Read SEBR SÕNGO, 1998 2MAKABE 14 Bible Online

2MAKABE 14 - SEBR SÕNGO, 1998 bible

2MAKABE 14

¹Sẽn maan yʋʋm a tã, a Zɩɩda ne a tũud-n-taas bãngame t'a Selekus biig a Demetriyus waa Tripoli ne tãb-biis wʋsgo la koom kogendo.

²A Demetriyus da wẽe tẽngã n deege n tol n kʋ a Antiyokus ne a Liziyas, rao ning sẽn wuba yẽnda wã.

³A Alkime yɩɩ maan-kʋʋd kãsenga sẽn da dẽgma a menga n yi a buuda poorẽ n sak Grɛk rãmba rog-n-miki la a ra mi vẽenega t'a ka na n põse, t'a ka tõe n le pẽneg maan-kugr sõnga me ye.

⁴A waa n yãenda dĩm a Demetriyus, koabg la pis-nu yʋʋmde, n kõ-a sãnem pugla la kãag vãoog la wẽnd dooga oliviye tɩɩg willi wala b sẽn mii n maandẽ. A yaool n ka paas gomd a to baraar ye.

⁵Waa n segame t'a Demetriyus bool-a n sok-a sẽn be Zʋɩf rãmba sũurẽ la b sẽn segend bũmb ninga t'a wẽnema na n tus-a t'a leoke:

⁶«Sull a ye la b tara tɩ b boond tɩ nong-pʋʋsg rãmba la b taoor soab la a Makabe, la yaa ned sẽn kaood zab la a zẽkd a taab zutu, tɩ tẽnga ka tar laafi ye.

⁷M waa ka n na n wilg-y tɩ b reega m maan-kʋʋr naam, naam sẽn ya m yaab rãmb bũmbu.

⁸M waa pipi, m saam-biisa yĩnga tɩ m sẽn gom b rãmb gãeemdã kɩtame tɩ buuda dɩt bõne sẽn pa bilf ye.

⁹Dẽ yĩnga, dĩma, y sã n bãng yɛla toor-toore b sẽn dogl a zugu, bɩ y fãag buudã la d tẽngã, wala y sẽn yib n maand ne buud a taaba, tɩ d bɛɛba gũbg-d-la zĩig zãnga.

¹⁰A Zɩɩda sã n kell n vɩɩnd ne yõore, tẽnga kõn paam laafi abada.»

¹¹A Alkime gomame t'a Demetriyus zo-rãmba sẽn da kis a Zɩɩda paam dẽ n na n maag b meng n tõg dĩma.

¹²A Demetriyus yãka a Nikanor, wobda naaba, n tɩ zĩndg-a Zɩɩda tẽnga.

¹³A yeel-a lame t'a loog n tɩ kʋ a Zɩɩda la a sẽeg a tũud-n-taasã; a lebsa a Alkime a maan-kʋʋr naam, wẽnd doog ning sẽn yɩɩd a taaba pʋgẽ.

¹⁴Bu-zẽmba sẽn da zoe a Zɩɩda taoorã bʋʋga a Nikanor n tẽed t'a sã n tõog Zʋɩf rãmbã, a na maneg b yelle.

¹⁵Zʋɩf rãmba sẽn wʋm t'a Nikanor ne bu-zẽmba watame, b yuga b zut tom. B pʋʋsa Wẽnd barka tɩ b kõo b buuda tẽnga tɩ b be a pʋgẽ daar fãa, la b tara a yell gesgo la wẽnd makr dãmb maanda a pʋgẽ wakat buud fãa.

¹⁶Taoor dãmba kõ-b-la noore la b yii tao-tao b sẽn da beẽ wã n tɩ gãneg tãp Deso.

¹⁷A Zɩɩda yao, a Simo n da sɩng zabra ne a Nikanor la bɛɛba sẽn waa n paas vugr bala, a Simo konga pãnga.

¹⁸A Nikanor bãngame t'a a Zɩɩda ne a tũud-n-taasa yaa rap wa bugum, n pa mi reem b sã n zabd b buuda yĩng ye. A zoe a zɩɩma raagr na n wa yɩ zaalem,

¹⁹t'a tʋm a Posidoniyus, a Teodot la a Matatiyas tɩ b wa tud b nug n yõk Zʋɩf rãmba me rẽnna.

²⁰A Zɩɩda wilga a neba yẽsgã sẽn yɩ a soaba la kɩɩsg pa zĩnd ye. B saka sẽn kaoolã.

²¹B yãka raare tɩ nanamsa na n seg taab zĩ-yɛnga. B kẽe bilim-bilm n wa seg taab zĩ-yɛnga. B yiisa naam goeelse n tedge.

²²A Zɩɩda da baoo zĩ-sõng n solg tãb-biis sẽn mi b meng võore la sẽn bob zab-teedo t'a Zɩɩda ra zoeta bɛɛba na n wa maan zãmbo. B yẽsgã yaool n zemsame.

²³A Nikanor paa Zerizalɛɛm; la a pa maan sẽn sek toagsg ye. A tol n lebsa b tẽnsẽ, bu-zẽmba sẽn da zoe n bʋʋg-a wã.

