Read SEBR SÕNGO, 1998 Yaoolem 4 Bible Online

Yaoolem 4 - SEBR SÕNGO, 1998 bible

Yaoolem 4

¹Kelg marsã, Israyɛl, noy niyns y sẽn na tũ zamaan ne zamaana. M meng m toor n na zãms-y tɩ y reeg-ba, la woto y na vɩɩnd la y tɩ kẽ tẽng ning y yaab rãmb Wẽnda sẽn kõt-y.

²[22†] M sẽn kõt-y noy-niynsã, gũus-y tɩ gomd da paas ye. Gũus-y me tɩ bũmb da yiis ye tɩ woto la y na n tũ d Soaala-Wẽnnaama raabo.

³ [23†] Y nif yãenda Naaba-Wẽnd sẽn maan bũmb ning Baal-Peor. Neb niyns fãa sẽn pʋg-b Peor Baal, ad-y Wẽnnaam, y Soaala, yiisa b fãa nin-vɩɩs sʋka.

⁴Y sẽn ket n vɩ rũnna wã, yaa y fãa sẽn tũ tõnd Wẽndã.

⁵Noy niyns y sẽn na n deeg zamaan woo zamaana, m wilgd-b-la yãmb wala Wẽnnaam, m Soaala, sẽn yet tɩ m wilg yã. Reeg-y la y tũ-ba tẽng ning y sẽn dabd n na n tɩ sooga pʋgẽ.

⁶Reeg-y noya, tũ-y-ba. Woto buud a taaba sã n wa bãng y sẽn tũud noy niynsã b na ges-y wa neb sẽn tar yam la sẽn mi vɩɩm, b na yeele: ‹Sɩlem la yam bala la buud kãseng kãnga pidi n yɛsẽ!›

⁷La sɩda, baobg bʋg la bu-kãseng a woto buud be, n tar a wẽnd dãmb sẽn pẽnegd-a wala tõnd Wẽnnaam sẽn pẽnegd tõnd wakat ning fãa d sẽn boond-ba?

⁸D yãeta bu-kãseng yɛ t'a noya la a rog-n-mik tũud soy tɩrse wala m sẽn kõt yãmb b rãmb rũnda wã?

⁹Maan-y gũusgu ne y mense, gũus-y n da yĩm y sẽn yãend y vɩɩma fãa pʋgẽ ye, bũmb da yi y pʋ-tẽerẽ ye, togs-y-ba y kamb la y yagense.

¹⁰Israyɛl, fo ra yɛsa yĩngri, Wẽnnaam y Soaala taoore, Oreb tãnga sɛɛga, raar ning Soaala sẽn yeel-ma: ‹Tigim nebã m taoore tɩ m gom ne-ba n zãms-b tɩ b zoe m nifu, b vɩɩm tɛka, la b me zãms-a b kamba.›

¹¹Baraare y sɩd kolgame, y yalsa yĩngr, tãnga sɛɛga. Tãnga ra wita bugum. Bugma ra pãrga sawad tagdã la yʋnga likã, n tãoos n kul yĩngri.

¹²[24†] Soaala-Wẽnd zĩnda bugma sʋka n gom ne yã. Koɛɛg n da sãte, y ra wʋmda koɛɛgã la y ra ka mi a sẽn yitẽ ye. Koɛɛga bal la y ra wʋmda.

¹³[25†] B taas-y-la b zooda koeese, yaa noya piigã b sẽn yet tɩ y reeg la y tũ la b gʋls-b-la kug wals a yiib zugu.

¹⁴[26†] Sã n ya maam, Soaala yeel-m lame tɩ m zãms-y noya y sẽn na n tũ wakat buud fãa tẽng ning y sẽn dabd n na tɩ reeg n soogã.

¹⁵Maan-y gũusgu! Tẽeg-y tɩ Oreb tãnga zugu, Soaala-Wẽnd zĩnda bugum pʋgẽ n gom ne yãmba la badaare y ka yãend bũmb sẽn tar wẽnd yalẽ ye.

¹⁶[27†] Da sak-y yel-beedã n kõ y meng wẽn-naands ye. Da mams-y bũmb wẽnego n lɛɛg n yeel tɩ bõn-kãng la yãmb wẽnd ye. Da yɩ paga, da yɩ rao wẽneg ye.

