Read SEBR SÕNGO, 1998 Yaoolem 11 Bible Online

Yaoolem 11 - SEBR SÕNGO, 1998 bible

Yaoolem 11

¹Bɩ y nong Soaala y Wẽnnaam la y reeg la y tũ beoog sẽn vẽege, b noya la rog-n-miki la b sẽn gɩdg bũmb ninga bɩ yãmb me gɩdg y menga.

²Y kamba toog sẽn yãke, tɩ bãmb ka yãend y sẽn yãend ye, m tẽedame tɩ yãmb mii rũnna, vẽenega, Wẽnnaam, y Soaala, sẽn zãms-y. Y mi-la b ziiri, y mi-la b nug la b kang pãnga.

³[71†] Y mii wẽnd makr dãmb la tʋʋm-bãn niyns b sẽn tʋm Ezipt tẽnga ne Ezipt dĩma la a soolem dãmba la a tẽnga gilli.

⁴[72†] Y mii b sẽn maan bũmb ninga ne Ezipt tãb-biisi, ne a bilim-bilm, n kɩt tɩ Rudum Mogra koom dɩ-ba, b sẽn waa n yik y pʋgbo, la Soaala-Wẽnd menes-b-la zãnga n tãag rũnna.

⁵Y mii b sẽn maan-y bũmb ninga zĩ-peen-daagẽ wã n tãag y waoong tẽn-kãnga pʋga.

⁶[73†] Y mii b sẽn maan bũmb ning ne a Datã la a Abiram, a Rubẽ biig a Eliyab kamba. Tẽnga yaaga a noor n vel-ba, a Israyɛl sikẽ, bãmb ne b roto, ne b zak rãmba la neb niyns fãa sẽn da tar b zʋg wẽnga, n pʋgd-ba.

⁷Y yãenda y toore Soaala-Wẽnd tʋʋm bãna la tʋʋm bɛdã.

⁸Y na reeg zãnga noor ning m sẽn kõt-y rũnna wã, n paam daoodo n kẽ n deeg la y soog tẽngã,

⁹n paam yõ-wok zu-noogo, n vɩɩnd tẽng ning Soaala sẽn kãab tɩ b na rɩk-a n kõ y yaab rãmba ne b yagense, tẽng sẽn bund bĩisim la sɩɩdo.

¹⁰Y sẽn dabd n na n tɩ reeg tẽng ning n soogã, ka wẽnd y sẽn yi tẽng ningã, ka wẽnd Ezipt tẽng ye. Beelẽ bʋdb bʋtame n lɛɛg n kẽesd sẽbda koom, n kẽesd ko-sor-ko-sore, wala zẽed tɩɩse.

¹¹Y sẽn dabd n na n tɩ soog tẽng ninga pɩʋʋma ne tãms la bãado sẽn paamd tɩ saag zãgsd-b,

¹²tɩ Soaala-Wẽnd meng n get b yelle. Wakat buud fãa Wẽnnaam, y Soaala, nina pukame n get-a, yʋʋmda sɩngre n tãag a baasgo.

¹³Y sã sɩd deegd noya yãmb Wẽnnaama sẽn kõt yãmb rũnna wã, y sã n nong Wẽnnaam la y tũud-b ne y sũur fãa, ne y yalẽ fãa,

¹⁴m na sik, Bul kiuugã, kiuug a nii soaba, saag wala y pʋta sẽn date. A na n nii sẽoogo n ta sɩpalgo, tɩ kood zĩndi, tɩ rãam la kaam da paoog ye.

¹⁵Y rũms na tɩg yamd bãoogẽ, y mens na rɩ n tɩge, y zagsẽ.

¹⁶Da bas-y tɩ bũmb yamleoog wa yõk-y tɩ y bʋdg sore, n pʋgd wẽn-naands la y saag n wõgemd b taoor ye.

¹⁷[74†] Y maan dẽ, Wẽnnaam na puug b sũur ne yã tɩ b pag saaga ko-nini tɩ koom da le tosg ye, tɩ tẽnga me ra le wom biig ye, tɩ y menem tao-tao Soaala-Wẽnd sẽn kõt-y tẽn-noog ninga pʋgẽ.

¹⁸M sẽn kõt-y koees niynsã y na ning-b y sũurẽ, y na gʋls bũmb n loe y nugẽ la y tabendg y rĩirẽ, y nina yiiba sʋka.

¹⁹Zãms-y-ba y kamba, y zĩ y zakẽ, bɩ y togd sore, y gãe tẽng bɩ y kẽnd yĩngri.

²⁰[75†] Gʋls-y-ba y rignoorẽ, y tẽns kʋɩlens rĩirẽ.

²¹Sã n ya boto, tẽnga sã n ket saaga tẽngr fãa, yãmb me ne y kamba na kaoos tẽnga pʋga, Soaala-Wẽnd sẽn kãab-y tẽng ninga pʋga.

²²Y sã n sɩd deeg m sẽn kõt-y noor ningã, y sã n nong Wẽnnaam y Soaala n tũud b sore, n dɩk y yɛlã n bas ne bãmba,

²³Wẽnnaam na n deega tẽns n kõ yãmba la tẽn-bãmb neba yɩɩda yãmb ne sõor la pãnga.

²⁴Y naoor sẽn tabg zĩig ning fãa yaa yãmb soolem. Zĩ-peen-daaga la Libã, Efrat kʋɩlg n tãag Tẽnsʋk mogre, dẽ fãa na n yɩ-la y soolem.

²⁵[76†] Buud ba a ye kõn yaas y taoor ye. Soaala na n kẽesa rabeem la rigbu tẽng ning fãa y naoor sẽn na n tabge, wala b sẽn kãabã.

²⁶Ade, bũmb a yiib la m yals y taoor tɩ y yãke: kãab-nood la kãab-beedo.

²⁷Y sã n deeg Wẽnnaam, y Soaala, noor m sẽn wilg yãmb dũnna wã, yaa bark la y na n paame.

²⁸Yaa kãab beedo la m kãabd-y, y sã n pa reeg Wẽnnaam, y Soaala, noore n bʋdg sor ning m sẽn wilgd yãmb dũnna la y pʋg wẽnd-dãmb y sẽn da ka mi.

²⁹ [77†] Y Soaala-Wẽnnaam sã n wa kẽes-y tẽng ning b sẽn na n kõ-y tɩ y sooga pʋgẽ, y na n zĩnda Garizim tãnga zug n kãab kãab-noodo, la y zĩnd Ebal tãnga zug n kãab kãab-beedo.

³⁰(Ad-y tãms kãens pɩʋʋgda so-kõodrã, n dʋʋg Zʋrdẽ, n tat Kanaã rãmb tẽnga, nin-taoore, More kʋgsa taoore, Gilgal yegende.)

³¹Zʋrdẽ kʋɩlga la y na n dʋʋg n yaool n ta tẽng ning y Wẽnnaama sẽn kõt-y tɩ y soogã. A na n sɩd lebga y soolem la y na n tila y zags be.

³²Modg-y n tũ noya la rog-n-mikã m sẽn kõt-y rũnna wã.