Read SEBR SÕNGO, 1998 2MAKABE 3 Bible Online

2MAKABE 3 - SEBR SÕNGO, 1998 bible

2MAKABE 3

¹Tẽn-sõnga ra pida ne neb sẽn zĩ ne laafi n tũud b rog-n-mik sõmb-sõmbo. Maan-kʋʋd kãseng a Oniyas ra yaa nin-sõng menga, n da kis wẽng ne a sũur fãa.

²Dĩm dãmba kẽer me ra pẽgda do-sõngã n da kõt kũun bɛda sẽn zẽkd a yʋʋre.

³Yaa woto la Azi dĩm, a Selekus da yiisd a meng korgẽ, ligd ning b sẽn tar a soab tʋʋmde, neba yĩnga la maanda rũmsa raab yĩnga.

⁴Wakat n waa n zĩndi tɩ Bilga tẽng ned sẽn boond tɩ Simo paam n lebg wẽnd dooga gũuda, Nin kãng me moora waa n yõsga ne maan-kʋʋd kãsengã, daasa yãgsg poorẽ.

⁵A sẽn yãe t'a pa tõe n maan a Oniyas bũmbu, a babsa Tars daoa a Apoloniyus. Yẽ n da ya Sele-Siri la Fenisi komber wakat kãnga.

⁶A tɩ wilg-a lame tɩ Zerizalɛɛm kʋɩlen-dooga pida ne arzɛka, arzɛk sẽn ka tõe n gelg n sɛ ye. A ra zʋʋga al wʋsgo maanda ligd sẽn tog n kẽes ligd ningã. A tol n yeelame t'a tara dabaar tɩ Zerizalɛɛm arzɛka wa lebg dĩma rẽnna.

⁷Dẽ la a Apoloniyus tɩ sõs ne dĩma n gom ne a arzɛka yelle wala a meng sẽn wʋme. Dĩma tʋma a samand naab a Eliodor t'a tɩ wa ne arzɛkã.

⁸A Eliodor yiime wa a na n tɩ gesa tẽnsa sẽn be Sele-Siri la Fenisi, mik a rabd n na n tɩ pidsa dĩma daabo.

⁹A sẽn poog Zerizalɛɛm, maan-kʋʋd kãsengã la tẽnga tõre, deeg-a-la ne waoogre. A togsa a sẽn wʋme la a wilga a waoonga võore, n maag a meng n sok n gese arzɛka sã sɩd yaa wa b sẽn gomdã.

¹⁰Maan-kʋʋd kãsenga wilg-a lame bala tɩ yaa pʋg-kõap la kɩɩbs ligdi n be be,

¹¹n paas a Tobi biiga a Irkã dẽnna. A Irkã da yaa tẽnga nin-kãsenga la sã n ka a Simo zirẽ-beedã, bũmb da ka be rooga pʋg n zʋʋg wanzurf waas kobs-naase la sãnem waas kobs-yi ye.

¹²A le wilgame tɩ b pa tog n zãmb neb niyns sẽn teeg b wẽnd doogã, sẽn ya sõngo, n tar ziirã, n wa bobel b ligda be wã ye, ned pa tõe n sɩɩs sẽn be a pʋgẽ ye.

¹³A Eliodor baas n yeelame tɩ yaa tɩlɛ tɩ arzɛka kẽ dĩma koglgẽ, tɩ dĩma tʋm-a-la rẽ yĩnga.

¹⁴A yãka raare n wa kẽ n na n ges arzɛkã la tẽnga tõr yɛɛsa baraare.

¹⁵Maan-kʋʋdba yeelga b futu, n wõg maan-kugra taoore n pʋʋsd Soaala Wẽnde tɩ bãmb n wilg sẽn tõe la sẽn ka tõe n maan ne bobelle la b sõng tɩ bobella lagfr ba a ye da loog ye.

¹⁶F sã n da yãe maan-kʋʋd kãsenga nenga, f sũur da pa tõe n pa sãam ye. A nenga gãnengo, a yĩn-gãonga pelgre ra wilgda a yɩɩra sẽn ta zĩig ninga.

¹⁷A yɛɛsgã, a yĩnga rigbã ra wilgda neb niyns fãa sẽn da get-a, sũ-beed ninga sẽn da tar-a.

¹⁸Wʋsg ra zoet n yita b zagsẽ n na n naag b taab n pʋʋse, tɩ b ra nee yel-beed ning sẽn segend wẽnd dooga yĩnga.

¹⁹Pagba ra mobga b yãoog ne kʋɩdse n yi n pid soya. Kom-pugli wã paa zakẽ la kẽer da sɩndgda lalsã n getẽ tɩ kẽer lɩkd dota võẽ, tɩ kẽer lɩkd dota noy.

