Read SEBR SÕNGO, 1998 Zozuwe 23 Bible Online

Zozuwe 23 - SEBR SÕNGO, 1998 bible

Zozuwe 23

¹Wẽnd sẽn kõ a Israyɛl t'a vʋʋs ne a bɛɛba n ka tak zabr, paam n kaoos a wʋsgo. A Zozuwe waa n kʋʋlame, a waa n lebga nin-kẽema.

²A Zozuwe tigma a Israyɛl, a nin-kẽemba, a taoor dãmba, a bʋ-kaoodba n yeel-ba: «Sã n ya maam, m kʋʋlame, m yʋʋm lebga wʋsgo.

³Yãmb mens yãee ne y nini, Wẽnnaam, y Soaala, sẽn maan bũmb ning ne sẽn da so-b tẽnga pĩndã. Yaa Wẽnnaam, y Soaalã, n sõng yãmba.

⁴Ade, m kõ-y-la wala y zu-noog pʋɩɩre, tẽns niyns y sẽn bas n pa wã wã, wala tẽns niyns m sẽn menes b nebã zãnga, Zʋrdẽ kʋɩlg n ta Mog kãsenga, wĩndga sẽn lʋɩtẽ.

⁵Wẽnnaam, y Soaala, n na n dig sẽn ket-bã y taoore. B na n pĩng-b-la yãmb taoore, y na n deega b tẽnsã n sooge wala b sẽn da kãab-y.

⁶Dɩlla, maan-y raoodo n deeg la y pids sẽn be a Moyiiz noora pʋgẽ n ka bʋdg goabga, n ka bʋdg rɩtgo.

⁷Da saag-y n fãoog y mense ne buud a taba sẽn ket n vɩ-b yãmb sɛɛgẽ wã ye. Da pʋd-y b wẽn-naandsa yʋʋre, da wẽen-y ne bãmba, da pʋg-y-ba, da wõgemd-y b taoor ye.

⁸Modg-y n tabend Soaala, yãmb Wẽnde, wala y sẽn maan n tãag rũnna.

⁹Na n tũu boto tɩ Wẽnd dig y taoore, buud sẽn labsa la sẽn tar pãng n yɩɩd yãmba, la ba a ye ka tõog-y, n ta rũnna ye.

¹⁰[45†] Yãmb nin-yend tõe n diga neb tusri, tɩ yaa Wẽnnaam meng b toore, n da zabd y yĩnga, wala b sẽn da kãabe.

¹¹Y sã n dat n põse bɩ y modg n nong Soaala, y Wẽnnaam.

¹²Y sã n sak wɩɩbdo n tɩ fãoog ne buud niyns sẽn yeg b yãmbã, n kẽ b buudẽ, tɩ b lebg y reem dãmba, tɩ y kẽed b tẽnsẽ tɩ bãmb me kẽed y tẽnsẽ,

¹³bãng-y tɩ wakat kãng tɛka Soaala, yãmb Wẽnnaam, kõn le rig-b yãmb taoor ye. La yãmb yĩnga b na lebga tãooga, n lebg bẽdgo, n lebg sãbsga y lugẽ, n lebg gõaag y nini al tɩ y wa tol n menem zãng, tẽn-sõng ning Soaala-Wẽnnaam sẽn kõ yãmba.

¹⁴M ka na n kaoos la m yi moog ye. Na n yɩɩ rũnna bala. Deeg-y y sũurẽ la y yamẽ tɩ kãab nood niyns Soaala, yãmb Wẽnnaam, sẽn kãab yãmba, ka pa vɩɩd ye. Ba a ye ka pa n ka pids ye.

¹⁵Bãng-y tɩ kãab nooda fãa sẽn pidsã, Soaala, y Wẽnnaama, tõeeme n pids kãab wẽnsa me. B tõeeme n menes yãmb tẽng ning b sẽn kõ yãmba pʋga.

¹⁶Sɩda, yãmb sã n sãam zood ning b sẽn yõg ne yãmbã, y sã n pʋg wẽn-naandsã, y sã n wõgemd b taoore, Soaala, yãmb Wẽnnaam, sũur na n puuga ne yã la y kõn kaoos n menem n zãag ne tẽn-sõng ning b sẽn kõ yãmba ye.»