Read SEBR SÕNGO, 1998 Yaoolem 33 Bible Online

Yaoolem 33 - SEBR SÕNGO, 1998 bible

Yaoolem 33

¹Woto la a Moyiiz, Wẽnnaam neda, ning Israyɛl kamba barka n yaool n na n tɩ sak a saam-dãmba.

²A yeelame: Soaala yii Sinayi, wala wĩndga, b puka Seyir sẽnẽ, Parã tãnga zugu, b yãnga b vẽenem n tees b buudu b waa n siga b neba sʋka, sẽn yãagd-b yaa kõn-bãng-n-sõde; b Noora sebr la b ra zãada, sebra ra yãgda ne neerem.

³Soaala nonga a Israyɛl, Soaala kogenda b buudu, la b buuda me tigma b sɛɛgẽ n na n deeg b saglse.

⁴A Moyiiz sẽn kõ noor ningã, a Zakoob yagensa sãnem la rẽnna, a Israyɛl arzɛk la rẽnna.

⁵A-tog-ne-kãsengo reega a Soaala, bãmb la a neba yi n na n sege, a rĩm-biis wala a talse.

⁶A Moyiiz barka yɩɩ woto: Wẽnd na kaoos a Rubẽ, a kõn ki ye; Wẽnd na yalg a rooga sẽn ka zem fɩ wã.

⁷Ad-a sẽn yeel a Zɩɩda yĩnga: Soaala, kelg yã a Zɩɩda koɛɛga, sõng-y t'a kamba le wʋm taaba. B yikame la b wɩsga b menga, Sõng-y-b tɩ rig b bɛɛba.

⁸ [178†] Ad-a sẽn yeel a Levi yĩnga: Soaala, a Levi kamba zãada b nusẽ y sẽn dat tɩ b sok-y ne tentees ninsã n bãng y leokra yaa n-yẽ bɩ ayoo, la yaa bãmb la y sẽn fɛɛs Masa, bãmb yɛs la y sẽn fɛɛs Meriba.

⁹Ad-y b wilgame tɩ b nonga yãmba n yɩɩd b pagb la b kamba, n yɩɩd b saam-biisi, n yɩɩd b roagdba; dẽ me la b reeg y noore, n ka sak zooda sãoong ye.

¹⁰Bãmb n zãmsd a Zakoob y rog-n-mikã n zãmsd y noya a Israyɛl, bãmb n kʋʋd yũ-nooga maoong bãmb n wat ne kũuna maan-kugra zugu.

¹¹Soaala, paas-y a Levi sũ-keelma, ning-y bark a nus tʋʋma fãa, kao-y yã a zabd-n-taasa sĩ, zõneg-y yã a bɛɛba po-raoogo.

¹²Ad-a Moyiiz sẽn yeel a Bẽnzame poorẽ: Yẽ la Soaala bi-nongre n zĩ n pemsd ne laafi t'a sẽn teeg a soaba gũud-a-la raar fãa, la a vʋʋsda a bãgd zugu.

¹³Ad-a sẽn yeel a Zozɛf: Wẽnd na ning a soolma barka! A paam saase, Wẽnd kũun sõngã, n paam ko-bunem,

¹⁴n paam wĩndga sẽn bɩɩsd bũmb fãa, n paam kiuug fãa sẽn wat ne a soaba, a wakato;

¹⁵n paam tãmsa sẽn kõt bũmb ningã, n paam kunkuba sẽn pʋɩt bũmb ningã,

¹⁶n paam bõn-sõng fãa tẽnga sẽn womde, n paam tuuga sẽn wit bugma soab zoodo. Dẽ fãa yɩ a naam zug-peoogo, dẽ fãa yɩ a rĩir fan teedo, Soaala sẽn welg a soab toorã fan teedo.

¹⁷A paam barka t'a yaa loalg sẽn tar pãnga a yɩɩla yaa we-naaf yɩɩla, bãmb la a tar n tãada, n tãad yaang la nin-taoore, goabg la rɩtg rãmba. Ad-a Efrayim tãb-biis sẽn tonge ad-a Manase rẽnd sẽn ka tõe n sõde.

¹⁸Ad-a Moyiiz sẽn yeel a Zabulõ poorẽ, n yeel a Isakar poorẽ: Noog f sũuri Zabulõ, f sã n tond f tolbo, la foo, Isakar noog f sũur f gãagẽ.

¹⁹B tigimda buuda tãnga zugu n na n kʋ b waoogr maando. Bãmb n vuud mogra yõodo bãmb n so laoga sẽn bus bĩisrẽ.

²⁰Ad-a sẽn yeel a Gad poorẽ: Sẽn sõnga a Gad t'a zãad fãa wã paam barka! A wũunda wa bõnyẽega, n yĩid a rũng bãoko, n wekd a rũng zugu.

²¹Yẽ n yɩ pipi n deeg a pʋɩɩre, la yaa pʋɩɩr sẽn tog ne dĩma la a ra rata. A lʋɩ buuda taoore n zab wa Wẽnd sẽn sagl-a la Wẽnd pidsa b sẽn kaool fãa ne a Israyɛl.

²²Ad-a Moyiiz sẽn yeel a Dã poorẽ: A Dã yaa bõnyẽ-bila, la yaa Bazã la a sigd n watẽ.

²³Ad-a sẽn yeel a Neftali poorẽ: B pidsa a Neftali ne kũuni, Wẽnnaam pids-a-la ne bark buud fãa; a soog nin-taoore la nug rɩtgo.

²⁴Ad-a sẽn yeel a Asɛr poorẽ: Bɩ a Asɛr paam barka n yɩɩg a taaba, a pʋɩɩr zʋʋg a taab rẽnna, bɩ a nao mad ne tɩgr kaam;

²⁵t'a kʋɩlens sog ne kutu, t'a pa a zakẽ ne laafi n tãag a loogre!

²⁶Ad-a Moyiiz sẽn le paase: Ned ka be n wẽnd Wẽnnaam ye, n sõngd foo wa bãmb ye, Tog-ne-kãsengo. B zao saasa la sawatã n wat f sõngre ne b pãnga.

²⁷Sẽn yaa Wẽnd dũnna la beoogã la f na n soonde, b nug tara b tʋʋm n ka mi vʋʋsg ye, f bɛɛba la b rigd f taoore la b yetame: ki-y zãnga!

²⁸Dẽ me la a Israyɛl zĩ t'a sũur pa kiuusdẽ ye. A Zakoob kʋɩlga naoor teesa toore, a teesa alkam la rã-paalg tẽnga, yĩngr meenema sẽn da zoe n bʋkd tẽng ningã.

²⁹Foo la zu-noog soaba, Israyɛl! Soaala sẽn sõngd b buudã, ãnda n wẽnd foo? Bãmb gãong n ligind f bɛɛba pɛɛm, bãmb sʋʋg n kõt foom f pãnga. F bɛɛba rat bɩ b wags taab ne sudum f naoor na tabg b tẽnsa sẽn zao yĩngrã.