Read SEBR SÕNGO, 1998 2MAKABE 10 Bible Online

2MAKABE 10 - SEBR SÕNGO, 1998 bible

2MAKABE 10

¹Wẽnd maag Soaalã, a Makabe ne a tũud-n-taas le reega b tẽng la b wẽnd doogo.

²B wãa bu-zẽmba sẽn me maan-kug niyns fãa ne lalsã sẽn da gũbg-bã.

³Wẽnd dooga paama yɩlgre la b mee maan-kugr a to. B baoo bug-bãnga n widg bugum la maanda sẽn pa yʋʋm a yi n pa kʋ wã, b le sɩnga b kʋʋbo. B kʋʋ maando, n wis tɩdare, n yõgen fitilsã, n dɩgl kaset burã.

⁴Dẽ poore b lʋɩ-la b yãvabga n pʋʋs Soaala tɩ b ra le sak tɩ b yãe namsg a woto buud ye. B sɩbg-ba n zemse, b sã n beeg-ba, la b ra le sak tɩ b lʋɩ bu-zẽmba nusẽ ye tɩ b yaa wẽn-kɩɩsdba la we-baase.

⁵Daar ning b sẽn sãam wẽnd doogã la b yãkr tɩ na yɩ a yɩlgr daare. Yɩɩ kislewu kiuug pisi la a nu raare.

⁶Dasma a nii tõre b maana kibs ne sũ-noogo wala b sẽn maand kibs wakato. B gãe tãms zutu la tãms bogdẽ wa we-rũmsi.

⁷B ra zãada kãna, tɩɩs vã-kila la kãas vãado la b pʋda yɩɩl n pẽg Wẽnd sẽn sak tɩ ro-sõnga yɩlge.

⁸B sogsame n bãng ned kam fãa raabo la b moona Zʋɩf rãmba fãa yĩnga tɩ yʋʋmd fãa kibs na maane n tẽeg ro-sõnga yɩlgre.

⁹Yɛl niyns sẽn wa ne a Antiyokus Epifan kũuma yɩɩ woto.

¹⁰Marsã d na n goma nin-wẽng kãng biig a Antiyokus Ewupator yelle. D na n wilga a zaba sẽn wa ne yel-beed niynsi.

¹¹A sẽn lebg dĩm n sɛ, a Antiyokus Ewupator yãka a Liziyas t'a yɩ Sele-Siri la Fenisi tãnsoaba.

¹²Dẽ wẽnd la a Ptoleme, b sẽn boond a soab t'a Makrõ, tũ zemsg sor ne Zʋɩf rãmba. A Yãeeme tɩ b ra zãmbd-b-la wʋsgo t'a modg n na n zã-b ne bãane.

¹³Dĩma zo-rãmb tɩ rõd-a lame; wakat fãa b ra boond-a lame tɩ zãmb soaba la rẽ yaa a Filometor sẽn da gũnuga Sɩpr tẽnga t'a zoe n bas-a, n paas me a ra kẽeda a Antiyokus Epifan tãpẽ. La a sẽn ges tɩ tʋʋma ka kẽng wala a sẽn datã, a yũu tɩɩm n kʋ a menga.

¹⁴A Gorziyas n wa n lebg tãnsoab kãsenga la a ra yaooda neb tɩ b zabdẽ, la a ra baooda Zʋɩf rãmb noor beoog sẽn vẽeg fãa.

¹⁵Idume rãmb me ra naag-a lame n yaand Zʋɩf rãmbã tɩ b ra tara tãnsoben-tẽns sẽn zao tãms zutu la b ra reegda b sẽn dig b rãmba n yiis Zerizalɛɛm, sẽn na n yɩlẽ tɩ b sõng-b ne zabre.

¹⁶A Makabe ne a tũud-n-taasa pʋʋsame n kos Wẽnd tɩ b yɩ b sõangda n yaool n tak zabr ne Idume rãmb tãnsoben-tẽnsã.

¹⁷B wẽ-b-la ne pãnga n tõog-ba, n dig sẽn da zao-b lal-gũbra zugu. B sẽn paam a soab fãa yaa kodgre bala. Neb sẽn ki taa tus pisi.

¹⁸Neb sẽn ta tus a wɛ n zoe n tɩ soond do-lug-lug a yiib pʋgẽ, dot sẽn ya zabr kõn-ling-m doto.