¹⁷Da yɩ tẽng zug rũng ba a ye wẽneg ye, da yɩ yĩngr luiil ba a ye wẽneg ye.

¹⁸[28†] Da yɩ rũng kɩdg sẽn vuud tẽng buud ba a ye wẽneg ye, da yɩ zĩif sẽn dugd koomẽ buud ba a ye wẽneg ye.

¹⁹Da saag-y n ges yĩngri, n ges wĩntoogo, kiuugu, ãdse, bũmb ning fãa sẽn yãgd yĩngri la y lɛɛg n bas tɩ b belg yã tɩ y wõgemd b taoore n yɩ b sõgen ye. Wẽnnaam, y Soaala, basa manes kãens ne dũni wã ninsaalb a taaba.

²⁰[29†] Sã n ya yãmba, y Wẽnnaam, y Soaala, kɩtame tɩ y yi Ezipt tẽnga, b yiisa yãmb bug-toalgẽ, bug-toagl sẽn yẽnegd kut menga, n dɩk-y n maan b buudu la b pʋɩɩre, wala y sẽn yaa a soab rũnna wã.

²¹ [30†] Yãmb yĩnga, Wẽnnaam puuga b sũur ne maam n tol n kãab-m tɩ m kõn dʋʋg Zʋrdẽ kʋɩlgã la m kõn kẽ tẽn-noog ning y Soaala sẽn kõt-y t'a yɩ y soolma ye.

²²M na kii ka, n ka rʋʋg Zʋrdẽ ye. Yãmb yẽ na rʋʋg kʋɩlgã n tɩ reeg y tẽn-noogã n kẽ.

²³Gũus-y n da yĩm tɩ Wẽnnaam, y Soaala, yõga zood ne yãmb ye. Gũus-y n da maan sẽn kis wa fãa fãa n bao wẽneg n kõ bũmbu n yet tɩ yẽ la y wẽnd ye.

²⁴[31†] Bãng-y tɩ Wẽnnaam, y Soaala, yaa bug vɛlga sẽn ka mi rɩ n kees ye la bãmb b ye tãa la yãmb Wẽnnaam la b kõn sak paoogre ye.

²⁵Y sã n wa paam n kaoos y tẽngẽ wã bilfu, y sã n wa rog kamba, n dog yagense, y sã n wa kʋʋl tẽnga pʋga, y sã n wa yaale n bao bũmb wẽneg n pees, bɩ n dõoge, n yet tɩ yẽ la y wẽnde, y wẽnd y sẽn pees bɩ y sẽn dõoge, a sẽn yaa a soab fãa, ad-y y maana bũmb sẽn ya wẽng, Wẽnnaam y Soaala nifẽ, n paoog-ba.

²⁶La ad-m boonda tẽnga la saagã tɩ b yɩ m kaseto tɩ b na n menes-y-la zãnga la kõn kaoose, y sẽn dabd tẽng ning n na n tɩ reeg n soog, Zʋrdẽ rʋʋndã. Sɩda y kõn kaoos be ye, b na n sɛɛs-y-la zãnga.

²⁷Soaala-Wẽnd na n sẽeg-y-la buud a taaba sʋka, buuda wat n keesa bilfr bala Wẽnd sẽn na n kẽes-y tẽng ninga pʋgẽ.

²⁸[32†] Beelẽ, yaa ninsaal sẽn naan la y na n waooge, bũmb sẽn pees ne raoogo, ne kugri, bũmb sẽn ka ne, n ka wʋmde, n ka rɩte, n ka kokd yũug ye.

²⁹[33†] Y wat n yikame marsã n baood Wẽnnaam, y Soaala. Y na yãend-ba y sã n sɩd baood-b-la ne y sũuri, ne y yalẽ wã fãa.

³⁰Yell sã n wa pak-fo, Israyɛl, yel-beeda sã n wa lʋɩ f zugu, f na lɛɛg n wa Wẽnnaam, f Soaala, nengẽ, la f na kelg b koɛɛga.

³¹Wẽnnaam f Soaala pida ne nimbãan-zoeere, b kõn yiis-f kɛɛng ye, b kõn sãam-f ye, b kõn yĩm zooda kãabgã b sẽn kãab f ba-rãmb ye.

