Read SEBR SÕNGO, 1998 Zozuwe 5 Bible Online

Zozuwe 5 - SEBR SÕNGO, 1998 bible

Zozuwe 5

¹Amoritsa dĩm dãmba sẽn be b Zʋrdẽ nin-taoore la Kanaã dĩm dãmb sẽn be Mog Kãsenga noore wʋmame tɩ Soaala-Wẽnd kʋɩɩsa Zʋrdẽ kʋɩlga Israyɛl kamba taoore n tãag b fãa gill sẽn waa n dʋʋge. Ad-y b sũura digemdame la b vʋʋsma tulgame.

²Soaala-Wẽnd yeela a Zozuwe wakat kãnga: «Saas kug-peel paklse tɩ b noora rɩt wa sʋʋga n le sɩng Israyɛl kamba bãong kẽesgo.»

³A Zozuwe sɩd saasa kug paklse wa sʋʋse n kẽes Israyɛl kamba bãongo, tãn-bil a ye zugu sẽn boond marsã tɩ keoog tãnga.

⁴Ad sẽn tũ ne bũmb ninga t'a Zozuwe wa kẽesd bãongo: Ezipt yiib poore, dapa fãa sẽn da sek-b zabr takre da kẽe bãongo la bãmb fãa ra kii we-raoogẽ.

⁵Yaool n yaa bãmb bala n da paam n kẽ bãongo. Kamb niyns fãa sẽn dog we-raoogẽ wã, Ezipt yiiba poore, n sɩng kẽna, da ka paam n kẽ bãong ye.

⁶[8†] Yaa yʋʋm pis-naas tõre la a Israyɛl ra kẽn we-raoogẽ la neb niyns sẽn da tõe n tak zabra fãa ra kiime. B sẽn ki wã, yaa b sẽn pa kelg Soaala-Wẽnd koɛɛga. Dẽ la Soaala-Wẽnd kãab-b tɩ b nif kõn teeg tẽng ninga b sẽn da kãab b ba-rãmbã, tẽng sẽn bund bĩisim la sɩɩdo.

⁷Yaa bãmb kamba n deeg b zĩiga. Yaa kom-bãmb la a Zozuwe kẽes bãongo. Kẽna sẽn da sɩng tɛka b ra ka le yãend vɩʋʋgo n kõog keoog ye.

⁸Bãongã sẽn kẽ n sɛ, buuda paa sika pʋgẽ n vʋʋse n tãag b ko-noog soobo.

⁹Naaba-Wẽnd yeela a Zozuwe: «Dũnna m dɩka Ezipt rẽgdã n gil-gil-a n lob yɩɩga.» Yaa rẽ yĩng la tẽnga boond tɩ Gilgal n tol n tãag rũnna.

¹⁰ [9†] Israyɛl kamba paa Gilgal la b maana tẽegra kibsa, kiuuga piig la a naas raare, zĩ-sobdo, Zeriko tẽn-nabrẽ.

¹¹Kibsa yɩ tɩ zaamẽ, bur sẽn ka lob bɩlle la ka-sẽedma wãbr daare, b naagame n dɩ tẽnga koodo.

¹² [10†] Dɩɩb ninga sẽn da yita yĩngrã ka le rʋʋg ye tɩ b paama tẽnga kood n dɩtẽ. Yĩngr dɩɩbã me sẽn ka le rʋʋgã, Israyɛl kamba me sɩnga, yʋʋmd kãnga, n dɩt Kanaã tẽnga sẽn da womd bũmb ninga.

¹³A Zozuwe da paam n pẽnega Zeriko tẽnga. A sẽn zẽk a neng yĩngri, a yãee Soaala-Wẽnd na-yir dao sẽn yɛs a taoore ne sʋ-sẽenga. A Zozuwe kolgame n sok-a: «Fo kẽeda tõnd bɩ f kẽeda d bɛɛbã?»

¹⁴Neda leokame: «M pa kẽed y bɛɛba ye, m yaa Soaala-Wẽnd Tãnsoaba, dẽ la m waoonga võore.» A Zozuwe lʋɩ-la a yãvabga n pʋʋse la a soke: «Yaa koe-bʋg la m zu-soaba wat n na n kõ-ma?»

¹⁵Soaala-Wẽnd Tãnsoaba yeelame: «Pidg f neooda tɩ zĩig ninga fo sẽn yɛsa yaa zĩ-sõngo.» T'a Zozuwe na n piid a neooda.