Read SEBR SÕNGO, 1998 Yaoolem 6 Bible Online

Yaoolem 6 - SEBR SÕNGO, 1998 bible

Yaoolem 6

¹Ad-y yaa woto la noya la rog-n-mikã Wẽnnaam, y Soaala, sẽn yet tɩ m wilg yã tɩ y reeg la y tũ y sẽn dabd tẽng ning n na n tɩ soogã.

²Rẽ yaa sẽn na n yɩlẽ tɩ y zoe rabeem, Wẽnnaam, y Soaala, rabeem. Yãmb ne y kamba la y yagens na n deega y vɩɩma pʋgẽ Soaala noya la b raabã, n paam yõ-woko.

³Foo, Israyɛl, f na reeg Soaala noya n tũ zãnga la woto f sũur na yɩ noogo la f na fɩɩg tẽn-noogẽ, tẽng sẽn bund bĩisim la sɩɩdo wala f Soaala, f yaab rãmba Wẽnnaam sẽn da kãab-f.

⁴ [48†] Kelge, Israyɛl: d Soaala bal la Wẽnnaam, bãmb b ye tãa.

⁵[49†] Bɩ f nong f Soaala, f Wẽnnaama, ne f sũur fãa, ne f yalẽ fãa, ne f pãng fãa.

⁶M sẽn kõt-f noor ninga rũnna wã pa f sũurẽ.

⁷F na taas-a f kamba, f zĩ f zakẽ bɩ f togda sore, f gãe bɩ f kẽnda.

⁸Gʋls-a n loe f kanga, n tabend f rĩirẽ, f nina yiiba sʋka.

⁹[50†] Gʋls-a f rignoorẽ la f tẽnga noorẽ kʋɩlensẽ.

¹⁰ [51†] Wẽnnaam, f Soaala, sã n wa kẽes-f tẽng ning b sẽn kãab f yaab rãmbã, a Abraam, a Izaak la a Zakoob, tẽns sẽn pid ne ro-bɛd la ro-neeba f sẽn ka nams n me,

¹¹tɩ rot pid ne te-sõma fo sẽn ka bao n bĩngi, tɩ buls pid ne koom tɩ f nug yaool n ka tuk bũmbu, tɩ pʋt pid ne bugsuntund la oliviye tɩɩse f sẽn pa sele. F sã n wa tɩg bũmb fãa zãnga,

¹²f na n maana tẽegre n da yĩm f Soaala sẽn yiis-f Ezipt, f yembd tẽngẽ ye.

¹³[52†] Modg n dig rabeem, n dig Wẽnnaam, f Soaala, rabeem; bãmb bal la f na n waoog, bãmb yʋʋr yĩng bal la f na n kãabe.

¹⁴Da pʋg-f f yagsa wẽn-naandsa ba a ye.

¹⁵F Soaala-Wẽnnaama be-la f sʋka wa Wẽnd sẽn mi sũ-kiiri. Gũus tɩ f Soaala, f Wẽnnaama, sũur da yik ne-fo, tɩ b wa yiis-f saaga tẽngr ye.

¹⁶[53†] Da fɛɛs Wẽnnaam, f Soaala, wala f sẽn maan Masa wã ye.

¹⁷F na tũ-la a yembr-yembre, raabã, gɩdgrã, rog-n-mikã, Soaala-Wẽnd sẽn kõt yãmba.

¹⁸F na maan sẽn zemse la sẽn ya tɩrga Wẽnnaam nifẽ la f na paam n kẽ la f vɩɩnd ne sũ-noogo tẽng ning b sẽn kãab f yaab rãmbã,

¹⁹la b na zãag-f ne f bɛɛba wala b sẽn le kãab yɛsa.

²⁰F biig sã n wa sokd-f beoogo: ‹Yaa bõe yĩng la Wẽnnaam, d Soaala, yiis noya, saglse, la rog-n-mik kãensã?›

²¹Wakat kãnga f na leok f biigã: ‹Tõnd da yaa Ezipt dĩma yemse, la Wẽnnaam tẽega b kanga n wilg b pãnga n yiis-d Ezipt tẽnga.

²²Wẽnnaam maana d nifẽ bõn-bãna la yɛl bɛd sẽn yɩkd pɛlense, sẽn wa ne Ezipt rãmb bõne, b dĩma la a roog bõne.

²³B yaool n yiisa tõnd be n kẽes-d tẽng ning b sẽn da kãab d yaab rãmba tɩ b na rɩk tẽn-kãens n kõ-dã.

²⁴Soaala yeel-d lame tɩ d deeg noya zãng fãa la d zoe b rabeem, tɩ woto d na paam sũ-noogo daar fãa la d na kell n pa ne yõore wala y sẽn ne rũnna.

²⁵D vɩɩma na n yɩɩ wala Wẽnd sẽn date, d sã n modg n deeg noy kãensa fãa, bãmb taoore, wala b sẽn wilg-dã.›