²⁴A ra tara a Zɩɩda gesgo, a sũura sẽn da noom ne-a.

²⁵A sagl-a lame t'a yi kãadem n dog kamba. A Zɩɩda reegame n sɩd yi kãadem la a zĩnda ne bãane n dɩ vɩɩma noogo.

²⁶A Alkime mikame tɩ zood n kẽ a Zɩɩda ne a Nikanor sʋka t'a rɩk b yẽsga sebr n tɩ wilg a Demetriyus. A wilg-a lame t'a Nikanor daabã pa manegd buuda ye. A paasame tɩ yaa buuda bɛyã, a Zɩɩda menga, la a kãab maan-kʋʋra naam.

²⁷Nin-wẽng a Alkime wɩdsa kɩtame tɩ dĩma sũur puug t'a gʋls a Nikanor n wilg-a t'a sũur pa noom ne b sẽn kaool bũmb ninga ye la b yõk a Makabe n ning-a wĩir n tall n wa Antiyos.

²⁸A Nikanor deega sebrã n gese. A ra pa nong n kɩɩs a meng sẽn kaool ye; a zɩɩ n yãe a Makabe ne wẽnem ye.

²⁹A ra ka tõe n zãgs dĩma me noor ye t'a ra baood daare la rabaare.

³⁰A Zɩɩda waa n yãeeme t'a Nikanor mo-noogã woogdame la a sɩng n maanda pãr-pãr ne-a t'a yeel tɩ ka na n zems ye. A tigma neb wʋsgo tɩ b zoe n zãag ne a Nikanor.

³¹A sẽn wʋm t'a Zɩɩda fʋsg n loogame, a Nikanor kẽnga wẽnd doogẽ wã maanda wakato la a yeelame tɩ b wa ne a Makabe.

³²Maan-kʋʋdba wẽename tɩ b ka mi a sẽn beẽ ye.

³³A Nikanor teesa wẽnd dooga ne a rɩtgo n yeele: «Y sã n pa ning a Zɩɩda wĩir n kõ-ma, m na wã do-kãnga, m na lub a maan-kugrã la zĩ-kãnga m na lebg n me do-neer a Dionizos yĩnga.»

³⁴A sẽn gom woto n sɛ, a loogame. Maan-kʋʋdba me zẽka b nus n pʋʋs Yĩngr-Soaala sẽn zab wakat buud fãa n sõng-bã la b yeelame:

³⁵«Ade, bũmb fãa Soaala, yãmb pa tar bũmb ba a ye tʋʋmde ye. Ne rẽ fãa yãmb tʋlgame tɩ y roog tilg tõnd sʋka.

³⁶D kotame tɩ y sẽn ya sõng sẽn ka to Soaba bɩ y ra bas bada tɩ b rẽgem doog ning sẽn nan yɩlg paalem-paalma ye.»

³⁷Nin-kẽem a ye n da be Zerizalɛɛm n boond t'a Razis; a ra nonga buudã la a yʋʋra ra yii dẽ yĩnga. Nin-kãnga la b tees a Nikanor.

³⁸Zʋɩf rãmba sẽn waa n dat n fʋsg n yi b bɛɛba soolmẽ b yeelame tɩ yẽ n le nek rog-n-mikã la sɩda, a vɩɩma fãa pʋgẽ, a dɩka a meng zãng n kõ Zʋɩf rãmba dog-n-mik.

³⁹Sẽn na n yɩlẽ tɩ Zʋɩf rãmba ra sãmb t'a kis-b lame, a Nikanor yiisa tãb-biis kobs-nu tɩ b tɩ yõk a Razis.

⁴⁰A ra miime tɩ nin-kãnga sã n looge, a pogla Zʋɩf rãmbã.

⁴¹Tãb-biisa gilga roog ning a sẽn da be a soab pʋgã, n baood n na n kao a kʋɩlensã. A Razis sẽn mik t'a ka le tõe n põse, a wõoga a sʋʋga n kõs a menga.

⁴²A gesame t'a sẽn na n ki n são a sẽn na n lʋɩ nin-yooda nusẽ, n deeg paoogre sẽn ka tog ne burkĩna.

⁴³A sẽn maan yãbg yĩnga sʋʋga ka kõs a sẽn da ratẽ ye la a sẽn yãe tɩ bɛɛba taa n sɛɛme, a wudg n dʋʋ lalgã n yɩk n tiimd neba sʋka.

⁴⁴Neba targame n bas-a t'a lʋɩ vɩʋʋgẽ.

⁴⁵A sẽn da ket vɩ wã, a veooga a meng n yik tɩ zɩɩma tar yorbo la a zoe ne toogo n yi neba sʋka n tɩ rʋ pĩig sẽn lugi.

⁴⁶Be, a ta-la a yãadã n yiis. A rɩk-b-la ne a nus a yi n lob nebã la a pʋʋsd Wẽnde sẽn so a vɩɩm, tɩ b wa lebs a vɩɩma daar a ye. Yaa woto la a ki yã.