pooga Zerizalɛɛm n wẽ b sika.

⁴La b waa n yikame n dig Beerzɛt ne neb tus pisi la wed-dʋʋb tus a yi.

⁵Dẽ t'a Zɩɩda da wẽe a sik Elasa ne tãb-biis tus a tã sẽn mi zabre.

⁶A Zɩɩda neba sẽn mik tɩ bɛɛba sõor labsame, dabeem kãseng kẽ-b lame tɩ wʋsg zoe n loog n kees kobs-nii bala.

⁷Zabra sẽn waa n dat n sɩnge t'a Zɩɩda yãe t'a neba zoeeme a sũur sãama wʋsgo. Vɩʋʋg ra ka le be n na n tigs-b ye.

⁸A sũur da sãama wʋsgo la a baas n yeela sẽn kell-bã: «Yik-y tɩ d sã n tõe bɩ d tak zabr ne d bɛɛbã!»

⁹La neba leokame: «Dẽ ka tõe ye, sẽn pak d marsã yaa d zoe n fãag d yõore tɩ d na yaool n lɛɛg n wa ne d tũud-n-taase, tɩ d sõora paooda wʋsgo.»

¹⁰Dẽ la a Zɩɩda leok-ba: «Wẽnd na laas-d ne rẽ, ne d zoe d bɛɛba taoore. D kũum wakat sã n ta bɩ d ki ne sũ-keelem d saam-biisa yĩnga la d da bas tɩ bũmb sãam d yʋʋr ye.»

¹¹Bɛɛbã n deng yiibu n na n tak zabrã. B welga wed-dʋʋdba sags a yiibu. Loobsa la tãbda rãmb n da lʋɩ taoore n paas zabd mitbã la gãndaadã.

¹²A Bakidɛs n da be rɩtgo. Nao wã rãmb me welga sags a yi, n kẽnd tɩ bard peebdẽ. A Zɩɩda neba me ra peebda bardo.

¹³Ad-y tãb-biisa bʋʋr kɩtame tɩ tẽnga rigimdi. Zabra zabame tɩ wĩndg kẽ.

¹⁴A Zɩɩda yãeeme t'a Bakidɛs tigma a tãb-biisa rɩtgo la gãndaada fãa ra bee ne-a.

¹⁵Woto wã yaa be la a Zɩɩda tees yã ne tãb-biis niyns sẽn pid ne sũ-keelma la b wõra bɛɛbã n dig-ba n ta Azara tãnga pennẽ.

¹⁶Siri rãmba sẽn mik tɩ rɩtga komsame, sẽn da be-b goabgã vilimda a Zɩɩda poore n zabd ne-a.

¹⁷Zabra lebga wilg tɩ m yaa rao zabre, la kũum sẽn dɩk b rãmb yɩɩ wʋsgo, bɛɛbã wala a Zɩɩda nengẽ.

¹⁸A Zɩɩda meng paa tãpẽ la sẽn kell-bã zoeeme.

¹⁹A Zonatã ne a Simo rɩka b ba-biigã n tɩ solg b buud yaadẽ, Modin tẽnga.

²⁰A Israyɛl tõr kelma a kʋʋre la maana rasma a wãn tɩ b tarẽ bala:

²¹«Sẽn da fãagd-a a Israyɛl maana a wãn n looge?»

²²A Zɩɩda tʋʋma fãa, a zabã, a gãndalsma, bũmb niyns fãa sẽn zẽk a yʋʋrã pa tõog n gʋls ye. B labsa wʋsgo.

²³A Zɩɩda kũuma poore, yɩɩ neb sẽn ka reegd noor n kẽ Israyɛl tẽn-peelmẽ. Nin-wẽnsa fãa le puka b menga.

²⁴Neb wʋsgo noka nin-wẽnsã tɩ wakat kãnga kom zabdg n da lʋɩ tẽngã.

²⁵A Bakidɛs maana pʋ-toogo n bao nin-wẽns n gũnug tẽngã.

²⁶Nin-bãmb sɩnga a Zɩɩda neba sogsgo la b rot vɛɛsgo n yõgd-ba n wat n kɩt a Barkidɛs t'a tar b yaoolgo la sɩbgre.

²⁷Israyɛl tẽng sɩngame n na n yãe wẽoogre, wẽoogr a sẽn pa yãend bãngdba sẽn yi a pʋgẽ tɛka.

