Read SEBR SÕNGO, 1998 2MAKABE 8 Bible Online

2MAKABE 8 - SEBR SÕNGO, 1998 bible

2MAKABE 8

¹Wẽnd kãng t'a Zɩɩda Makabe ne a tũud-n-taasa ra soosd n kẽeda tẽn-bɛd la tẽn-bõonesa pʋga n boond b saam-biisã la neb niyns fãa sẽn da ket n gãd kẽnkẽ Zʋɩf rãmba dog-n-mikã. A waa n tigma neb na ta tus a yoobe.

²B ra kota Soaala tɩ b sulg n ges b buuda tɩ neba fãa ra kis-a lame, tɩ b zoe b ro-sõnga nimbaanega, tɩ nin-yaals n da rẽgem-a.

³B ra kotame tɩ b zoe tẽnga nimbãaneg t'a wãab ra zoe n segl n sɛɛme la lalg pa na n le yals ye. B ra kotame tɩ b kelg koɛɛg ning sẽn da wãgd b tʋbrẽ la koɛɛga yaa b sẽn daag b rãmb zɩɩma koɛɛga.

⁴B ra kota Soaala tɩ b tẽeg tɩ kom peels zɩɩm daagda zaalem la b tẽeg n puug b sũuri ne neb niyns sẽn da saad n sãamd b yʋʋrã.

⁵A Zɩɩda sẽn lebg tãnsoab n sɛ, bu-zẽmba ka le tõog-a ye tɩ Zʋɩf rãmb yĩnga, Soaala rɩka b sũ-puura n tek ne nimbãan-zoeere.

⁶A Zɩɩda da soosd n kẽeda tẽn-bɛda la tẽn-boonego n yõogd-b bugum, n deegd zĩis niyns b sẽn teedg ne bɛɛbã. B tõog-b-la naoor wʋsgo.

⁷Naoor wʋsgo yaa zĩ-sobd la b bẽta. Tao-tao t'a gãndalsma saaga zĩig zãnga.

⁸A Filip yãeeme t'a Zɩɩda pãng paasdame t'a wẽdgdẽ n kẽed sʋk beoog sẽn vẽege. Dẽ la a gʋls a Ptoleme. Yaa zab-mit sẽn da be Sele-Siri la Fenisi la a yeel-a lame t'a wa sõng-a.

⁹A Ptoleme yãka a Nikanor, a Patrokl biiga, dĩma zoa kãseng a ye. A yiis-a-la tao-tao ne tãb-biis tus pisi tɩ b wa kʋ Zʋɩf rãmba zãnga. Tãb-biisa da ka buud a ye rãmb ye. A kɩtame t'a Gorziyas naag a Nikanor. A Nikanor me ra yaa tãnsoab sẽn mi zabr sõmb-sõmbo.

¹⁰A Nikanor ra yeta a menga; m na n yõga Zʋɩf rãmba n koose la woto m na paam wanzurf sẽn ta neb tus a yi la la kobs-yopoe zɩɩbo n kõ dĩma t'a yao Rom dãmbã.

¹¹A toola mogr noorẽ dãmbã tɩ b wa ra yem-daado, n tol n kãab Zʋɩf rãmb tus pis-wɛ, la nin yend fãa da raada ne wanzurf sẽn ta nin-yend zɩɩbo. Bũmb a ye bal la a ka reng n geel, yaa Pãng-Soaba sɩbgr sẽn na n lʋɩ a zugã.

¹²A Zɩɩda wʋmame t'a Nikanor ka le zãr ye t'a na n wilg a nebã.

¹³Rabɛɛmbã la neb niyns sẽn yĩm b tɩ Wẽnd yaa zemsg soabã zoe n kẽe tẽns a taaba.

¹⁴Sẽn pa-ba sɩnga b teed koosgo la b pʋʋsd Wẽnd tɩ b zãag-b ne kõb-wẽng, a Nikanor, t'a ra zoe n koosa bãmb tɩ zabr nan ka tak meng ye.

¹⁵B ra yeta Wẽnde tɩ b ra ges bãmb ye, b ges b zooda ne b ba rãmba, b ges tɩ b sonda bãmb yʋʋrã sẽn tar pẽgr la ziiri.

¹⁶A Makabe tigma neb tus a yoobe n sagl-b tɩ b ra bas tɩ bɛɛba la bu-zẽmba sõor yɛɛs-b ye. A sagl-b lame tɩ b zab ne raoodo.

¹⁷A sagl-b lame tɩ b ra yĩm b sẽn sãam do-sõnga to-to ye, tɩ b ra yĩm b sẽn maan tẽn-sõnga bũmb ning ye, tɩ b ra yĩm b yaab rãmb rog-n-mika sẽn sãam to-to ye.

¹⁸Bɛɛba teega b zab-teedo la b gãndalsem la tõnd teega Wẽnde, Dũni fãa Soaala, bãmb n tõe n lub nif kamsg pʋgẽ bala sẽn zabd-b ne tõnda fãa la dũni wã tõr menga.

