Read SEBR SÕNGO, 1998 Zozuwe 1 Bible Online

Zozuwe 1 - SEBR SÕNGO, 1998 bible

Zozuwe 1

¹Soaala-Wẽnd tʋʋm-tʋmd a Moyiiz loogr poore, Naaba-Wẽnd goma ne a rakõor a ye, a Nun biiga, a Zozuwe, n yeel-a:

²«M tʋʋm-tʋmd a Moyiiz loogame, yik marsã tɩ wakat yaa n taame n dʋʋg Zʋrdẽ, foo ne nin-bãmba, n paam n ta tẽng ninga m sẽn kõt a Israyɛl buudu.

³[1†] Y nao sẽn na n tabg zĩig ning fãa lebgda yãmb soolem wa m sẽn da kãab a Moyiiz.

⁴Y tẽnga toaag yaa We-raoogã la Libã sẽn dɩg y taoorã n digd Efrat kʋɩl-kãsenga, yaang sẽnẽ, n tãagd Mog Kãsengã, wĩndga sẽn lʋɩtẽ. [2]

⁵[3†] F na tol n ki tɩ ned pa tõog-f ye. Wala m sẽn pa ne a Moyiiz, m na maan boto me ne foom, m kõn zãag m meng ne foom ye. M kõn bas-f ye.

⁶ [4†] Keng f sũuri, wɩsg f menga. Yaa foo n na n pʋɩ m nebã tẽng ning m sẽn kãab b yaab rãmbã.

⁷N-ye! Wɩsg-f menga, keng f sũuri, la tũ neere Noor ning m sẽn kõ m tʋʋm-tʋmd a Moyiiz. Da kɩll goabga, da kɩll dɩtgo, tɩ woto f sẽn sɩng fãa na baas neere.

⁸Bɩ m Noora sebr da zãag ne f ye, a goama biis pa f no-gãnnẽ. Walem-a f noorẽ, wĩndig la yʋngo, n wa tõog n tũ-a zãnga. F sã n maan boto la f tʋʋma na tũ rẽ n baas neere.

⁹Ka maam n yeel foom: wɩsg f meng la f keng f sũuri bɩ? Dẽ yĩnga da bʋ ye, da zoe rabeem ye, tɩ f sẽn dabd zĩig ning fãa, Wẽnnaam, f Soaala, na zĩnd f sɛɛgẽ.»

¹⁰A Zozuwe yeela taoor dãmba woto:

¹¹«Saag-y sika tõre n wilg nebã tɩ b segl dɩɩbo tɩ ka ne rasem a tã y na n dʋʋga Zʋrdẽ kʋɩlga sẽn tõndã n tɩ soog tẽng ning y Soaala-Wẽnnaam sẽn kõt yã.»

¹²A Zozuwe yaool n yeela a Rubẽ, a Gad la a Manase bogrã:

¹³«Tẽeg-y Soaala-Wẽnd tʋʋm-tʋmd a Moyiiz sẽn kõ yãmb noor ningã: ade Wẽnnaam, y Soaala, taas-y-la y vʋʋsg zĩigẽ. B kõo yãmb tẽn-kãngã.

¹⁴Y pagba, y kom-bõonego; y rũmsa na n paa tẽng ning a Moyiiz sẽn kõ yãmb Zʋrdẽ kɩrẽng kãnga. Sã n ya rapa sẽn tõe n tak zabrã, bãmb fãa na n lʋɩɩ b saam-biisa taoore, b me sõng-ba.

¹⁵[5†] Y na n maana woto n ta wakat ning Naaba-Wẽnd sẽn na n kõ y saam-biisa a taaba vʋʋsg tẽnga wala y sẽn paama. Yãmb me na yaool marsã n lɛɛg n wa y soolmẽ. Y na lɛɛg n wa Zʋrdẽ kɩrẽng kãnga wala a Moyiiz sẽn kõ yãmbã.»

¹⁶B leoka a Zozuwe: «D na maan f sẽn yet tɩ d maan fãa, fo sẽn yet tɩ d kẽng zĩig ning fãa, d na kẽnge.

¹⁷Wala d sẽn sak a Moyiiz, bũmba fãa pʋgẽ, woto d na sak foom me. N-ye! Wẽnnaam, f Soaala, na n zĩnda ne foo wala b sẽn zĩnd ne a Moyiiz.

¹⁸Ned ning fãa sẽn na n kɩɩs f gomde, ned ning fãa sẽn na n tõdg f noore, sẽn ya noor ning fãa la f kõ yã, a soab bãng t'a na ki. Fo ye n wɩsg f menga la f keng f sũuri.»