Read SEBR SÕNGO, 1998 2MAKABE 13 Bible Online

2MAKABE 13 - SEBR SÕNGO, 1998 bible

2MAKABE 13

¹Koabg la pis-naas la a wɛ yʋʋmde, a Makabe wʋmame t'a Antiyokus Ewupator dɩka Zɩɩda tẽng sor ne tãb-biis ka tɛka.

²A kug-zĩid la a wubda a Liziyas tũ-a lame ne tãb-biis sẽn ya Grɛk rãmba la sẽn ta tus koabg la piiga, n paas wed-dʋʋdb tus a nu la kobs-tã, la wobd pisi la a yi, la zabr bilim-bilm kobs-tã ne goe wogdo.

³A Menelas tɩ paam-b lame la a sɩng n na n tudga a Antiyokus ne a sɩlem baafã. Yaool n ka buuda manegr la a ra baood ye, a baood n na n kell n dɩ a naama.

⁴Naaba-Wẽnd kɩtame t'a Antiyokus sũur yik ne a Menelas. A Liziyas tõog n wilga dĩma tɩ yel-beeda fãa yita a Menelas nengẽ. A Antiyokus yeelame tɩ b tall-a n kẽng Bere, n tɩ kʋ-a wala be rãmb sẽn maande.

⁵B ra mee ro-lug-lug gilg a ye be. A zãndlma ya kãntɩɩs pis-nu. B ra pidsd-a-la ne tompɛglem. Bũmb n da be a noorẽ wã n bilimdẽ la a vikd tompɛglma pugẽ.

⁶Ned sã n da zu wẽnd doog teedo bɩ a maana yɛl bɛd a taaba, b ra kʋʋd-a-la ne bõn-kãnga.

⁷Yɩɩ woto la nin-wẽng a Menelas ki yã la a pa tol n paam yaoog ye.

⁸Da segdame, t'a wẽnema yɩɩ wʋsgo. A sãama maan-kugrã. Maan-kugra bugma la tompɛglma ra yaa bõn-sõma. Yaa rẽ la tompɛglma me wɩɩb-a.

⁹Dĩma dɩka sore, n bilgd a yamẽ tʋʋm beed ning a sẽn na n tʋm Zʋɩf rãmbã la tʋʋm beedã, b yaab rãmb meng ka yãend a taar ye.

¹⁰A Zɩɩda bãngame n kos a nebã tɩ b yõk Wẽnd sɛɛg wĩndg la yʋngo.

¹¹B kosa Wẽnd tɩ b le wa sõng-ba tɩ b rat n wãa b rog-n-mik la b buudu la b wẽnd doogo. B kosame tɩ b ra bas b buuda sẽn paam pemsem bilfã tɩ b le lʋɩ wẽn-tʋʋsdba nugẽ ye.

¹²B sɩd naaga taaba wa b sẽn kõ-b noorã n pʋʋs Nimbãan-zoeer Soabã. B yãbame; b loe b noor; b kɩ b neng tẽng dasma a tã. A Zɩɩda le sagl-b lame n paas b raoodo la ned kam fãa da bob n dõbame.

¹³A tigma nin-kẽembã n yẽse la b yeelame tɩ b ka na n yaas tɩ dĩma tag Zɩɩda tẽn-peelem ne a tãb-biisi la a soog Zerizalɛɛm ye. B na n boba zabre n yãk yella neng ne Wẽnd sõngre.

¹⁴A Zɩɩda rɩka fãa n bas ne Dũni Soaala la a yeela a tũud-n-taase tɩ b zab ne sũ-keelem n tãag b kũum, b rog-n-mikã, b wẽnd doogã, b tẽngã, b buudã, b noya yĩnga. A tɩ yalsa a tãb-biisa Modin noorẽ.

¹⁵B yãka b zab yʋʋre «Wẽnd la raoodo,» tɩ bɛɛb tõogr bee ne Wẽnde. B basame tɩ zĩig sobg la kom-bɩɩb sẽn tar-b sũura tɩ wẽe dĩma sika. B kʋʋ neb na ta tus a yi, la b kʋʋ wobg kẽeng a ye n paas wobda legendba.

¹⁶B zũndga b sikã n bas n loog ne sũ-noogo.

¹⁷Ne Wẽnd sõngre, b tʋma b tʋʋma n loog tɩ zĩig yaool n yẽeg.

¹⁸Dĩma bãngame tɩ Zʋɩf rãmba ka bõn-tats ye, t'a na n bao dabaar a to n paam n deeg b tẽnsã.

¹⁹A kolga Bɛtsur, Zʋɩf rãmb tãnsoben-tẽng a ye, la a lɛɛga ne yãnde.

²⁰A Zɩɩda toola Bɛtsur dãmb bũmb ning fãa b sẽn da tar a soab tʋʋmde.

²¹A Rodokus yaool n da bee be n wilgd bɛɛba Zʋɩf rãmba sẽn segle tɩ b na n yõk-a n kʋ.

²²Dĩma sẽn lɛɛg n wa, a le goma zood goama ne Bɛtsur dãmba. B yõka taab nugu t'a lɛɛg n kuli.

²³A waa n wʋmame t'a sẽn da bas a Filip t'a ges a soolma yella ra lebga tõata. A Antiyokus le goma noog ne Zʋɩf rãmbã, n wẽenẽ tɩ b na zems taab marsã. Dẽ poore, a sɩd kɩtame tɩ b kʋ maand n wilg tɩ wẽnd dooga tat a yam la a kõo kũuni.

²⁴A reega a Makabe neere la a basa a Ezemonid t'a yɩ tãnsoaba al Ptolemayis n ta Gera.

²⁵A waa Ptolemayis la be rãmb sũur pa yɩ noog ne a sẽn kaool bũmb ningã tɩ b baood n na n sãam a yelle.

²⁶A Liziyas kong n goma ne-ba n wilg b kaoola võore, tɩ b na n bas zabre, tɩ b sũur na n maage, t'a loog Antiyos. Dĩma zaba takre la a sẽn waa n kong n bas raooda kibar yɩɩ woto.