¹⁹A Makabe basa a Simo beene tɩ b na n kaoog zabr ne ba, yẽ ne a Zozɛf la a Zase la neb sẽn pa paoode, la yẽ meng kẽnga zabrã sẽn da wulumdi n yɩɩdẽ.

²⁰A Simo neb kẽer n da nong ligd tɩ looge, woto b basame tɩ b sẽn da pag b rãmb rota pʋsã yao-b ligdi, bõoneg tus pisopoe, tɩ b bas-b tɩ b yi n zoe.

²¹B wilga a Makabe yella sẽn maane t'a tigim buuda kãsem-dãmba n wilg-b tɩ sẽn bas-b bɛɛba tɩ b loogã, b koosa b saam-biisi n deeg ligdi.

²²A kɩtame tɩ b kʋ-b wa sudum dãmba. A taka zabr ne sẽn ket-b do-lug-lug a yiiba pʋgẽ la a tõog-b lame.

²³B sẽn kʋ dot a yiiba pʋg taa tus pisi.

²⁴Zʋɩf rãmba ra tõoga a Timote la a kẽnga tẽn-toosẽ n tɩ yãk tã-biisi la a ra wiidi Azi tẽnga, n geen tɩ woto a na maan daoodo.

²⁵B waa n wʋma a kibare, t'a Zɩɩda ne a nebã sɩng pʋʋsgo, dẽ tɩ b reng n yuga b zut tom la b ning sũ-pa-noang futu.

²⁶B tɩ lʋɩɩ maan-kugra taoore n kot Wẽnd tɩ b sõng-ba, tɩ b lebg b bɛɛba bɛɛyã la sẽn zabdb ne tõndã pat-n-taaga, wala b sẽn kãab b noora sebrẽ.

²⁷B sẽn pʋʋs n sɛ, b yii Zerizalɛɛm n zãag bilfu. B sẽn kolg b bɛɛba sikã b yalsame.

²⁸Wĩndga sẽn waa n zẽkdẽ la b kẽ taaba. Zʋɩf rãmb ra teega b sũ-keelem la Wẽnd sõngre; bɛɛba ra teega b yãoog pãng bala.

²⁹Zabra sẽn waa n wɩngã, bɛɛba yãee yĩngri rasãmb a nu sẽn zomb wiidi sẽn tar sãnem salbr b noorẽ la neb a nu wã lʋɩɩ Zʋɩf rãmba taoore.

³⁰B lʋɩɩsa a Makabe sʋka n lut-a ne gãndã tɩ bũmb ka tõe n maan-a ye. B ra rigda bɛba ne kãna la sa-tãse, n menesd bɛɛba nini tɩ b zoet yaare.

³¹B paam n kooda tãb-biis tus pisi la koabga la wed-dʋʋdb kobs-yoobe.

³²A Timote zoeeme n tɩ kẽ tãnsoben-tẽng a ye sẽn boond tɩ Gazara la sẽn tar gũudba la a Kereyas n da ya tãnsoab ten-kãnga.

³³Dasma a naas pʋgẽ a Makabe ne a neba zaba ne sũ-noogo.

³⁴Sẽn da yẽd b rãmb n na n kʋ wã ra yeelame tɩ b rooga ka bõn-wãagdg ye la b ra tara Wẽnd tʋʋre la gom-yoodo.

³⁵Daar a nu soaba b goama waa n puuga a Makabe kom-bɩɩb pisi sũur al wʋsgo tɩ b wʋdg ne sũ-keelem n dʋ lalgã n sig ne pãng la b kʋʋ b sẽn seg b rãmb fãa.

³⁶Neb a taab me togsa pisi wã n dʋ lalgã n zoet n beoogd bɛɛbã la b ningd do-lug-luga bugum. B tol n tugla bugum n losd wẽn-tʋʋsdba vɩɩse. Kẽer da kaooda kʋɩlensã tɩ tãb-biis a taaba tõog n kẽ la b deega tẽngã n yãmbe.

³⁷B kodga a Timote sẽn da tɩ kẽ ko-baoor pʋg n solge. B kʋ-la a Kereyas ne a Apolofan me.

³⁸Dẽ poore b yɩɩlame n pʋʋs Soaala Wẽnd barka b sẽn kõ a Israyɛl kũun a woto fãa yĩnga, b sẽn sõng tɩ b tõog bɛɛba yĩnga.