Read SEBR SÕNGO, 1998 Yaoolem 8 Bible Online

Yaoolem 8 - SEBR SÕNGO, 1998 bible

Yaoolem 8

¹Modge, Israyɛl, n deeg noor ning m sẽn kõt-f rũnna wã la tũ neere n paam n vɩɩnd la f fɩɩg zembala, n tɩ soog tẽng ning Soaala-Wẽnd sẽn kãab f ba rãmba.

²Modg n da yĩm Wẽnnaam, f Soaala, sẽn kɩt tɩ f tũ sor ninga al yʋʋm pis-naas rũnna, we-raoogẽ ka. Yaa naong sore. B fɛɛs-f-la woto n bãng bũmb ning sẽn be f sũurẽ, f sã n na n zãgsame bɩ f sã n na n deega b noya.

³[59†] Soaala-Wẽnd kẽes-f-la naongo, n gãneg-f kom, n dɩlg-f ne man, rɩɩb foo ne f ba-rãmb sẽn da zɩ n dɩ ye. B tʋlgame tɩ f bãng tɩ ninsaal ka rɩlgd a meng vɩɩm ne bur bal ye, a rɩlgd-a la ne bũmb ning fãa sẽn yit Wẽnnaam noorẽ.

⁴F fuug pa kʋdg ye, yʋʋm pis-naas kẽna ka mod f karg ye,

⁵la f sẽn tags n gese f bãngame tɩ Wẽnnaam, f Soaala, gʋʋl-f-la wa ba sẽn gʋʋnd a biiga.

⁶F na n deega Wẽnnaam, f Soaala, noya n tũ b sore la f zoe b nifu.

⁷Wẽnnaam, f Soaala, kẽesd-f-la tẽn-noogẽ, kʋɩls sẽn zoet tɩ b koom fõt tẽngẽ, buls zĩisi, koom sẽn pusgd a toore pʋtẽ la tãms zutu,

⁸tẽng sẽn womd alkam pɛɛlga, alkam kɛgenga. Bugsuntung bee be n paas kankanga la tɩɩg sẽn womd a biis wa poaloanga. Seem gãe be. Tẽnga pida ne oliv kaam la sɩɩdo,

⁹tẽn-kãng bur dɩta f yam, ka kẽgsd ye, bũmb kõn paoog-f be ye. F yẽneg b kugri, ad-f kutu; f yẽneg b tãmse, ad-f zũudu.

¹⁰Beelẽ f na rɩ f yam la f na pẽg Wẽnnaam, f Soaala, b sẽn kõ-f tẽn-nooga yĩnga.

¹¹Gũus n da yĩm Wẽnnaam, f Soaala ye. Gũus n deeg b noya, n tũ rog-n-mikã la f zãag f meng ne sẽn gɩdge, tɩ m togs-f fãa rũnna wã.

¹²F sã n dɩt n tɩgda, n met f ro neeba n kẽedẽ,

¹³tɩ f rũmsi, bɛd la bõones, ya ka tɛka, f sã n tar sãnem, wanzurf la laog buud fãa,

¹⁴da maan wakre n wa yĩm f Soaala, f Wẽnnaam, sẽn yiis-f Ezipt tẽnga, f yembd tẽnga ye.

¹⁵Yaa bãmb n kẽes-f we-rao-kãnga sẽn dɩt neba pʋgẽ, weoog sẽn pid ne wag-toose, ne namse, koom sẽn ka n kiisd ko-yũud weoogo. Fo yĩnga b kɩtame tɩ pĩig sẽn ya pĩig meng bul koom.

¹⁶[60†] Yaa bãmb n dɩlg foo we-raoogẽ wã ne man, rɩɩb f yaab rãmb sẽn zɩ n dɩ ye. La b maana woto n kẽes f naongẽ n na n fɛɛs-fo la b togl f beoog so-sõngo.

¹⁷Da wa saag n yeele: ‹Yaa m yãoog pãng n kẽes-m tɩgr kãnga pʋga.›

¹⁸Tẽeg bal tɩ tũu ne Wẽnnaam, f Soaala, la f paam pãng n ta zĩ-noogẽ ka la rẽ yaa Soaala sẽn dat n le paas b zooda pãnga, zood ning b sẽn da yõg ne f yaab rãmba la sẽn ket n yɛs rũnna wã.

¹⁹F sã n saag n yĩm Soaala, f Wẽnnaam, yelle, f sã n pʋgd wẽn-naandse, n wõgemd b taoore n waoogd-ba, m wẽend tɩ Israyɛl ne a kamba na menem zãnga.

²⁰Y na menem wala buud niyns Wẽnd sẽn yiis yãmb taoore. B na menes-y moogo tɩ y pa kelg Wẽnnaam, y Soaala koɛɛg ye.