Read SEBR SÕNGO, 1998 Zozuwe 2 Bible Online

Zozuwe 2 - SEBR SÕNGO, 1998 bible

Zozuwe 2

¹ [6†] A Nun biig, a Zozuwe, yiisa neb a yi Sitim tẽnga n tʋm-ba tɩ b tɩ soos n bãng tẽnga pʋg la a yɩnga. Woto la a yeel-ba: «Kẽng-y n tɩ kaag-y Zeriko tẽnga n wa togs ma a sẽn ya-la.» B kẽngame la yaa pʋg-yoodr a ye yir la b sig yã. Paga ra boondame t'a Raab. A Raab zakẽ la b yõg gãag-soabendo.

²La neb n bʋʋg Zeriko dĩma n togs-a woto: «Ad-y Israyɛl dãmb n wa ka yʋngẽ n dat n tɩg tẽnga yalẽ.»

³Dẽ la dĩma tʋm tɩ b yeel a Raab: «Yiis neb niyns sẽn sig-b fooma. Neb niyns sẽn wa-b fo yirã, ad-b waame n na n bãng d tẽnga sẽn ya-la.»

⁴Bãng-y tɩ paga bao zĩiga n solg neb a yiibã n yaool n yeele: «Yaa sɩda, neb a yiib n sɩd wa ka la m ka mi b sẽn yitẽ ye.

⁵La zĩig sẽn waa n sobgdẽ tɩ b pagd tẽnga noor kʋɩlensã, neba yiime la m ka ges b sẽn teesẽ ye. Zoe-y n pʋg-y-b tao-tao, tɩ y ket n tõe n paam-b lame.»

⁶Mik a ra kɩtame tɩ b rʋ gaosga zugu t'a wʋk a beren-dɩga sẽn da tigim be n lud-ba, gaosga zugu.

⁷Dĩma neba yi-la b pʋgbo, Zʋrdẽ sẽnega, kooma sẽn tõe n dʋʋg zĩig ningã, la b sẽn yi, kʋɩlensã wẽneg n pagame.

⁸Neb a yiiba ka paam n sɩng gãag ye; la a Raab bʋʋg-b-la gaosga zugu,

⁹n yeel-ba: «M miime tɩ Soaala-Wẽnd dɩka tẽng kãnga n sagl y nusẽ, m miime tɩ d fãa yɛɛsame la tẽnga fãa rigda y taoore.

¹⁰[7†] D bãngame tɩ Soaala-Wẽnd kʋɩɩsa Rudum Mogrã y sẽn wa n yit Ezipt tẽnga. D wʋma y sẽn maan bũmb ning, Zʋrdẽ rʋʋnde ne Amoritsa dĩm dãmb a yiibã, a Siyõ la a Og, n kãab-b beedo.

¹¹D wʋma rẽ fãa tɩ d pɛlẽng yɩke, ned kam fãa vʋʋsem tulugda a yãoogẽ, tɩ Soaala, yãmb Wẽnnaama, n ya Wẽnd, yĩngr, saag zugu, la kaalẽ, tẽng zugu.

¹²La mam sẽn deeg yãmb neerã, wẽen-y ne y Wẽnnaama la y kõ-m kaseto tɩ y me na maan neere, maam ne m ba wã zak rãmba.

¹³Kõ-y-m kaset vẽenega tɩ y na bas ne yõore, m ba la m ma, m yaop la m kẽem dãmba; bãmb ne b sẽn so fãa na paam n põs kũum.»

¹⁴Dẽ la neb a yiibã leok-a: «Ad-d toga ne kũum d sã n ka yao foom f yel-sõmdã, la dẽn tɩ yãmb me tõog y noore n da wɩdg d sẽn waa n na n maan a soaba ye. Soaala-Wẽnd sã n wa bas tẽngã d nugẽ, d na maan pʋ-peelem ne foo la d kõn zã foo ne f buuda toog ye.»

¹⁵A Raab bao wĩir tɩ neb a yiibã tũ võore n looge, t'a rooga ra mee n dogla lal-gũbrã.

¹⁶A reng n yeel-b lame: «Yaa tãmsa sẽnẽ la y tog kẽng n paam n põs y bɛɛbã. Pa-y be rasem a tã tɩ sẽn yi-b yãmb baobã paam n lɛɛg n wa tɩ y yaool n le rɩk y sore.»

¹⁷Neba leok-a lame: «Fo kɩtame tɩ tõnd wẽene n kãab f bũmbu. Bãng tɩ tõnd kãabga na n pidsame la ad-fo me sẽn na n maanega:

¹⁸Fo sã n wa yãe tɩ d poogd tẽngã, ad makr ning d sẽn tog n yãende: Ad gĩs miuugu, dɩka n yagle tõnd sẽn tũud võor ning n sigdã la tigim do-kãng pʋga f ba, f ma, f tãopa la f buuda fãa.

¹⁹Ned ninga fãa sẽn ka paa rooga pʋga, sẽn saaga n yi yɩnga, na rɩ a zɩɩm daagr taale, dẽ ka pak tõnd ye. Ned sã n pa roogẽ wã ne foom tɩ b baas n sɩɩs-a, ad-a zɩɩma sã n daage tõnd n deegd a taale n dogl d zugu.

²⁰Fo sã n wɩdg ned a to bũmb ning sẽn wa ne tõnd ka wã, ad tõnd sẽn kãaba fãa me kõn le yals ye.»

²¹Paga leokame: «Bɩ yɩ boto!» La a bas-b lame tɩ b yi n looge. A loe gĩs miuugã a rooga võore.

²²Lɩɩsdba tũ tãnga sẽnẽ b paa be rasem a tãabo tɩ sẽn yi-b bãmb baobã wa lɛɛg n kẽ. Baoodba vɛɛsa sora zãnga n pa yãend-b ye.

²³Lɩɩsdba yaool n sigame n dʋʋg kʋɩlgã n leb a Nun biig, a Zozuwe, nengẽ. B togsa a Zozuwe b sẽn yãend fãa.

²⁴B yeela a Zozuwe: «Soaala-Wẽnd basa tẽnsa fãa d nugẽ la ad-a Israyɛl poorẽ, neba rigda rabeem wʋsgo.»