²⁸Dẽ la a Zɩɩda zo-rãmba fãa sũ taaba n tɩ yeel a Zonatã:

²⁹«Fo saam-biiga, a Zɩɩda, sẽn ka tɛka, d ka le yãe ned sẽn wẽnd yẽnda sẽn na n zab ne d bɛɛbã, ne a Bakidɛs, ne sẽn kis-b tõnda fãa ye.

³⁰Yaa rẽ la d yãkd foom dũnna tɩ f reeg a Zɩɩda zĩiga n lebg d taoor soaba la d sagend zabrẽ.»

³¹Yɩɩ wakat kãng la a Zonatã reeg a kẽema zĩiga n lebg taoor soaba.

³²A Bakidɛs sẽn wʋm dẽ, a baoome n na n kʋ a Zonatã,

³³t'a Zonatã ne a Simo la b tũud-n-taas wa bãng, n zoe n kẽ Tekoe we-raoogẽ. B ti-la b sik Asfar bulga sɛɛgẽ.

³⁴A Bakidɛs bãnga b sẽn sigẽ la vʋʋsg raare a dʋʋga Zʋrdẽ kʋɩlga ne a tãb-biisi.

³⁵A Zonatã tʋma a yao ninga sẽn geta tãb-sikã, a Zã, t'a tɩ kos Nabata rãmba, a zo-rãmba, tɩ b reeg teed kẽer n bĩng b nengẽ; sɩda teeda ra yaa wʋsgo.

³⁶A Zambri ne a Madaba kamba yõka a Zã n deeg a sẽn da tar fãa n looge.

³⁷B waa n yeela a Zonatã ne a saam-biig a Simo t'a Zambri kamba maanda b nin-yend yikãadem kãsenga la b yii al Nabata n wat ne Kanaã nin-bedr a ye bi-pugla.

³⁸B tẽega b saam-biig a Zã sẽn ki kũum ninga la b baoo pẽk n solg tãng zugu.

³⁹B dooga b neng n yãe pʋg-sɩdã, a zo-rãmba, a ba-biisi, ne zãma sẽn wate tɩ gãngãad wẽedẽ, tɩ yʋʋmba yɩɩnẽ, tɩ tãb-biis ne b zab-teed be sʋka, tɩ ya bʋʋr la bʋʋre.

⁴⁰Zʋɩf rãmba yi b sẽn da solg zĩig ningã n pʋg-ba, n vɩlem neb wʋsgo, n kood-ba; kẽer paam n põsame, b zoe n dʋʋ tãngã la b basa b teed tɩ b wʋk n looge.

⁴¹Bãmb kibsa lebga kʋʋre, b sũ-noog yɩɩl lebga waasgo.

⁴²B sẽn paam n daag zɩɩm, b sẽn paam n kʋ a Zã kʋʋdbã n dok b sũuri, b lɛɛg n waa Zʋrdẽ noor.

⁴³A Bakidɛs me wʋma kibarã la a babs-b-la Zʋrdẽ noor ne tãb-biis ka tɛka. A Zonatã yeela a nebã:

⁴⁴«Yik-y tɩ d ligl d yõre tɩ rũnna ka wẽnd zaamẽ bɩ rabɩtẽ ye.

⁴⁵D kẽng taoore, tãpo. D leb poorẽ, tãpo. Taoore yaa kʋɩlga, poorẽ yaa begd la tʋgre, ka tõe n lɛɛg n zoe ye.

⁴⁶Dɩlla pʋʋs-y Wẽnd n paam n põs y bɛɛbã.»

⁴⁷Zabra sɩngame t'a Zonatã zẽk a nug n na n kɛɛ a Bakidɛs la a tarame n leb poorẽ t'a kɛ vɩʋʋgẽ.

⁴⁸A Zonatã ne a neba kong n kẽe Zʋrdẽ koomẽ la b paam n dʋʋgame. Sã n ya bɛɛba b ka saag n dʋʋg ye.

⁴⁹Badaare a Bakidɛs neb sẽn pa tãpẽ taa tusri.

⁵⁰A Bakidɛs leba Zerizalɛɛm la Zɩɩda soolmẽ a sɩngame n me tẽns sẽn ka tõe n wẽ n tõoge. Ad Zeriko gasgo, Emmayus, Bɛt-Orõ, Betɛl, Tamnata, Faratõ, Tefõ. Lals bɛd n gũbg tẽn-kãensẽ, la noor fãa ninga kut kʋɩlenga la kut sogdse.

