Read SEBR SÕNGO, 1998 2MAKABE 5 Bible Online

2MAKABE 5 - SEBR SÕNGO, 1998 bible

2MAKABE 5

¹A Antiyokus waa n segenda a tãp a yiib soab ne Ezipt rãmba.

²La ade, dasem pis-naas tõre, tẽnga rãmb yãee wed-dʋʋdb sẽn zoet yĩngri la b futa ra kõoga ne sãnem gĩsi; b yãee tãb-biis ne b zab-teedo la b ra tigma taab sak-sak.

³B yãee wed-dʋʋdb sẽn tong wala b na n taka zabre. B yãee zab-zabdb sẽn fõt n kẽed taaba, gãnd sẽn yulumdi, kãna, sʋʋse sẽn wõog b wʋʋdẽ, b wʋma pɛɛm sẽn fɩɩnde, b yãee sãnem futu la kut fut buud toor-toore.

⁴Tẽnga rãmb fãa ra kotame tɩ likr a woto buud yee n yɩ bõn-sõng sẽn wat pukri.

⁵B ra gomame, la pa sɩd ye, t'a Antiyokus kiime. Woto a Zasõ yii ne neb na ta tusri, n tak zabr ne Zerizalɛɛm tẽnga. B tõog n gãndga lal-gũbrã la b tõoga tẽngã t'a Menelas na n zoe n tɩ soond zabr kõn-ling-ma pʋga.

⁶A Zasõ sɩnga a saam-biisa kʋʋbo n pa tags tɩ ned sẽn wãad a saam-biis wãada a menga. A bao n na n tõoga wala a bɛɛba, neb sẽn yaa a saam-biisi.

⁷A yaool n ka tõog n lebg dĩm ye. A sẽn paam yaa yãnd bala t'a kong n zoe n tɩ soond Aman tẽn-peelmẽ.

⁸A tʋʋm wẽnsa ta-la a tɛka. B pag-a-la roog, Arab dãmb naab a ye sẽn ya toaag soolmẽ sẽn boond t'a Aretas. A zoeeme, n kẽ ka, n yi ka, tɩ neb fãa rigd-a, tɩ neb fãa kis-a wa rog-n-mika sãamda, tɩ neba fãa get-a wa ba-yira wãada la a saam-biisa kʋʋda. A diga Ezipt tẽnga.

⁹Yẽ sẽn dig neb ka tɛk n yiis b tẽngẽ, a me kii pa-weere. A kẽnga Lasedemon n tẽed t'a na n paama laafi, t'a ra kĩi ne be rãmb bilfu.

¹⁰Yẽ sẽn bas kũum ka tɛk n ka mum yaoogẽ yĩnga, ned ba a ye me ka yãb-a ye, ned ba a ye ka yals a zug ye, a ka paam zĩig a saam dãmb yaadẽ ye.

¹¹Dĩma sẽn wʋm kibarã, a tẽeme tɩ Zʋɩf rãmb fʋsg n yi-la a soolmẽ. A sũur puuga wa bõnyẽega t'a yi Ezipt n wa, la a sẽn zabe a tõoga tẽngã.

¹²A kõ-la a tãb-biisa noore tɩ b kidb b sũuri n kʋ b sẽn seg b rãmb fãa la b kood sẽn zoe-b n kẽ zagsẽ.

¹³B kʋʋ nin-kẽems la kom-bɩɩba, pagb la kom-bõonego, n varg kom-pugli la kom-peelse.

¹⁴Dasma a tãab pʋgẽ b kʋʋ neb tus pis-naase, n koos neb tus pis-naase tɩ zãng fãa ya tus pis-nii.

¹⁵Rẽ ka sek-a ye t'a kẽ wẽnd dooga pʋga, doog ning sõmblem sẽn ka to moogã. A Menelas la a lʋɩɩs a taoore, ned sẽn ka le mi buud la a ka reegd buud noor ye.

¹⁶A sɩɩsa lagd sõma ne a nus rẽgdo. A wʋka ne a nus rẽgdo kũun niyns dĩm dãmb a taab sẽn da kõ zĩ-sõnga manegre la a yʋʋr zẽkr la a ziir paasg yĩnga.

¹⁷A yamẽ wã, a Antiyokus ra maanda wʋglem, a ka tags tɩ yaa tẽnga rãmb wẽnem n da puug Soaala sũur ye. B wẽnema ra kɩtame tɩ b toog ra ka le be ne ro-sõnga ye.

¹⁸Tẽnga rãmb sã n da ka basẽ tɩ yel-wẽn ka tɛk rɩ-ba, a Antiyokus me sẽn taẽ, a yãeẽ la pãbre la lekre wala a Eliodor, dĩm a Selekus sẽn tʋm a soab t'a tɩ wʋk wẽnd dooga teedã.

¹⁹Wẽnd yaool n da pa tũus b buudã zĩ-kãng yĩng ye, ya buuda yĩnga la b ra yãk zĩigã.

²⁰Yaa rẽ yĩng la wẽnd dooga naag buudã n wʋm toogo la a le naaga buudã n paam kũun sõngo. Wẽnd waa n puuga b sũuri n bas b buudã la b le waa n lebs-a-la a pĩnd ziirã a sẽn lɛɛg n kẽ a Soaala raare.

²¹A Antiyokus leba Antiyos ne wẽnd dooga laogo sẽn ta neb tus a yi la kobs-tã la pis-nu zɩɩbo. A ra tẽeda ne nagre, ne wilg-m-menga, t'a tõeeme tɩ tẽn-koɛɛng lebg mogre, n tõe tɩ sor tuk mogr pʋga.

²²A basa a na-yir dãmba tɩ b yõneg n tʋm beedo ne Zʋɩf rãmbã. Frizi rao, a Filip, n soog Zerizalɛɛm la a bi-beelma ra yɩɩda dɩma rẽnna.

²³A basa a Andronik Garizim. Sẽn paase yaa a Menelas, la sã n yaa a saam-biisa zãab pʋgẽ yẽ n da yɩɩd ne wẽnem. A beema ne Zʋɩf rãmba yaa waa rognengo.

²⁴A Apoloniyus la dĩma lʋɩɩs a tãb-biis taoore. Tãb-biisa da taa tus pisi la a yi. Dĩma tʋm-b lame tɩ b tɩ kʋ kom-bɩɩba fãa la b koos pagba la kamba.

²⁵A sẽn wa Zerizalɛɛm, a waame wala a ka rat tẽnga rãmb ne yell ye la a gũu vʋʋsg daare, da-sõngo, baraar la a tigma a tãb-biisã tɩ b na n mak zabre n wilg nebã.

²⁶Wʋsg sɩd yiime n na n gese tɩ b paam b n kʋ dẽ poore b kẽe tẽngã la b luba neb ka tɛka.

²⁷A Zɩɩda Makabe ne a tũud-n-taas piig zoeeme n dig we-raoogẽ. B ra vɩɩ be wa we-rũmsi, tãms zutu. B ra zoeta b na n wa rẽgme. Woto wã b ra pa wãbd bũmb a to sã n ka vãad ye.