³²Sok pĩnd zamaanẽ dãmba, Israyɛl, sok sẽn deng-b foo moogo, sok n ges ninsaal sẽn wa tẽng zug tɛka, sok n ges yaa yaang bɩ taoore la b yãend bõn-bãnd a woto taare? Yɛɛlẽ la b wʋm woto taare?

³³Tẽn-bʋg rãmb n paam n wʋm wala foo, Israyɛl, tɩ b wẽnda koɛɛg yit bugum sʋka n gomd ne ba tɩ b pa ki?

³⁴M sok n gese wẽnd bʋgo n yiki ne yɛl-bãna, ne tẽn-kũum, ne zaba, ne moadga, ne yɛɛsgo n na n kẽ buud a taab sʋka n tũus buudu, sẽn na n yɩ a rẽnna wala Wẽnnaam f Soaala sẽn maan f yĩnga tɩ y nif rɩ kasto Ezipt tẽngã?

³⁵[34†] Fo paamame n yãende, Israyɛl, sẽn na n yɩlẽ tɩ f bãnge tɩ Soaala la Wẽnde. Wẽnd a to ka be n zʋʋg bãmb ye.

³⁶B zĩnda yĩngri n yiis b koɛɛg n na n zãms-fo, tɩ fo zĩnd tẽngre n yãend bug-kãsenga, la b zĩnda bugmẽ wã n taas foom b koeese.

³⁷B nonglma sẽn da kẽ yaab rãmbã n kell n pʋg kambã, yaab rãmba loogr poore, yaa foo la Soaala pʋg yã, la b yiis-f-la ne pãnga, Ezipt tẽnga,

³⁸n wa reeg buud a taab soolem n kõ-fo, buud sẽn yɩɩd f ne sõor la pãnga, la rẽ la d sẽn ne rũnna wã.

³⁹Dɩlla ges f yamẽ la f bilg f sũurẽ: ad Soaala bal la Wẽnde. Yĩngri, saag zugu, bɩ kaalẽ, tẽng zugu, Wẽnd a to ka be ye.

⁴⁰Reeg b sẽn wilgã, reeg b noya m sẽn yet tɩ m taas-f rũnna, f yell manegr yĩnga la f kamba me yell manegr yĩnga, fo loogr poore. Woto la f na n paam yõ-woko tẽng ningẽ f Soaala sẽn kõt fooma.»

⁴¹A Moyiiz waa n welga tẽns a tãabo, Zʋrdẽ yaanga.

⁴²Tẽn-bãmb lebga soondg tẽnse. Ned sã n kʋ a to la tũu ne yĩdgu, la beem da ka be sʋk ye, nin-kʋʋda tõe n kẽe be n põse.

⁴³[35†] Besɛr la b welg toore, a Rubẽ kamba yĩnga; tẽn-kãng taoor la we-raooga yɛdg n dɩg. A Gad kamba yĩnga b yãka Ramot, Galaad tẽn-peelmẽ. Bazã tẽn-peelmẽ yɩɩ Golan la b yãk a Manase kamba yĩnga.

⁴⁴A Moyiiz n deeg Wẽnd koeesã n taas Israyɛl kamba.

⁴⁵Ad-a Moyiiz sẽn wilg Israyɛl kamba: Wẽnd daabo, wẽnd noya la sẽn na n wa lebg a Israyɛl rog-n-miki. Yɩɩ Ezipt tẽng yiib wakato,

⁴⁶b sẽn waa n be bãg-faagẽ, Zʋrdẽ yegende, Peor sɛɛgẽ, Amoritsa dĩm a Siyõ soolmẽ. Wakat kãng t'a Siyõ ra kẽeda Esbõ la a Moyiiz ne a neba ra zabame n tõog-a.

⁴⁷B deega a tẽngã la Bazã dĩm, a Og, me tẽngã. Bãmb b yiibu n sɩd da ya Amoritsa soaalba, yaanga, Zʋrdẽ yegende.

⁴⁸Israyɛl kamba reega tẽnsa sẽn yɛdg Arowɛr, Arno kʋɩl-bɛɛga foolle al n wa ta Ermo tãnga. Tãn-kãng me le boondame tɩ Siyõ.

⁴⁹Naaga tẽnsa sẽn yɛdg Zʋrdẽ foolle n ta Yamsem Mogre, Pisga tãnga sɛɛga.