Read SEBR SÕNGO, 1998 Yaoolem 9 Bible Online

Yaoolem 9 - SEBR SÕNGO, 1998 bible

Yaoolem 9

¹Kelge, Israyɛl! Dũnna f na n dʋʋga Zʋrdẽ kʋɩlga n dig n yiis b tẽngẽ, buud sẽn yɩɩd foo ne sõor la pãnga. B tẽns yaa bɛda, n me n gũbg ne lalse, n zao tãms zutu.

²Buuda yaa bu-kãsenga, nin-daad buudu, Anakitse. La ade, wala f sẽn wʋm tɩ b gomdã: ‹Ãnna n tõe n yals nin-bãmba taore?›

³Dũnna f na bãng tɩ yaa Wẽnnaam, f Soaala, meng n lʋɩ f taoore n na n dʋʋg Zʋrdẽ. B na n dʋʋg-a-la wa bugum sẽn zom moogo. Bãmb meng b toore n na n varg bɛɛbã. Bãmb meng b toore n na n gãneg-b fo taoore, tɩ fo yaool marsã n kẽ b tẽngã n menes-b wala Wẽnd sẽn kãab-fo.

⁴Soaala-Wẽnd sã n tus-ba n yiis f taoore da yeel f sũurẽ: ‹Yaa m sẽn tar sõmblema yĩnga la Soaala-Wẽnd sõng-m tɩ m deeg tẽngã n sooge.› Bãng tɩ yaa tẽnga rãmb n ya nin-yoodo la Soaala-Wẽnd menes-b fo taoore.

⁵Ka foo n tar sõmblem ye, ka fo sũurã n ya tɩrga la f sẽn paam n na n soog b tẽnga ye. Yaa tẽnga rãmb n ya nin-yoodo la f paam b tẽng n sooge. La Wẽnnaam maana woto tɩ b ratame n wilg tɩ b ra kãab-a-la y yaab rãmba, a Abraam, a Izaak la a Zakoob.

⁶Bãng tɩ ka fo sẽn tar sõmblema la Wẽnnaam, f Soaala, kõt-f tẽn-noog kãnga tɩ f soog ye, tɩ Israyɛl kamba zug ka mi gõmsg ye.

⁷Da yĩm ye, Israyɛl, tẽeg tɩ f yika Wẽnnaam f Soaala sũur zĩ-peen-daagẽ wã, f Ezipt tẽng yiib raare n tãag f sẽn poog ka. F talla gugleng ne bãmba.

⁸Oreb tãng zugu f puuga Soaala sũuri la Soaala sũur me yika ne foo tɩ b da rat n menes-f zãnga.

⁹[61†] M sẽn dʋ tãnga zug n na n deeg kuga walse, zood ning Wẽnd sẽn yõg ne yãmba kaseto, m paa tãnga zug rasem pis-naase, wĩntoog la yʋngo, n pa tol n dɩ buri, n pa tol n yũ koom ye.

¹⁰Wẽnnaam kɩs-m-la wals a yiibã. Bãmb meng n da gʋls b zugu, ne b nug-bila, noy niyns b sẽn da kõ foo tãnga zugã, f sẽn tigim b sɛɛgẽ wã raare, sa-tãsa raare.

¹¹Yaa rasem pis-naasa sẽn waa n pidi la Wẽnnaam kõ-m wals a yiibã, zooda kaset sẽn gʋls b rãmb zugã.

¹²Wakat kãng la b yeel maam: ‹Yiki la f sig tao-tao tɩ fo sẽn yiis b rãmb Ezipt tẽngã wɩɩbame. Ka kaoos la b bʋdg sor ning m sẽn da kõ-ba ye. B yẽnega kut n maan b bõn-naande!›

¹³B le paasame: ‹M mii nin-bãmba, ka neb sẽn deegd yell ye!

¹⁴La bas-y tɩ m wa, m na n wã-b-la zãnga, n yẽes b yʋʋr saaga tẽngre. Foo, Moyiiz, fo kamba n na n fɩɩg n lebg bu kãsenga, bu yalengo.›

¹⁵M lɛɛg n siga tãngã n zãad ne m nus a yiibu zooda kaset wals a yiibã.

¹⁶M sigame la m yãeeme. Israyɛl kamba, y beega Soaala, yãmb Wẽndã, n yẽneg sãnem n maan nag-bila. Ka yãee n kaoos tɩ y wẽneg n lak ne sor ning Soaala sẽn da wilg-y wã ye.

¹⁷M wudg n tebla wals a yiibã ne m nus a yi la m fabg-b la me tɩ b wã y nifẽ.

¹⁸M lʋɩɩ tẽng Soaala taoore; wala pipi raarã, m paa rasem pis-naase, wĩntoog la yʋngo, m ka rɩ buri, m ka yũ koom, la rẽ yaa y sẽn da beeg Soaala-Wẽnda yĩnga, n maan sẽn ya wẽng b nifẽ.

¹⁹[62†] M da maanda rabeem tɩ b sũura ra yika ne yãmba, b sũura ra fõta ne yãmba tɩ b rat n menes yãmb gilli. La wala pĩndã Soaala-Wẽnd le kelga m pʋʋsgo.

²⁰Wẽnd sũura ra fõta ne a Aarõ me, al n dat a kũum, tɩ m na n pʋʋs a Aarõ me yĩnga.

²¹La y sẽn da maan wɩɩbd ningã, y nag-bilã, m dɩk-a lame n los bugmẽ, n yẽneg-a, n wer-a zom-bʋka, n dɩk n lob koom sẽn da fõt n sigd tãngã.

²² [63†] Yãmb puuga Wẽnnaam sũur Tabera, Masa, Kibrot-Taava.

²³[64†] Y sẽn waa n ta Kadɛs-Barnea, Soaala-Wẽnd tʋm-y lame: ‹Dʋ-y n deeg tẽngã n sooge tɩ maam n kõt-a yãmba.› Y ka reeg Wẽnnaam, y Soaala, koɛɛg ye, y pa maan b teegr ye, y zãgsame.

²⁴M sẽn bãng-y tɛka, m bãng-y-la wa neb sẽn kɩɩsd Soaala-Wẽnde.

²⁵M lʋɩɩ tẽng Soaala taoor dasem pis-naase, wĩndig la yʋngo, tɩ Wẽnd da gomdame tɩ b na sɛɛs-y-la zãnga.

²⁶M pʋʋsa Naaba-Wẽnd la m yeelame: ‹Soaala-Wẽnnaam da wã-y y buuda ye, da sãam-y y pʋɩɩra ye, yãmb n yik ne y nimbãan-zoeere sẽn ka be tɛkã n wogl a yõore, n yiis-a Ezipt tẽnga ne y kang pãnga.

²⁷Tẽeg-y y tʋʋm-tʋmdba a Abraam, a Izaak la a Zakoob yelle. Yĩm-y nin-bãmba sẽn ka teemd zʋgã, sẽn ka mi Wẽnd waoogrã, yĩm-y b yel-wẽndã.

²⁸Da bas-y tɩ b wa yeel Ezipt tẽnga, y sẽn yiis-d tẽng ningã: Wẽnd mikame tɩ b pa na n tõog n kẽes-b tẽng ning b sẽn kãab bã, tɩ zooda ra sãamame, la rẽ la b yiis-b n na n wa kʋ we-raoogẽ.

²⁹Yaool n yaa yẽ la y buudu, y pʋɩɩre, y sẽn yiis ne y nug pãnga!›