Read SEBR SÕNGO, 1998 Yaoolem 25 Bible Online

Yaoolem 25 - SEBR SÕNGO, 1998 bible

Yaoolem 25

¹Neb sã n wẽed no-koeemd ne taaba, b kẽng bʋʋdo. Sẽn ka a bʋʋm kongda bʋʋm, sẽn tara bʋʋm deegda a bʋʋm.

²Sẽn ka tara bʋʋma sã n tog ne pãbre, bʋ-kaooda kɩtdame tɩ b gãneg-a, yẽ taoore, n pãb-a n zems a beegra sẽn tog ne.

³[135†] Pãbra yaa kaas pis-naase la ka loogd dẽ ye. Ka rẽ b tõe n wa pogl-a lame bɩ n wa mams-a ne rũnga.

⁴ [136†] Naaf sẽn tabd ki zɛɛgẽ noor ka ningd yʋk ye.

⁵Ba-biis a yiib sã n kẽed zak a ye, t'a ye wa ki n ka rog biig ye, sẽn ki-a wã paga ka tõe n yɩ ned a to paga, sã n ka a sɩda rooga ned ye. A sɩda ba-biiga n peegd-a n maan a paga.

⁶[137†] Pipi biigã, paga sẽn na n dogã, na n lebga kiida biiga t'a yʋʋr da menem Israyɛl ye.

⁷La raoã sã n pa rat n kẽ ne a ba-biig paga, paga babsda nin-kẽemsã tẽnga noor n yeel-ba: ‹M sɩda ba-biiga zãgsame t'a kõn peeg maam n dog-biig n kõ m pipi sɩdã t'a yʋʋr da wa menem Israyɛl tẽn-peelmẽ ye.›

⁸Nin-kẽemsa boonda ba-biigã n sagl-a. Ba-biiga sã n yeele: ‹M ka rat n kẽ kãadem ne a ye,›

⁹nin-kẽemsa taoore, paga kolgda a sɩda ba-biiga, n zõond n pidg a neodr a ye la a tʋbs a nenga kolkoodo n yetẽ: ‹Yaa woto la b maan ne rao ninga sẽn pa rat n le yik a ba-biig raboogo!›

¹⁰[138†] A Israyɛl tẽn-peelmẽ marsã, b na n boola yẽ zaka t'a neood-yɛng zaka.

¹¹Ned ne a saam-biig sã n sog taaba tɩ bãmb nin-yend pag kolg n na n sõng a sɩda n gãd zabd-n-taaga kur-wĩiri,

¹²b fiuugda paga nugu. B kõn zoe a nimbãaneg ye.

¹³Da sui f korgẽ zɩslem magds a yiibu, bedre la bilfri n yaool n tar-ba n magd wa b zema taab ye.

¹⁴Peta sẽn tar n magda me ra yɩ b yiib f zakẽ, bedre la bilfr ye.

¹⁵Zɩslma magdsa ka paasde, ka woogde, petã me yalem la b zulum ka woogde, ka paasde. Woto me la f yõor na n yɩ wok Wẽnnaam f Soaala sẽn kẽesd-f tẽng ninga pʋgẽ.

¹⁶[139†] Ned ning fãa magb sẽn ka zemse, ned ning fãa sẽn maand zãmbo, yaa yẽ la Wẽnnaam, f Soaala, kis wa fãa fãa.

¹⁷Tẽeg, Israyɛl, a Amalɛk sẽn maan-f bũmb ninga f sora zugu, f sẽn waa n yi Ezipt tẽnga.

¹⁸Tẽeg tɩ yẽ n yi n yek-f sorẽ, f sẽn waa n yɛ zãng fas la f kiid kom, n kʋ f neb niyns fãa sẽn da pa poorẽ. Sɩda a ka zoe Soaala-Wẽnd nif ye.

¹⁹[140†] Woto wã, Wẽnnaam, f Soaala, sã n wa kɩt tɩ f tɩlg ne f bɛɛba sɩ-lakre, n kõ-f vʋʋsem, f tẽngẽ, tẽng ning Wẽnnaam, f Soaala, sẽn kõt-f tɩ f soogã, f na yẽes Amalɛk rãmb yʋʋr saaga tẽngre. Da yĩm ye!