¹⁹A sõdga sõngr niyns fãa b yaab rãmb sẽn paam Soaala Wẽnd nengẽ, a Senakerib wakatẽ, neb tus koabg la pis-nii la a nu n pa tãpẽ.

²⁰Babilon tẽn-peelmẽ zabr n waa n zĩnd ne Galat rãmba. Masedoan dãmba da sõngda Zʋɩf rãmba la bãmb tus a naasa waa n basa raoodo. Ne rẽ fãa Zʋɩf rãmba kell n tõoga neb tus pisi ne yĩngr sõngre, la b tõogr yɩɩ tõogr menga la b paama laog wʋsg n looge.

²¹A Zɩɩda goama kẽe a neba sũurẽ. A segl-b lame tɩ b sak kũum b buuda yĩnga la rog-n-mika ra sãam yĩnga. A weel-b-la sags a naase.

²²Sak fãa neb da yaa tusr la kobs-nu. A lʋɩɩsa a yao a ye sak fãa taoore. Da yaa a Simo, a Zozɛf, a Zonatã, n paas a menga.

²³A kõ-la a Elazar noor t'a karem sebr sõngo. Dẽ poore a wilg-b lame tɩ woto n na n yɩ b zabra kɛlenga: «Wẽnd la d Sõangda!» A lʋɩ-la a neba taoore tɩ b na seg a Nikanor.

²⁴Pãng-Soaba-Wẽnd sɩd kẽe bãmb tãpẽ, bɛɛb tus a wɛ n dʋʋge. Sẽn pogl-ba, sẽn fiuus b rãmb nus la karse yɩɩ wʋsgo tɩ sẽn kell-ba sẽege.

²⁵B sẽn da sui ligd ning n na n wa ra bãmbã, b sooga rẽ fãa. B riga bɛɛbã n zãage la b waa n leba b poorẽ tɩ vɩʋʋg paoog-b lame.

²⁶Ade vʋʋsga raar noor la b tʋlg n deege la rẽ yĩnga b pa tʋlg n pʋg b bɛɛba ye.

²⁷B sẽn wʋk bɛɛba zab-teed la b laog n sɛ, b sɩnga b kibsa la b ra tara Wẽnd kilsgu la b pẽgre tɩ b wogla b yõore, tɩ b yãenda b nimbãan-zoeer sẽn sig b zug wa saaga.

²⁸Vʋʋsga raar sẽn looge, b pʋɩɩ bɛɛba laog b sẽn wʋkã ne neb niyns sẽn dɩ-b bõne zabra wakato wala pʋg-kõapa, wala kɩɩb-bi la b kella bũmb b mens yĩnga.

²⁹Dẽ poore b naaga taab n pʋʋs Soaala tɩ b zooda ra le zãag ne b ye.

³⁰Zabr n waa n yik ne a Timote la a Bakidɛs. B kʋʋ sẽn ta tus pisi la b reega tãnsoben-tẽnse. B pʋɩɩ b sẽn deeg bɛɛba nengẽ sags a yiibu, n yãk a ye n pʋɩ ne taaba, n kees a ye n pʋɩ ne zabrã sẽn bõn b rãmba: pʋg-kõap la kɩɩb-bi la nin-kẽemse.

³¹B wʋka bɛɛba zab-teed gilli n bao zĩig n bĩng-ba.

³²B kʋ-la a Timote sẽn da bao b rãmb n gũnug a menga. Da yaa nin-wẽns sẽn nams Zʋɩf rãmbã al wʋsgo.

³³Kibs la b maan yã, b sẽn tõog bɛeba yĩnga la kibsa wakato b yõoga bugum neb niyns sẽn da yõog-b wẽnd dooga kʋɩlense n yaool n da bas n zoe n tɩ soond ne a Kalistɛn doog a ye pʋgã. Woto la b reeg b tʋʋm wẽnga keoore.

³⁴Kõb-wẽng meng la a Nikanor. Yẽ n da bool lɛɛbdb tusri tɩ b wa ra Zʋɩf rãmba.

³⁵Wẽnnaam kɩtame t'a paam yãnde la yaa yẽ sẽn da get b rãmb wa nin-yaalsã n ning a yãnde. A yeega a naama fut, n teem a menga, n zoet n kẽed weoogo wala yem-daoogo sẽn zoet n na n põse. A neba ra bas-a-la a ye. A zug yɩɩ noogo t'a paam n ta Antiyos la yẽ tãb-biisa ka põs ye, b paa zabrẽ zãnga.

³⁶Yẽnda sẽn da kãab Rom dãmbã t'a na koos Zerizalɛɛm Zʋɩf rãmbã n kõ-b ligdã, bãng-y tɩ yẽ n waa n saad n moone tɩ Zʋɩf rãmb tara Sõangda la b sẽn tũud b Sõangda noya yĩnga, ned ka tõe-b ye.