Read SEBR SÕNGO, 1998 Yaoolem 21 Bible Online

Yaoolem 21 - SEBR SÕNGO, 1998 bible

Yaoolem 21

¹Wẽnnaam, f Soaala, sẽn dɩk tẽng ning n kõ-f tɩ f sooga pʋgẽ, fo sã n kẽnd n wa mik tɩ ned ki n dɩg pʋʋgẽ la f ka mi sẽn ya ned ninga n wẽ-a n kʋ,

²yiis nin-kẽemsã la bʋ-kaoodba tɩ b mag tẽnsa sẽn gũbgã zãrem ne kũuma.

³B na bãng sẽn ya tẽng ning n pẽ ne kũuma rɩgr n yɩɩda. Dẽ marsã la tẽng ninga sẽn pẽ-a wã nin-kẽems na n yi ne nag-sɛdg sẽn nan ka mi tʋʋmde, sẽn nan ka sog wãk ye.

⁴B talda nag-sɛdgã n dig koom sẽn zoetẽ, la be ka bʋde, ka ko n yegl ye. B kẽeda kooma ne nag-sɛdgã n wẽ a kãarã n weke.

⁵Dẽ poore, maan-kʋʋdba, a Levi kamba, kolgdame tɩ yaa bãmb la Wẽnnaam, f Soaala, yãk tɩ b kʋ maand la b ning bark b zĩigẽ, la b welg yɛla la b sɛɛs no-koɛɛm, sãmpogr poorẽ.

⁶Tẽnga nin-kẽems sẽn kolg-b kũuma lebda kʋɩlga sẽn zoet n watẽ wã, naafa zugẽ, n zãag bilf ne naafã, n pek b nusi.

⁷Dẽ poore b yeta woto: ‹D nug ka raag zɩɩm ye, d nif ka yãend zɩɩma raagd ye,

⁸Soaala, kõ-y y buuda Israyɛl sugri la zãag-y tẽnga ne nin-sõng zɩɩm bolbo.› Yaa woto la buuda paamd zɩɩma raagra sugri.

⁹Bɩ y gũus ne ned sẽn ka beeg zɩɩm daagre, modg-y n kẽn tɩrga Soaala taoore.

¹⁰F sã n kẽng zabre tɩ Soaala rɩk f bɛɛbã n sagl f nugẽ tɩ f yõg-b n pag roogo,

¹¹la fo yãenda bãmb sʋka bi-pugl sẽn ta f yam tɩ f rat n kẽ kãadem ne-a,

¹²f boond-a-la f zakẽ. A põngda a zugu, n wõrs a nug-yẽese,

¹³a yeegda tãb-biisa sẽn yiis-a a ba zakẽ ne fut niynsã, la a paada f zakẽ. Kiuug tõre, a yãbda a ba la a ma. Dẽ poor marsã la f peegd-a t'a lebg f kãadem paga.

¹⁴Sã n seg tɩ y yama yii ne taaba f basd-a lame t'a loog a yam. F ka tõe n koos-a n paam ligd ye, f ka tõe n zã-a toog ye, t'a yɩ-la f paga.

¹⁵Rao sã n tar pagb a yiibu, n nong a ye n kis a ye, la b yiiba fãa roga a biiga, la yaa a sẽn ka nong pag ninga biiga n ya kẽema,

¹⁶a sã n yet t'a na n welga a raboogo, a ka tõe n dɩk kãsengã n kõ a sẽn nong pag ninga biiga la yaool n ya a sẽn ka nong pag ning biiga la kãsem ye.

¹⁷A tog n gesa a sẽn pa nong pag ninga biiga wa kãsma t'a pʋɩɩr yɩɩg a to wã rẽnd naoor a yiibu. Yẽ la pipi biiga, a reegda a kãsengã sẽn tog ne pʋɩɩr ninga.

¹⁸Ned sã n tar a biiga t'a wa lebg kɩɩsa la tõtre, yẽ n ka kelgd a ba, n ka kelgd a ma, b sã n sagend-a,

¹⁹bɩ a ba la a ma tall-a n wa tẽnga nin-kẽems taoor, tẽnga noore.

²⁰B na n yeela nin-kẽemsã: ‹Woto yaa tõnd biiga, a yaa kɩɩsa la tõtre, a ka kelgd tõndo, la a yaa rɩ-rɩt la rã-yũuda.›

²¹Tẽnga rãmb labd-a-la ne kug n kʋ. Woto f kõn bas wẽng f tẽngẽ n ka yiis-a ye. Israyɛl zãng na n wʋmame tɩ rabeem yõk-a.

²²Ned sã n maan wẽnga tɩ b tog n kʋ-a la yaa tɩɩg la b luul-a n kʋ,

²³[113†] b ka basd-a tɩɩga zug tɩ beoog vẽeg ye, b mumd-a la baraare; Wẽnd yãka sẽn luul-a fãa barka. Da saag n dẽgem tẽng ning Wẽnnaam, f Soaala, sẽn kõt-f tɩ f sooga ye.