²⁰B ra zɛka b nus yĩngri n pʋʋsdẽ.

²¹F sã n yãend neba sũ-sãanga la maan-kʋʋd kãsenga yɩɩre la a rɩgbu, b nimbãaneg yõkd-f lame.

²²Bãng-y tɩ wakat ning neba sẽn waa n pʋʋsd Wẽnd tɩ b sõng tɩ ligda sẽn bĩngã

²³leb b rãmba tɩ bũmb pa yãke, bãng-y tɩ yaa wakat kãng la a Eliodor yik n na n pids dĩma raabo.

²⁴A Eliodor kolga kʋɩlen-dooga ne a nebã la Yĩngr-Soaala, Pãng-Soaba, lika b menga. B lika b meng ne vẽenem kãsenga la vẽenema pãng komsa nini la a yaala neb niyns fãa sẽn da be-b be.

²⁵B yãee weefo, wed-dʋʋd sẽn zombe. Wed-dʋʋda ra kẽesda rabeem la weefa ra maneg n faasame, n yɩgd ne pãnga n teesd a Eliodor a taoor nao-bendo. Yaa wa wed-dʋʋda ra yeelga sãnem fuugu.

²⁶Neb a yiib n waa n paase n tar pãng kẽeng la neerem sẽn pid zãnga, n yeelg fu neeb sẽn ka to ye. Nin-yend yalsa a Eliodor goabga, t'a ye yals a rɩtgo, tɩ b tar a pãbre. Sapɩlem bas n vʋʋse!

²⁷A Eliodor lʋɩɩme t'a neng sobg, tɩ b rɩk-a ne pãndare.

²⁸N-ye! Sẽn kẽe-a kʋɩlen-doogẽ ne neb wʋsgã, ne tãb-biis sẽn ya gãndaadã, b kong n tʋk-a lame t'a meng ra ka tõe n maan fɩ la tʋkdba bãngame tɩ Wẽnd n yɩɩd fãa.

²⁹Wẽnd pãng sẽn waa n gãneg a Eliodor t'a ka le tõe n gome, n ka le tar teegda la fãagda,

³⁰wakat kãng tɩ Zʋɩf rãmba tara b Soaala bark pʋʋsgo, tɩ b puka b rooga sõmblem. Sẽn da be-b wẽnd dooga pʋg mars-marsã ne yɛɛsgo la rabeema, kilsame la b kɩdma sũ-noogo, likra yĩnga.

³¹A Eliodor tũud-n-taas kẽer yeela a Oniyas t'a kos Yĩngr-Soaala t'a wogl sẽn gãee soaba yõore t'a rat n kiime.

³²Maan-kʋʋdba maana rabeem tɩ dɩma na n wa yeel tɩ yaa Zʋɩf rãmb n tʋm a Eliodor beedo; a kʋʋ maando n kos Wẽnd t'a vʋʋg-a.

³³Maan-kʋʋda sẽn waa n koot a rũmsã la dap a yiibã sẽn le lik a Eliodor, ne b pĩnd futã la b yalsa yĩngr n yeel-a: «Pʋʋs maan-kʋʋd a Oniyas bark wʋsgo, tɩ yaa a kosga yĩnga la f ket n vɩ,

³⁴la fo sẽn paam yĩngr sɩbrgã wilg b fãa Wẽnd pãng sẽn yaa a soaba.» B sẽn gom woto b loogame.

³⁵A Eliodor kʋʋ maando n pʋlem Naaba-Wẽnd sẽn wogl a yõore la a kosa a Oniyas sore n leb dĩma nengẽ ne a tãb-biisi.

³⁶A yãee ne a nini Wẽnd tʋʋm-bãna la a ra pẽgd-b-la neba fãa taoore.

³⁷Dĩma tɩ sok-a lame tɩ ãnda la a tõe n tʋm Zerizalɛɛm yɛsa t'a leok:

³⁸«Y sã n tar bɛyã bɩ ninsaan-kazukemdi, tʋm-y y bɛ wã be la a sã n pa ki, a na lɛɛg n wa ne yĩng sẽn bug kaase. Sɩda yaa Wẽnd meng n wilgd b pãng zĩ-kãngã.

³⁹Yĩngr-Soaba nif teega zĩ-kãng la a gũud-a lame. Sẽn kẽe-a be ne raab wẽnga, b wẽed-a lame n kʋ.»

⁴⁰Yɛla yɩ-la a woto la rẽ me la wẽnd dooga arzɛka pa wʋk n loog ye.