Read SEBR SÕNGO, 1998 Zozuwe 10 Bible Online

Zozuwe 10 - SEBR SÕNGO, 1998 bible

Zozuwe 10

¹Zerizalɛɛm dĩm, a Adoni-Sedɛk, wa n wʋmame t'a Zozuwe wẽe Ayi n tõog-a, n dɩk-a zãnga n kõ Soaala-Wẽnde la a maana ne a dĩma wala a sẽn maan ne Zeriko soaba. A wʋmame yɛsa tɩ Gabaõ rãmb yõga zood ne a Israyɛl n tɩ kẽe n naag-a.

²Dẽ waa ne a yɛɛsgo tɩ Gabaõ ra yaa tẽn-bedre, da yaa na-tẽnga n da yɩɩd Ayi tẽnga. Yaa tẽng sẽn pid ne zabr mitba.

³Dẽ la Zerizalɛɛm dĩm, a Adoni-Sedɛk, tʋm tɩ b tɩ yeel Ebrõ dĩm, a Oam, Yarmut dĩm, a Piream, Lakis dĩm, a Yafia la Eglõ dĩm, a Devir:

⁴«Wa-y naag-y taab n sõng-ma tɩ m wẽ Gabaõ tɩ tẽng kãng rãmb yõga zood ne a Zozuwe la a Israyɛl.»

⁵Amoritsa dĩm dãmb a nu wã sɩd sega taaba n na n sõng taab n zabe. Yɩɩ Zerizalɛɛm ne Ebrõ, Yarmut, Lakis la Eglõ dĩm bãmb ne b tãb-biisi. Bãmb n gũbg Gabaõ n na n tak zabre.

⁶Gabaõ rãmb me tʋmame tɩ b tɩ yeel a Zozuwe, dẽ t'a ket Gilgal: «Da bas f yemsa ye, wa tao-tao n sõng-do n fãag-do tɩ Amoritsa tãmsa zug dĩm dãmba yik n sũu taaba n na n tak zabre ne do.»

⁷A Zozuwe wẽneg n yii Gilgal ne a tãb-biisi, ne a zab mitba fãa.

⁸Soaala-Wẽnd yeela a Zozuwe: «Da maan dabeem ye, bãng tɩ m dɩk-b lame n sagl f nugẽ, ba a ye kõn yals f taoor ye.»

⁹A Zozuwe paam n linga bɛɛbã t'a yii Gilgal n kẽn ne yʋngo.

¹⁰Soaala-Wẽnd meng n kɩt tɩ bɛɛba ning tĩiga b sẽn yãee a Israyɛl. A Israyɛl tõog-b-la sõmbo, n dig-b Gabaõ n tees Bɛt-Orõ la yii vargre, Azeka n ta Makeda.

¹¹A Israyɛl sẽn wa n tõog bɛɛba tɩ b zoet n sigd Bɛt-Orõ, Soaala-Wẽnd yãag-b-la ne sapɩlem kuga n ta Azeka la kuga pãb-b lame n kʋ. Sapɩlma sẽn kʋ neba yɩɩga Israyɛl kamba sẽn kʋ ne b sʋʋse.

¹²Amoritsa sẽn lʋɩ Israyɛl nugẽ daare, a Zozuwe goma ne Soaala-Wẽnd, Israyɛl kamba taoore n yeele: «Bɩ wĩndga yals Gabaõ tɩ kiuug pa Ayalõ bãg-faagẽ.»

¹³ [19†] La wĩndig yaasame la kiuug pa luk a zĩigẽ ye al t'a Israyɛl wa rok a sũur ne a bɛɛba. La ka rẽ n da pĩnd n gʋls Wẽnd nin-sõng sebra [20] pʋgẽ bɩ? Wĩndig yalsa zug tẽnsʋka, n pa raara a ye tõre n pa lʋɩ ye.

¹⁴Raar ka reng n zĩndi la raar ka le pʋgl sẽn wẽneg daar kãng ye, tɩ Soaala-Wẽnd meng deega ninsaal noore, n zab n sõng Israyɛl.

¹⁵Dẽ poore a Zozuwe ne a neba lɛɛg n kẽe Gilgal tẽnga.

¹⁶Dĩm dãmb a nu wã zoe n tɩ soonda Makeda tãng bokẽ.

¹⁷B Wa n togsa a Zozuwe: «Ad-y b yãee dĩm dãmb a nu wã tɩ b sor Makeda tãng bokẽ.»

¹⁸T'a leoke: «Bilim-y kug bɛd n pag boka noore la y ning neb boka noor n gũ-ba.

¹⁹Sã n ya yãmba, da bao-y vʋʋsg ye. Pʋg-y bɛɛba n gõdg-ba tɩ b ra paam n ta b tẽnsẽ ye tɩ Soaala-Wẽnd dɩka b tẽnsã n sagl y nusẽ.»

