Read SEBR SÕNGO, 1998 Zozuwe 18 Bible Online

Zozuwe 18 - SEBR SÕNGO, 1998 bible

Zozuwe 18

¹Israyɛl kamba fãa tigma taab Silo tɩ b ti Sɛka Roog be. B ra tõoga tẽnsa fãa n maand b sẽn dat ne-ba.

²Sags a yopoe n yaool n da nan ka paam b pʋɩɩr ye.

³A Zozuwe yeel-b lame: «Y na n taa wakat bʋgo n yaool sẽbg kalle n tɩ reeg vẽenem ning Soaala, y yaab rãmba Wẽnd, sẽn kõ yãmba?

⁴Yãk-y neb a tã, sak fãa pʋgẽ, tɩ m tʋm-b tɩ b tɩ kaag tẽngã la b ges n gʋls sebr zugu, tẽnga sẽn na n pʋɩ seem ninga tɩ ta sagsa sẽn ketã, la y lɛɛg n wa.

⁵B na pas-a a yopoe n pʋɩ. A Zɩɩda na n paa a soolmẽ, rɩtgo, t'a Zozɛf paa a rẽnnẽ, goabga.

⁶Bɩ yãmb tɩ ges la y pʋɩ tẽnga tɩ zems pʋɩɩr a yopoe wã la y lɛɛg n wa wilg-ma. M na n maana poeere ka, Wẽnnaam, d Soaala, taoore.

⁷Sã n ya Levitsã, b ka na n tall pʋɩɩr yãmb sʋk ye. Bãmb pʋɩɩr na n yɩɩ Soaala maan-kʋʋrã. Sã n yaa a Gad, a Rubẽ la a Manase bogrã, bãmb zoe n deega b pʋɩɩr Zʋrdẽ yaanga, wala Wẽnd sõgna a Moyiiz sẽn da kõ-ba.»

⁸Neba rɩka sore n na n tɩ kaag tẽngã t'a Zozuwe yeel-ba: «Kẽng-y n tɩ saag tẽngã n bãng a sẽn yaa a soaba la y lɛɛg n wa ka. M na sok Wẽnd n kõ yã, Silo ka.»

⁹Neba loogame, b saaga tẽngã la sebr zugu b pʋɩ-a-la sags a yopoe n wa kɩs a Zozuwe, Silo sikẽ.

¹⁰Silo sikẽ, a Zozuwe soka Naaba-Wẽnd n bãng a Israyɛl sak kam fãa pʋɩɩre, n gʋls sebr zugu n wilg buud fãa a rẽnna.

¹¹Poeera sẽn poeese, pipi pʋɩɩra yɩ-la a Bẽnzame roog rẽnna. Yẽ rẽnda da bee a Zɩɩda la a Zozɛf kamba rẽnd sʋka.

¹²Goabga, sɩngda Zʋrdẽ, n dʋʋd Zeriko goabga, n teesd nin-taoor tãmsã n tat Bɛt-Aven we-raoogo.

¹³Yita be n kẽed Luz yegende, nug rɩtgo. Luz boonda dũnna tɩ Betɛl. Beelẽ toaaga sigda Atrot-Adar, n dʋʋd tãng ning sẽn be Bɛt-Orõ rɩtgo.

¹⁴Bɛt-Orõ tɛka, a teesda nin-taoore n gõdg n wat Kiriyat-Baal, yẽ boondame tɩ Kiriyat-Yearim, a Zɩɩda kamba na-tẽnga. Toaaga la woto nin-taoore.

¹⁵Rɩtgã, toaaga sɩngda Kiriyat-Yearim. A teesda nin-taoore Neftoa bulsã.

¹⁶A sigdame n teesd tãnga sɛtmẽ, tãng ning sẽn tot ne Ben-Inom sudgã sẽn be Refayitsa goabga. Toaaga ra sigda Inom sudga, Zebuzitsa goabga, n sigd Eyin-Rogɛl.

¹⁷A le gõdgda be n digd Eyin-Semɛs la Gelilot sẽn tot ne Adumim. N yi be n sigd a Rubẽ biig, a Boã, pĩiga.

¹⁸Dẽ poore toaaga yegda nug goabga, n sigd Yamsem Mogra sẽn tõnd a taoore.

¹⁹Toaaga ra yegda Bɛt-Ogla goabga, n tat Yamsem mogrã sẽn yõbg a meng zĩig ningã, nug rɩtgo, Zʋrdẽ sẽn kẽed Yamsem Mogr nug rɩtgo. Rɩtg toaaga la woto.

²⁰Yaangã yaa Zʋrdẽ la toaagã. Woto me la a Bẽnzame pʋɩɩr la a toaaga sẽn yãk n gilgi.

²¹Tẽns niyns a Bẽnzame kamb sẽn paam la woto: Zeriko, Bɛt-Ogla, Emɛk-Kesis,

²²Bɛt-Araba, Semarayim, Betɛl,

²³Avim, Para, Ofra,

²⁴Kefar-Amona, Ofni, Geva: tẽns piig la a yi ne b tẽn-toose.

²⁵Gabaõ, Rama, Beerot,

²⁶Mispe, Kefira, Mosa,

²⁷Rekem, Yirpeyɛl, Tarala;

²⁸Sela, Elef, Zerizalɛɛm, Zebuze rãmb na-tẽnga, Gibea, Kiriyat: tẽns piig la a naase ne b tẽn-toose. Woto n yɩ a Bẽnzame rooga pʋɩɩre.