Read SEBR SÕNGO, 1998 Zozuwe 13 Bible Online

Zozuwe 13 - SEBR SÕNGO, 1998 bible

Zozuwe 13

¹A Zozuwe waa n kʋʋla wʋsgo. Soaala-Wẽnd yeel-a lame: «Ade, fo kʋʋlame, fo kaoosa moogo, la tẽnsa sẽn ket n nan ka kẽ f soolmẽ labsa.

²Tẽnsa sẽn ketã, yaa sẽn be-b Filisti rãmb la Gesuritsa soolmẽ.

³Sɩngda Sior sẽn tot ne Ezipt n ta Ekrõ sẽn be nug goabga la b sẽn tog n ges wa Kanaã rãmb soolem. Sẽn ket yɛsa, yaa dĩm dãmb a nu wã sẽn da namsd Filisti rãmbã: Gaza dĩm, Asdod dĩma, Askelõ dĩm, Gat la Ekrõ dĩm dãmba; le paasa Avitsã.

⁴Bãmb soolma sɩngda nug rɩtgo ne Kanaã rãmba la Ara sẽn ya Sidõ rãmb soolem n ta Afɛka n digd Amoritsa toaagẽ.

⁵Sẽn ket yɛsa: Gebal weoogo ne Libã bogr ning sẽn tees wĩndiga sẽn pukdẽ; sɩngda Baal-Gad sẽn be Ermo tãnga tẽngr n tat Lebo-Amat noorẽ.

⁶[24†] Ade, tẽns niyns sẽn zao tãmsa zutã, sẽn sɩng Libã n digd Misrefot-Mayim sẽn be nin-taoore, n paas Sidõ rãmbã, maam n na n dig-b fãa Israyɛl kamb taoore. Fo tʋʋmd yaa f reeg tẽnsã n poees Israyɛl kamb wala Naaba-Wẽnd n kõt-ba la wala m sẽn zoe n wilgã.

⁷Wakat taame tɩ f na n kõ buudã b pʋɩɩre. Yaa buud a wẽ wã sẽn nan ka paam b rẽnna, n paas a Manase bogrã.»

⁸ [25†] A Rubẽ ne a Gad roogo da naaga a Manase bogrã n deeg b pʋɩɩr a Moyiiz nugẽ Zʋrdẽ yaanga.

⁹B sẽn da reegã, yaa Aroɛr sẽn be Arno kʋɩl-bɛɛga noore, yaa Medeba kunkubã n ta Dibõ.

¹⁰Yaa dĩm a Siyõ tẽnsã; la a Siyõ la Amoritsa dĩm ning sẽn da kẽed Esbõ. Yaa yẽ soolma n ta Amonitsa toaaga.

¹¹Yaa Galaad la Gesuritse la Maakatits soolem, Ermo tãngã, Bazã ne Salka tõre.

¹²Yaa Bazã, a Og soolma zãnga. A Og yaa Refayitsa nin-yend sẽn kell moogo; yẽ n da rɩt naam Astarot la Edreyi Bazã tẽn-peelmẽ. A Moyiiz n da pãb dĩm bãmba b yiibã n deeg b soolem.

¹³Israyɛl kamba yaool n pa reeg Gesuritsa la Maakatitsa soolem ye. Yaa rẽ la b sẽn ket n be Israyɛl sʋk ne rũnna.

¹⁴ [26†] A Levi roogo bal la b ka kõ bũmb. Yaa kũuna b sẽn da kõt Soaala, a Israyɛl Wẽnnaama, yaa kũun bãmb pʋgẽ la b ra paamd b pʋɩɩre, wala a Moyiiz sẽn da wilgi.

¹⁵A Moyiiz ra kõ-la a Rubẽ kambã b pʋɩɩre wala b sõora sẽn da tog ne.

¹⁶Ad-b pʋɩɩra yalem: sɩngda Aroɛr sẽn be Arno kʋɩl-bɛɛga noore, la tẽng ning sẽn da be bãg-faaga pʋga, n ta tãnga sẽn da gilg Medeba.

¹⁷Le paasa Esbõ ne tẽns a taaba sẽn zao tãngã: Dibõ, Bamot-Baal, Bɛt-Baal-Meõ.

¹⁸Le paasa Yaak, Kedemot, Mefaat,

¹⁹Kiriyatayim, Sibna, Gor tãnga zug tẽnse: Seret-Saar,

²⁰Bɛt-Peor, Pisga kunkubã, Bɛt-Yesimot,

²¹tãnga pennẽ tẽnsã, a Siyõ soolma zãnga. Yaa Amoritga n da rɩt naam Esbõ. A Moyiiz ra tõoga yẽ ne Madiã rĩm biisi, a Evi, a Rekem, a Sur, a Ur, a Reba: Bãmb da sakda a Siyõ.

²²Sã n yaa a Beor biigã, bag a Balaam, b ra naaga yẽ ne neb a taab n kood ne sʋʋga.

²³A Rubẽ kamb pʋɩɩr da tata Zʋrdẽ. D sẽn wilgã la a rooga pʋɩɩre ne a tẽn-bɛd la a tẽn-bõonego.

²⁴A Moyiiz kõ-la a Gad kambã b pʋɩɩr wala b sõora sẽn da tog ne.

²⁵B sooga Yaser, Galaad tẽnse, Amonitsa soolem pʋɩ-sʋka n ta Aroɛr sẽn tot ne Raba.

²⁶Esbõ n ta Ramat-Mispe la Bertonim, Maanayim n ta Debir toaaga,

²⁷n paas Zʋrdẽ bãg-faagẽ tẽnsã: Bɛt-Aram, Bɛt-Nimra, Sukot, Safõ, sẽn yaa Esbõ dĩm, a Siyõ, soolma kelle. Zʋrdẽ kʋɩlgã n da ya toaaga n ta Kinerɛt mogra satmẽ la a leb n yaa toaag yaanga.

²⁸D sẽn wilga me la a Gad roog pʋɩɩre ne a tẽn-bɛd la a tẽn-bõonego.

²⁹A Moyiiz ra kõ-la a Manase bogrã a pʋɩɩr wala a sõora sẽn da tog ne.

³⁰B sooga sẽn sɩng Maanayim, Bazã dĩma, a Og soolem zãnga, a Yayir pʋt rot sẽn be Bazã tẽn-peelmẽ, tẽns pisoobe.

³¹Galaad bogra sẽn kellã n paas Astarot la Edreyi, a Bazã dĩm, a Og, soolem, bãmb dɩkame n paas a Manase biig a Makir kamba bogre, wala b sõora sẽn tog ne.

³²Yaa woto la a Moyiiz pʋɩ tẽngã, a Moab pʋ-weesẽ, Zʋrdẽ rʋʋnde, Zeriko yaanga.

³³[27†] A Moyiiz ka kõ a Levi buuda bũmb ye. A Israyɛl Wẽndã, la a Levi pʋɩɩr, wala bãmb meng sẽn da wilgi.