²⁰Ade, a Zozuwe ne Israyɛl kamba sẽn waa n na n tõog bɛɛba la b menes-b zãnga, kẽer me paamame n põse n zoe n tɩ kẽ zabr-kõn-ling-m tẽnsẽ.

²¹Sã n yaa a Israyɛl, nin-yend meng ka pa moog ye, b lɛɛga zãnga n kẽ Makeda ne a Zozuwe. Ned ba a ye ka le saag n bao b noor ye.

²²A Zozuwe yeelame: «Lak-y kuga tãn-boka noore la y yiis dĩm dãmb a nu wã n kõ ma.»

²³B maana wala a sẽn yeelã n tall dĩm dãmba n wa, yaa Zerizalɛɛm, Ebrõ, Yarmut, Lakis la Eglõ dĩm dãmba.

²⁴B wa ne ba t'a Zozuwe yaool n bool Israyɛl tõre la a yeel tãnsoaben-damba sẽn yãag-b yẽ wã: «Kolg-y la ned kam fãa teeg dĩm dãmba yubl ne a naoore.» B maama boto.

²⁵T'a paase: «Keng-y y sũuri la ra maan-y rabeem ye tɩ yaa woto la Soaala-Wẽnd na n maan ne bɛɛb niyns sẽn na n seg yãmb zabrẽ.»

²⁶Dẽ poore a Zozuwe kʋʋ dĩm dãmbã n kɩt tɩ b yagl-b tɩɩs a nu tɩ b pa be n ta zaabre.

²⁷Zĩig sẽn wa n sobgdẽ a Zozuwe kõo noore tɩ b sik-ba n lob tãnga bokẽ, b sẽn da solg b mens zĩig ningã. B wʋka kug bɛd n zam boka noore la b keta ne rũnna.

²⁸Baraare a Zozuwe wẽe Makeda n tõog-a la a kɩtame tɩ b kood a neba la a dĩma. Bõn-vɩɩl fãa soogr da lebga kisgu. Ba a ye ka põs ye. Sẽn maan ne Zeriko dĩma n maan ne Makeda Naaba.

²⁹A Zozuwe ne a Israyɛl neba yii Makeda n kẽng Libna. B tɩ wẽe Libna tẽnga.

³⁰Naaba-Wẽnd dɩka Libna ne a dĩma n sagl a Israyɛl nugẽ la a Israyɛl kooda bõn-vɩɩl fãa. Ba a ye ka põs ye. Sẽn maan ne Zeriko dĩma n maan ne Libna rẽnda.

³¹A Zozuwe ne a neba yii Libna n wa Lakis. A gũbg-a lame n tak zabr ne-a.

³²Soaala-Wẽnd dɩka Lakis n sagl a Israyɛl nugẽ, a tõog-a-la daar a yiib soaba la a kooda bõn-vɩɩl fãa, wala a sẽn maan Libna.

³³Gezɛr dĩma, a Oram, da yii wakat kãnga n na n sõng Lakis la a Zozuwe wẽ-a lame la a kʋ-la a neba zãnga.

³⁴A Zozuwe ne zãma wã sẽn yi Lakis, b taa Eglõ. B sẽn gũbg Eglõ, b zaba ne-a.

³⁵B tõog-a-la baraare la sʋʋg n kood bɛɛba zãnga. Bõn-vɩɩl fãa soogr lebga kisgu baraare wala b sẽn maan ne Lakis.

³⁶A Zozuwe ne Israyɛl tõre yii Eglõ n ta Ebrõ n tak zabre.

³⁷B sẽn tõog-a, b kooda dĩma la a soolma neba fãa la bõn-vɩɩl fãa. Ba a ye ka põs ye, wala Eglõ tẽnga, bõn-vɩɩl fãa soogr da lebga kisgu.

³⁸A Zozuwe ne a Israyɛl wẽneg n teesa Debir n tak zabre ne-a.

³⁹A dĩma ne a soolem dãmba fãa, a kood-b lame. Bõn-vɩɩl fãa soogr da lebga kisgu la woto, ba a ye ka põs ye. A Zozuwe sẽn maan bũmb ning ne Ebrõ, bõn-kãng la a maan ne Debir la bõn-kãng me la a reng n maan ne Libna la a dĩma.

⁴⁰A Zozuwe sẽn tõog tẽns niynsa yɩɩ woto: tãng zug rãmba, Negɛb rãmba, bãadẽ dãmba, kunkubẽ dãmba: Dĩm bi talga, ned ba a ye ka pa vɩɩg ye. Bõn-vɩɩl fãa soogr da lebga kisgu, wala Israyɛl Wẽnnaama sẽn da kõ-a noore.

⁴¹A Zozuwe tõog-b-la fãa gilli: Kadɛs-Barnea n ta Gaza, n ta Gosen, n ta Gabaõ.

⁴²A Zozuwe tõoga tẽnsa ne b dĩm dãmba, zab-vuk bala. Israyɛl Wẽnnaam n da zabd n sõngd-a.

⁴³A Zozuwe ne a neba gilli lɛɛg n wa b sikẽ, Gilgal.