Read SEBR SÕNGO, 1998 Zozuwe 17 Bible Online

Zozuwe 17 - SEBR SÕNGO, 1998 bible

Zozuwe 17

¹Tẽng ning poeera sẽn poees n kõ a Zozɛf bi-kẽeng a Manase, la woto. B da reng n kõo vẽenem gãndaoog a Makir yagensã. A Makir n yɩɩ a Galaad ba. Bãmb la b ra kõ Galaad la Bazã, Zʋrdẽ yaanga.

²A Manase kamb a taaba me paama b rẽnna wala b rooga sõor sẽn da tog ne. Sẽn le paam-b pʋɩɩr yɛsa: a Abiezɛr kamba, a Elɛk, a Asriyɛl, a Sekem, a Efɛr la a Semida kamba. Bãmb yaa a Zozɛf biig a Manase kom-dibli kamba, ned kam fãa ne a roogo.

³Sã n yaa a Selofead, a Efɛr biiga, t'a Efɛr ba yaa a Galaad, t'a Galaad ba yaa a Makir, t'a Makir ba yaa a Manase, yẽ ka rog kom-dibli ye. Kom-pugli bal la a rog yã: a Mala, a Noa, a Ogla, a Milka la a Tirsa.

⁴[35†] Bãmb n bʋʋg maan-kʋʋd, a Elazar, a Zozuwe la kãsem-dãmba taoore, n yeele: «Wẽnd kõ-la a Moyiiz noore t'a kõ tõnd d pʋɩɩr d saam-biisa sʋka.» Woto wã, sẽn tũ ne Wẽnd noora, b reega b pʋɩɩr b ba wã saam-biis sʋka.

⁵Dɩlla Galaad la Bazã sẽn be Zʋrdẽ yaang toog sẽn ka, yaa tẽns piig la a Manase paam yã.

⁶A Manase kom-pugli wã paama pʋɩɩr b saam-biis sʋka. Galaad tẽn-peelma yɩ-la a Manase kamb a taaba soolem.

⁷Ad-a Manase toaaga: a yegda Asɛr; yaa Mikmetat sẽn tot ne Sikɛm. N yi be n teesd Yamin; be yaa sẽn kẽed-b Eyin-Tapua rãmb soolem.

⁸Tapua ra yaa a Manase soolem la zĩig a ye, a yãka toaag ne a Efrayim.

⁹Toaaga ra sigda Kana kʋɩl-bɛɛga, kʋɩlga rɩtgo. Yaa a Efrayim kamba tẽnse, la b ra be a Manase soolmẽ. A Manase meng soolem ra bee kʋɩlga goabga. Sã n yi be yaa mogra la f tat.

¹⁰A Efrayim n da so nug rɩtgo, t'a Manase so nug goabga. Mogrã n da yaa b toaaga. B ra basda a Asɛr goabga, n basd a Isakar yaanga.

¹¹B kẽe a Asɛr la a Isakar soolma pʋg n bẽeg n kõ a Manase. Yaa woto la a ra so Bɛt-Seã ne a tẽn-toose, Yibleam ne a tẽn-toose, Dor ne a tẽn-toose, Eyin-Dor, Taanak, Megido ne b tẽn-toose n paas tẽnsa tãabã.

¹²A Manase kamba sẽn pa tõog n kẽ tẽn-bãmba yĩnga, Kanaã rãmba kell n paa be.

¹³[36†] A Israyɛl sẽn wa n mik t'a pãng paasame, a pa rig Kanaã rãmbã n yiis ye la bãmb n deeg zaka tʋʋm n tʋmnẽ.

¹⁴A Zozɛf rooga waa n yik n yeela a Zozuwe: «Bõe tɩ tõnd pʋɩɩr yaa a ye tãa tɩ d sõor yaool n ya wʋsgo, d sẽn paam Wẽnd bark zembal yĩnga?»

¹⁵A Zozuwe leokame: «Efrayim tãnga sã n paood fo yĩnga, tɩ f sõor yaa wʋsgo, kẽng n tɩ kɛ la f soog Perizitsã la Refayitsa googo.»

¹⁶Tɩ b le yeele: «Tãnga ka na n sekd d ye; Kanaã rãmba fãa sẽn be-b tẽn-nabra tara kut bilim-bilm. Bɛt-Seã ne a tẽn-toosa rãmba fãa me yaa boto, Zizreyɛl dãmba me boto.»

¹⁷Dẽ la a Zozuwe yeel a Zozɛf roogo, a Efrayim la a Manase: «Y rooga roga wʋsgo la y tara pãnga. Y soolma ka na n yɩ tẽn-yend bal ye.

¹⁸Y na n sooga tãnga ne a sẽn ya googã. Y na n kʋʋsa tɩɩsã la y pesm-a zãng n maan y soolem. Y na n diga Kanaã rãmbã ne b sẽn ya wʋsgã, ne b bilim-bilma sẽn ya kutã.»