Read SEBR SÕNGO, 1998 2MAKABE 12 Bible Online

2MAKABE 12 - SEBR SÕNGO, 1998 bible

2MAKABE 12

¹Yẽsga sẽn kʋ n sɛ, a Liziyas lɛɛg n waa dĩma nengẽ. Wakat kãng tɩ Zʋɩf rãmba yii n tʋmda b pʋtẽ.

²Taoor dãmb kẽer sẽn da be be, wala a Timote la a Apoloniyus, a Genewus biiga n le paas a Zerom, n paas a Demofõ, n paas a Nikanor, Sɩpr tãb-biisa sẽn da reegd-b ligd n zabdẽ wã tãnsoaba, bãmb fãa da ka basd Zʋɩf rãmba ne laafi la bãan ye.

³Ad tʋʋm beed ning Zope rãmba sẽn tʋme. B maana wa beem buud ka be bãmb ne Zʋɩf rãmb sʋk ye n bool sẽn da be-b ne bãmba fãa, bãmb ne b pagb la b kamba tɩ b wa kẽ koom kogend, b sẽn da ka b toore.

⁴Zʋɩf rãmba sakame, tɩ zood sebr la b ra yiis tẽnga pʋga n da kõt kaset tɩ bãmb me baooda laafi. Woto b pa maan gũusg tɩ sek ye, mik bɛɛba tall-b lame n ta ko-sʋka n kiig-b koomẽ wã, bãmb na ta kobsi.

⁵A Makabe wʋma bɛɛba sẽn tʋm wɩɩbd ninga la a wilga sẽn be-b ne-yẽ wã, b sẽn na n naanega.

⁶B reng n pʋʋsa bʋʋd tɩrg Naaba-Wẽnd n yaool n yik zabr ne nin-kʋʋdbã. A Makabe kẽna yʋngo n tɩ yõog koom kogendã la neb niyns fãa sẽn da zoe-b n tɩ soond be wã.

⁷Tẽnga noor sẽn pag yĩnga a loogame la a kãabd a meng t'a na lɛɛg n wa kʋ Zope rãmb fãa.

⁸A Makabe wʋmame tɩ Zamniya rãmb me ra baood n na n tʋma beed ne Zʋɩf rãmb sẽn be-b ne bãmbã.

⁹Dẽ la a kaoog zabr yʋngo ne Zamniya rãmba, n yõog b koom-kogendã b sẽn loet-b zĩig ningã. B yõoga tẽnga ne koom-kogendã, la Zerizalɛɛm dãmb zĩnda b tẽngẽ, n yãe Zope bugum. Zerizalɛɛm ne Zope taa daar a ye kẽnde.

¹⁰A Zɩɩda sẽn yi be n na n tɩ tak zabr ne a Timote, a ka yãe n zãag ye. La Arab rãmb waa ne tãb-biis na ta tus a nu la wed-dʋʋdb kobs-nu.

¹¹Zabra zaba ne rugdu, la ne Wẽnd sõngre a Zɩɩda n tõoge. Bɛɛba kosa a Zɩɩda t'a tud a nug n yõg zoodo tɩ b na kõ-a rũmsi la b na sõng taaba.

¹²A Zɩɩda gesame tɩ b sɩd tõe n sõng-a lame la a yõga zoodo, n sɛɛs zaba la b leb b rotẽ.

¹³Vẽkembeoogo a Zɩɩda yika zabr ne tãnsoben-tẽng a ye sẽn tar lal-gũgri la sẽn boond tɩ Kasfo.

¹⁴Tẽnga rãmb gesame tɩ b lalsa yaa wogdo la kood pida ne b roto tɩ b na n gom põas-põas ne a Zɩɩda la a poorẽ dãmba. B tol n tʋʋsa Wẽnd tʋɩ yoodo.

¹⁵A Zɩɩda ne a neba pʋʋsa bũmb fãa Soaala sẽn lub Zeriko a Zozuwe wakatẽ, tɩ ka tũ ne zab-teed buud sẽn wurd la b tusd lals n lubdẽ ye. Woto a Zɩɩda neba rʋʋ lal-gũbrã wa bõnyẽese.

¹⁶Wẽnd sõng-b lame tɩ b reeg tẽngã la yɩɩ tẽn-kũum sẽn ka tõe n bilgi. Kʋɩlg n da pẽ be. A yalem ra taa kãntɩɩs kobs-nii la pisi, [2] la yaa waa a ra pidda ne zɩɩma sẽn daagã.

¹⁷A Zɩɩda yii be n kẽn dasma a naas kẽnde n tɩ kẽ Karags. B ra boonda tẽn-kãng Zʋɩf rãmbã tɩ Tobi tẽng rãmba.

¹⁸A pa yãend a Timote be ye, t'a ra loogame. Woto a ka yaas n zab ye la a basa a tãb-biisi.

¹⁹Yaa a tãnsoaben-dãmb a yi, a Dozite la a Zozipatɛr la Makabe tʋm Karags. B kʋ-la a Timote sẽn bas neb niynsã, b ra taa tus piiga.

²⁰A Makabe weela neba sak-saka, n kõ sak fãa a taoor soaba la b pʋga a Timote. Yẽ ra tara tãb-biis tus koabg la pisi la wed-dʋʋdb tus a yi la kobs-nu.

²¹A Timote sẽn wʋm t'a Zɩɩda kolgdame, a kẽesa pagba la kamba la teedã Karniyõ pʋgẽ. Karniyõ yaa tãnsoben-doog sẽn tõe n zab n fãag a menga. Tẽnga ra ka bõn-tatg ye, soy wã ra yaa sẽgse, n tar bogd la kuga.

