Read SEBR SÕNGO, 1998 Yaoolem 14 Bible Online

Yaoolem 14 - SEBR SÕNGO, 1998 bible

Yaoolem 14

¹ [82†] Yãmb yaa y Soaala-Wẽnda kamba. Dɩlla da bog-y y yĩns ye, da kõog-y y rĩiri, y ned sã n ki ye.

²[83†] Yãmb buuda yaa Wẽnd soolem, ya yãmb la Soaala yãk yã tɩ y na n yɩ buudu sẽn lebg b meng pʋɩɩr sõngo buud a taaba fãa sẽn be tẽng zuga sʋka.

³Da rɩ sẽn kis ye.

⁴Ad-y sẽn tõe n wãb rũms niynsi: naafo, pe-bila, bulla,

⁵yãka, yĩsri, walga, beoko, wilpeoolgo, sɩbga, monfo.

⁶Y tõe n wãba rũng ning fãa nao-beong sẽn welg a yi la sẽn bʋgsd yamdo.

⁷Rũms kẽer n be n tar nao-beond sẽn welg a yi la rẽ ka sek ye, dẽnd b naag n bʋgsd yamdo tɩ y yaool marsã n ges-b wa rũng y sẽn tõe n wãbe. Woto d tog n gesa wa rũng d sẽn ka tõe n wãbe: yʋgemde, soaamba, marwara; bãmb bʋgsda yamdo, yaa sɩda, la b nao-beong ka welg a yi ye.

⁸Sã n ya kurkuri, a nao-beong welga a yi la a ka bʋgsd yamd ye. Ges-y rũms a woto buud wa rũm-dẽgdo; b nemd pa wãbde, b kɩɩng me pa sɩɩsde.

⁹Sã n ya koomẽ dũmsã, ad-y sẽn tõe n wãb b rãmba: yaa rũng fãa sẽn tar legbre la pagdo. Y tõe n dɩɩ bãmba.

¹⁰Sẽn ka tar b legbre la pagdo, y kõn dɩ bãmb ye, b yaa rẽgdo.

¹¹Y tõe n wãba luiil fãa wãbr sẽn ka tar yelle.

¹²Ad-y sẽn ka na n wãb b rãmba: pa-nand-tugri, sɩlga, mayaalle,

¹³wɩbga, yɩbrgo, bõan-pog-wɩbg buud fãa,

¹⁴gãabd buud fãa,

¹⁵na-neoongo, viuugu, ka-ra-la-m-zomda, kosenkond buud fãa,

¹⁶viuug-luiila, kos-ki, faoogo,

¹⁷salsanga, yɩbr-pɛɛlga, koom-daoogo,

¹⁸nok-naaba, raong buud fãa, bulwãoogo, zãnga.

¹⁹Bõn-yɩgd bõonesa buud fãa yaa bõn-dẽgdo, da wãb-y-b ye.

²⁰Luiil fãa sẽn tar pɩgsa t'a wãbr ka kɩsa, y tõe n wãb-a lame.

²¹ [84†] Rũng sẽn ki woto wãbr kisame, dɩk-a n kõ sãan sẽn naag foom n kẽed f tẽngẽ, yẽ tõee n wãb-a lame bɩ a tõee n dɩk-a lame n koose ne sẽn ya-b sãamb wa yẽ, la fo ka tõe ye, tɩ Wẽnd welga fo buuda toore. Da rʋg bull ne a ma bĩisim ye.

²²Yʋʋmd-yʋʋmd fãa f na pʋɩ f sẽn bʋde la sẽn ko n paam, zĩis piig-piiga.

²³Piig zugu, f tallda pʋɩɩr a ye n wa rɩ Wẽnnaam f Soaala taoore tẽng ning b sẽn yãk tɩ yaa b belem la b waoogr zĩigã. F wata ne alkam, ne f yʋʋmda rãam la kaam, ne rũng fãa pipi biiga, rũms bɛda wala rũms bõonese. Woto la f na n zãms Wẽnnaam nif zoeere, beoog sẽn vẽeg fãa.

²⁴Sora sã n ya wok wʋsgo tɩ kũuna zã n kẽnga ya toogo, f sã n zãr ne tẽng ning f Wẽnnaam, f Soaala, sẽn yãk tɩ ya b waoogr zĩigã, la Soaala kũuna yaool n ka zem-zem ye,

²⁵ad-f tekda ne ligdi la yaa ligda la f na n tall n wa f Soaala-Wẽnnaama waoogr zĩigẽ.

²⁶Beelẽ f rɩkda ligdã n da f sẽn dat bũmb ninga: rũm-bɛd bɩ rũms bõonese, rãam, toose, f yam sẽn kẽ bũmb ning fãa. Foo ne f zak-rãmb rɩtame la y yũ, la y noog y sũur, Wẽnnaam, y Soaala, taoore.

²⁷Da rɩ n bas Levitga sẽn be f tẽngẽ n yaool n ka tar pʋɩɩr a ba raboogẽ ye.

²⁸Yʋʋmd a tãab-tãabo, f piig-piig pʋɩɩra, f yãkda yʋʋmd kãng rẽnna n paalg f tẽngẽ.

²⁹[85†] Woto Levitga sẽn ka tar pʋɩɩr a ba raboogẽ, sãana, kɩɩba, pʋg-kõore sẽn be f tẽngẽ, na yũ la b rɩ n tɩge la Wẽnnaam, f Soaala, me na tũ rẽ n ning f tʋʋm buud fãa barka.