Read SEBR SÕNGO, 1998 Zozuwe 3 Bible Online

Zozuwe 3 - SEBR SÕNGO, 1998 bible

Zozuwe 3

¹Yaa tõd-beoog la a Zozuwe yik ne Israyɛl kamba n yi Sitim n ta Zʋrdẽ la yaa kʋɩlga noor la b wẽ b sikã n gãand n gũ beoog vẽegre, n yaool n dʋʋg-a.

²Da-yɩten-daar pʋgẽ, taoor dãmba saaga sikã,

³n yeel nebã: «Y sã n wa yãend maan-kʋʋdbã, a Levi kamba, tɩ b tʋk b bãgdẽ, kuga walsa koglgã, bɩ y me yik n pʋg-ba.

⁴Gũus-y bal n bas yãmb ne koglga sʋka, vɩʋʋg sẽn ta kãntɩɩs tus a yiibu. Da pẽneg-y tɩ yɩɩg rẽ ye. Woto me la y bãngd sor ning, y sẽn na n tũ tɩ y zɩ n dɩk sora ye.»

⁵A Zozuwe yeela nebã: «Yɩlg-y mens beoog yĩnga, tɩ beoogo Naaba-Wẽnd na n maana bõn-bãna y nifẽ.»

⁶A yaool n yeela maan-kʋʋdbã: «Tʋk-y kuga walsa koglgã, n lʋɩ y neba taoore.» La b sɩd tʋka kuga walsa koglgã n lʋɩ neba taoore.

⁷Soaala-Wẽnd yeela a Zozuwe: «Dũnna bala m na kɩt tɩ f yʋʋra sɩng yiibu Israyɛl sʋka tɩ b bãng tɩ m bee ne foo wala m sẽn zĩnd ne a Moyiiz.

⁸Ad noor ning f sẽn na n kõ maan-kʋʋdba sẽn tʋk kuga walsa koglgã: ‹Y sã n wa ta Zʋrdẽ kʋɩlga bɩ y yaase.› »

⁹A Zozuwe yeela Israyɛl kambã: «Kolg-y n kelg Wẽnnaam, y Soaala, koɛɛga.

¹⁰Ad bũmb ning sẽn na n kɩt tɩ y bãng tɩ Wẽnnaam, y Soaalã, n be yãmb sʋka n na n pĩng y taoore Kanaã rãmba, Ititse, Ivitse, Perizitse, Zirgazitse, Amoritse la Zebuzitse.

¹¹Dũni Soaala zooda kaseto, kuga walsa koglg, n na n dʋʋg Zʋrdẽ kʋɩlga yãmb taoore.

¹²Bao-y neb piig la a yiibu: sak fãa pʋgẽ yaa nin-yend la y yãkda.

¹³Yaa maan-kʋʋdb n zɩt kuga wala koglgo; ad-y bãmb naoor sã n tabg Zʋrdẽ kooma, kooma na n welga a yiibu. Kooma sẽn zoet n watẽ wã na n yaasa wa lalga.»

¹⁴Neba sɩd yikame n na n dʋʋg Zʋrdẽ kʋɩlgã la maan-kʋʋdba n da be taoore n zɩt kuga walsa koglgã.

¹⁵Tigsg wakato Zʋrdẽ kooma da gãndgda a koagsã. Kuga walsa koglga zɩtba sẽn ta kʋɩlgã, b nao sẽn sɩɩs kooma,

¹⁶ad-y kooma sẽn da zoetã yalsa zĩig pʋgẽ n lebg wa bõn-taoko, n lebg wa lalg woto, n zãag zĩiga, n ta al Adam tẽnga sẽn yegd Sartã. Koom ninga sẽn digd Yamsem Mogrã pasgame n yals tɩ neba rʋʋg, Zeriko yegende.

¹⁷Kuga walsa koglga zɩtba yalsa soa, kʋɩlga sẽn kʋɩ wã sʋka, tɩ Israyɛl kamb fãa looge. Bãmb me dʋʋga Zʋrdẽ kʋɩlgã tɩ koom ka tol n madg b nao ye.