Read SEBR SÕNGO, 1998 Zozuwe 20 Bible Online

Zozuwe 20 - SEBR SÕNGO, 1998 bible

Zozuwe 20

¹Wẽnd yeela a Zozuwe:

²«Gom ne Israyɛl kamba la f yeel-ba: kõ-y mens soondg tẽnse m sẽn gom b rãmb yell ne a Moyiiz.

³Ned sã n yĩd n kʋ neda, tɩ raab wẽng ka lʋɩ sʋk bada, a tõe n zoe n tɩ soonda be n põs sẽn ki a soaba roagda sẽn dat n daag zɩɩm n dole.

⁴Yaa tẽn-bãmb pʋga la sẽn kʋ-a ned tog n zoe n kẽnge. A sã n ta tẽnga noore, a yaasdame n wilg nin-kẽemba a sẽn maan bũmb ninga. Bãmb n kẽesd-a tẽnga pʋga, n bao zĩig n kõ-a t'a zĩnd.

⁵Sẽn kʋ a soaba roagda sã n wa, n dat n dok a sũuri b ka yiisd-a n kõ-a ye. Tɩ pʋ-toog ka zĩnd ye, yɩɩ yĩdgu, ka tũ ne beem kʋdg ye.

⁶Sẽn kʋ-a neda tog n paa tẽnga pʋga n ta wakat ning b sẽn na n kao a bʋʋdo, n ta maan-kʋʋd kãseng ning sẽn so-a tʋʋmna wakat kãnga, kũum. Dẽ poor bal la a na n tõog n leb a tẽngẽ la a zakẽ.»

⁷Ad tẽns niyns b sẽn yãk tɩ na n yɩ soondg zĩiga: Kedɛs, Galile tẽn-peelmẽ, Neftali tãng zugu. Le paasa Sikɛm, a Efrayim tãnga zugu. Le paasa, a Zɩɩda tãnga zugu, Kiriyat-Araba, sẽn boond dũnna tɩ Ebrõ.

⁸[39†] Zʋrdẽ rʋʋnde, Zeriko yaanga, a Rubẽ tẽn-peelmẽ la weooga noorẽ, b yãka Besɛr. N yãk a Rubẽ soolmẽ, Ramot-Galaad, a Gad tẽn-peelmẽ. N yãk Golan, Bazã tãng zugu, a Manase tẽn-peelmẽ.

⁹Woto n yɩ tẽns niyns b sẽn yãk tẽnga kamba la sãamba yĩnga tɩ b na n yɩ soondg zĩisi ned ning fãa sẽn na n yĩd n kʋ a to yĩnga. La woto a tõogdame n põs sẽn ki-a wã roagda sẽn dat n daag a zɩɩm, n ta a bʋʋda wakato.