Read SEBR SÕNGO, 1998 Yaoolem 26 Bible Online

Yaoolem 26 - SEBR SÕNGO, 1998 bible

Yaoolem 26

¹F sã n wa kẽ tẽng ning Wẽnnaam, f Soaala, sẽn kõt-f tɩ f sooge, f sã n wa me be n kẽedẽ,

²[141†] la tẽnga sã n wa wom a biisã, f na yãk Soaala pʋɩɩr f kood rẽemsa fãa pʋgẽ. F ningd-b-la peoog pʋga n tall n kẽng tẽng ning Wẽnnaam f Soaala sẽn yãk b waoogr zĩigã.

³F tʋgd n yãenda maan-kʋʋd ning sẽn so-a tʋʋmda wakat kãngã la f na n yeel-a lame: ‹Dũnna m wilgda Wẽnnaam, m Soaala, tɩ m kẽe tẽng ning b sẽn da kãab d yaab rãmba tɩ b na n kõ-a-la tõndã.›

⁴Maan-kʋʋda reegda peoogã a nugẽ n dɩgl-a Wẽnnaam, f Soaala, maan-kugra taoore.

⁵Wẽnnaam, f Soaala, taoore, f na n yeela woto: ‹M ba sɩnga gilung Aram tẽnga, n wa sig Ezipt tẽnga, beelẽ a vɩɩnda wa sãana ne a kamba sẽn da ya neb a wãn bala. Yaool n yaa be la a wa n lebg bu-yalengo la buud sẽn tar pãnga,

⁶la Ezipt rãmba nams-d lame, n kẽes-d naongo, n kẽes-d yembd sẽn yɩ toaaga.

⁷Dẽ me la tõnd kelem Wẽnde, d yaab rãmba Wẽnde la b wʋma d koɛɛga, b yãendame tɩ d lebga naong rãmba, nimbãan-dãmba la yemse.

⁸Soaala wilga b nug pãnga, n wilg b kang keglem, n maan bõn-bãna, n tʋm tʋʋm bɛd sẽn wa ne yɛɛsgo n paam n yiis tõnd Ezipt tẽnga.

⁹B sõng-d lame tɩ d ta ka, tɩ b kõ-d tẽng sẽn bund bĩisim la sɩɩdo.

¹⁰La ade, Soaala, m wata ne y sẽn kõ-m tẽng ninga kood rẽemse.› F rɩgenda peoogã Wẽnnaam, f Soaala, taoore, la f wõgemde.

¹¹La Wẽnnaam, f Soaala, sẽn pids sũ-noogo, foo la f zak rãmba, f na kɩdem n lang ne Levitga la sãan sẽn be ne foo.

¹² [142†] Yʋʋmd a tãab-tãab fãa yaa kooda la paoonga yãgsg yʋʋmde. F na pʋɩ f kooda fãa n yãk pʋɩɩr a ye piig zugu n kõ tẽnga Levitga, sãana, kɩɩba la pʋg-kõore tɩ b rɩ n tɩge,

¹³ad-f sẽn na yeel bũmb ning f Soaala la f Wẽnnaam: ‹M pʋɩ-la m paoongo n yãk pʋɩɩr sõngã n kõ Levitga, sãana, kɩɩba la pʋg-kõore wala y sẽn wilg-ma zãnga, m deegame la m tũume.

¹⁴M sẽn waa n dɩt m ned sẽn ki kʋʋre n pa yãk fɩ be ye, m sẽn wa n ya rẽgdo, ka paoong kãng pʋg la m kẽ n yãk n tũnug m kosg ye, ka be la m yãk wẽn-kosgo, ned sẽn ki yĩng ye. M kelga Wẽnnaam, m Soaala, koɛɛga, m deega b noora gilli.

¹⁵Zĩnd-y yĩngr do-sõnga pʋga, zĩnd-y saasa zut n sudg y barka y biig a Israyɛl zugu la y sudg-a tẽng ning y sẽn kãab d yaab rãmba, tẽng sẽn bund bĩisim la sɩɩdo.›

¹⁶Dũnna, Wẽnnaam, f Soaala, kot-f lame tɩ f reeg la f tũ noorã la rog-n-mikã. Reeg-b la f tũ ne f sũur fãa, ne f yalẽ fãa.

¹⁷Fo paama rũnna, Israyɛl, tɩ Soaala meng pʋlem tɩ b na yɩɩ f Wẽnde, f sã n maand b sẽn date, f sã n deegd b noya, n tũud sora la rog-n-mikã.

¹⁸[143†] Soaala me kɩtame tɩ fo yiis f noorẽ dũnna tɩ fo lebga b buudu, b meng pʋɩɩre, wala b sẽn kãab-fo, la f na n deega b noya fãa.

¹⁹Bãng tɩ sẽn ya woto wã, foo n na n zʋʋg buud a taaba fãa b sẽn naana, ne waoore, la yʋ-noogo la ziiri, foo n na n lebg buud b sẽn welg toore, b meng yĩnga, wala b sẽn kãabe.»