⁵¹Tẽng fãa pʋgẽ a ninga tãb-biis sẽn na n tak zabr ne a Israyɛl.

⁵²A meeme n paas b pãnga Bɛtsur, Gezɛr la gaosg kãsenga. A paga kooda be la a yalsa tãb-biisi.

⁵³A beoolame n yõg tẽnga na-biis fã n pag roog Zerizalɛɛm tãnsoben-dooga pʋga.

⁵⁴Yʋʋm koabg la pis-nu la a tãablẽ, kiuug a yiib soaba, a Alkime kõo noor tɩ b lub wẽnd dooga lalg a ye. Yaa do-pʋgẽ lalga. Yaa bãngdba n da kɩt tɩ b me lalsã la a kɩtame tɩ b sɩng b wãabo.

⁵⁵A Alkime yika bãaga tɩ wãaba vaale. A noora waa n mudame t'a ka tõe n le yaag a n kõ koɛɛg ye.

⁵⁶A yõor waa n tũu rẽ n gʋsge la a namsa wʋsgo.

⁵⁷A Bakidɛs sẽn mik t'a Alkime ka ye, a leba a dĩma nengẽ la yʋʋm a yiib pʋgẽ Zɩɩda tẽng paama laafi.

⁵⁸Tẽnga bi-beesa fãa yẽsa ne taab woto: «A Zonatã ne a neba vɩɩ ne laafi n pa tẽed yell ye. D kɩt t'a Bakidɛs wa yʋng a ye bala n yõg b fãa gilli.»

⁵⁹B kẽngame n tɩ yẽs ne a Bakidɛs.

⁶⁰A Bakidɛs yikame n dɩk sor ne tãb-biis zembala. A soos n gʋlsa a zo-rãmb ne a tũud-n-taas sẽn be Zɩɩda tẽnga tɩ b maan modgre n paam a Zonatã n yõke. B yaool n ka tõog ye t'a Zonatã ra paam n wʋma b sɛdgã.

⁶¹Neb pis-nu wã sẽn da baood yellã, a Zonatã ne a neba kʋ-b lame.

⁶²Dẽ poore, a Zonatã ne a Simo yii ne b nebã n dig Bɛtbasi we-raoogẽ. B le maneg n mee Bɛtbasi n paas a pãnga.

⁶³A Bakidɛs sẽn wʋm dẽ a tigma a neb la a zo-rãmba sẽn da be Zɩɩda tẽnga.

⁶⁴A kolga Bɛtbasi n wẽ a sika n yals tãb-biis n gilg tẽngã n tol n wa ne zab-te-bɛd-bɛda la b kaoosa be bilfu.

⁶⁵A Zonatã basa a Simo tẽnga pʋga n yii n tak zabre ne neb sẽn zems bala.

⁶⁶B tõoga a Odomera ne a saam-biisi la a Fasirõ neba b sikẽ. B yikame n sɩng tongre la zabre.

⁶⁷A Simo ne a neba yiime la b yõoga b zab teeda bugum.

⁶⁸B zabame n tõoge. A Bakidɛs sũur sãama wʋsgo; a raabã sẽn pa pidsã, zabrã sẽn pa yãk nengã, a basa raood zãnga.

⁶⁹A sũur puuga ne nin-yoodã sẽn da sagl-a t'a babs a Zonatã Bɛtbasi. A kʋʋ bãmb wʋsgo la a kõ-la a meng yam n leb a poorẽ.

⁷⁰Dẽ la a Zonatã tʋm neb a nengẽ tɩ b tɩ yeel-a t'a bas tɩ zaba sɛ la a lebs a sẽn yõg b rãmba fãa.

⁷¹A sakame la a kãabame t'a na ki tɩ b pa le zab taab ye. A pidsa a kãabgo.

⁷²A lebsa neb niyns fãa a sẽn da yõg pĩnd Zɩɩda soolmẽ la a dɩka a tẽng sore la a pa le saag n wa Zʋɩf rãmb soolmẽ ye.

⁷³Israyɛl tẽnga, zabr sʋʋs pa-la b wʋʋdẽ n vʋʋs ne kɛɛbo. A Zonatã tɩ kẽe Makmas. A sɩnga a soolma zãabo, la a menesa wẽnd-kɩɩs buud fãa Israyɛl tẽnga.