²²A Zɩɩda tãb-biisa n lik pipi la bɛɛba riga rabeem. Rabeema waa n lebga zoe-yaare tɩ Soaalã, bũmb sẽn ka tõe n solg a soabã, lika b meng bãmba. Tãb-biisa zoe n teesa b sẽn paamẽ n mi n lɛɛg n pogend taaba, n kõsd taab ne b sʋʋse.

²³A Zɩɩda ra wɩngda ne b rigbu, n pʋgd n kɛɛd-b n lubdẽ. Bɛɛba sẽn pa zabrẽ taa tus pis-tã.

²⁴A Timote meng lʋɩ a Dozite la a Sozipatɛr neba nusẽ. A Kos-b-la ne dabaar kãsenga tɩ b bas-a ne yõore. A yeel-b lame tɩ bãmb buuda neb la b saam-biis wʋsg lʋɩ-la a mugẽ la a tõe n kʋʋ bãmb me.

²⁵A Timote sẽn yõk goama n tar goama, la a wẽenẽ t'a na n lebsa nin-bãmba vɩɩse, a Dozite la a Sozipatɛr sẽn dat n fãag b saam-biisa yĩnga, b bas-a lame t'a looge.

²⁶A Zɩɩda kẽe Karniyõ la Atargateyõ la a kʋʋ neb na ta tus pisi la a nu.

²⁷Bɛɛba sẽn sẽege, a Zɩɩda kẽe Efrõ ne a tãb-biisi. Efrõ da yaa tãnsoben-tẽnga, a Liziyas ra bee be. Yɩnga b ra tedga kom-koeemse lal-gũbra sɛɛga tɩ b zabd ne b yãoog pãng tɛka. B ra yalsa loobs bɛd buudu la b sam kuga sẽn tar n lobdã.

²⁸Zʋɩf rãmb pʋʋsa Soaala sẽn tõe n koms bɛɛba la b reega tẽngã la b gãnega neb na ta tus pisi la a nu.

²⁹B sẽn yi be b teesa Sitopolis. F sã n yi be n kẽn wakat a yi, f tata Zerizalɛɛm.

³⁰Zʋɩf niyns sẽn da naag-ba n be be wã kõo kaseto tɩ Sitopolis rãmb da reeg-b-la neere b yell pakra wakato.

³¹A Zɩɩda pʋʋs-b-la barka la a kos-b lame tɩ nin-daar bɩ b kell n maan boto ne a buudã. B taa Zerizalɛɛm dẽ tɩ dasem pis-nu kibsa yaoome.

³²Tigsg kibsa poore b taka zabr ne a Gorziyas, Idume tãnsoaba.

³³A Gorziyas yii ne tãb-biis tus a tã la wed-dʋʋdb kobs-naase.

³⁴B tãaga taaba tɩ Zʋɩf rãmba wʋsg rʋʋge.

³⁵Tobi tẽng rãmb wed-dʋʋd a ye sẽn boond tɩ Dozite, n ya gãndaoog menga, gãda a Gorziyas fuugu n vuud-a, n na n yi ne-a vɩɩga la Taras wed-dʋʋd a ye wudg n kẽe a Dozite, n kɛ a bãoko n yesg t'a Gorziyas paam n zoe n tɩ soond Marisa.

³⁶Sẽn da be-b ne a Esdras n tar zabrã waa n yaame. A Zɩɩda pʋʋsa Wẽnde n kos tɩ b lʋɩ taoore n yɩ b Sõangda.

³⁷A Zɩɩda tãsa ne a buuda goama Wẽnd pẽgr la zabra sɩngre, t'a Gorziyas neba na n kʋɩ tĩiga.

³⁸A Zɩɩda bʋʋga a tãb-biisã la b tɩ kẽe Odolam. Vʋʋsga daar taame tɩ b yɩlg b menga n pʋʋs b pʋʋsgo.

³⁹Vẽkembeoogo b waa n yãenda a Zɩɩda (la ra segda wʋsgo) la b goma kũuma rɩgsgo la b solgre, ned kam fãa a ba rãmb yaadẽ.

⁴⁰B yãenda ned kam fãa gɩfẽ teed sẽn ya Zamniya wẽnda waoogr teedo la Zʋɩf rãmb noor ra gɩdga rẽnna. Lebga vẽenega tɩ rẽ n wa ne b kũum.

⁴¹B fãa pʋʋsa Wẽnd sẽn ka mi bʋ-golomse la sẽn pukd sẽn solge,

⁴²fãa pʋʋsame n kos tɩ b yĩm yel-wẽnda zãnga. A Zɩɩda kosa nebã tɩ b zãag b meng ne wẽng buud fãa tɩ b nee sẽn ki-ba sẽn maan yell ning tɩ pak-ba.

⁴³B loba ligd n paam waas tus a yi la b tool-a-la Zerizalɛɛm tɩ b ra rũms n kʋ sugr kosg maando. Ad-y b ra zʋʋg n tagsda yĩng vʋʋgr yelle.

⁴⁴Sɩda a sã n da tẽedẽ tɩ tãb-biisa sẽn ki wã pa na n vʋʋge, pʋʋs b yĩnga yaẽ la zaalem la yalemdo.

⁴⁵La a sã n tẽed tɩ sẽn ki-b Wẽnd yĩngã rolb kãseng n gũud-ba, a tagsg yaa woko la neere. Yaa rẽ n so t'a kʋ sugr kosg maand sẽn ki-ba yĩnga, b yel-wẽna yẽesg yĩnga.