Read SEBR SÕNGO, 1998 Zozuwe 8 Bible Online

Zozuwe 8 - SEBR SÕNGO, 1998 bible

Zozuwe 8

¹Soaala-Wẽnd yeela a Zozuwe: «Da zoe rabeem ye, da yɛɛs ye. Yi ne tãb-biisa fãa n tak zabre ne Ayi rãmba. Ade, m sagenda f nugẽ Ayi dĩma, a nebã, a tẽngã, a soolma.

²Maan Ayi ne a dĩma wala f sẽn maan Zeriko ne a dĩma. Da bas-y neba ye, pʋɩ-y taab teedã la rũmsa bala. Maan yam n deng n solg tãb-biis kẽer tẽnga kudgẽ.»

³A Zozuwe yiisa a zab-zabdba fãa n tɩ wẽ tẽngã. A tũusa neb tus pis-tã sẽn mi zabr sõmb-sõmbo n kɩt tɩ b yi ne yʋngo,

⁴la a reng n yeel-b-la woto: «Ade, solg-y y mens neer tẽnga kudgẽ, da zãag-y ne tẽnga ye la ned kam fãa wɩng ne gũusgu.

⁵Maam ne neba sẽn kellã tõnd na n kolga tẽngã. Ayi rãmb sã n wa yi n na n seg tõndo, tõnd na n lɛɛg n zoeeme, wala pipi wã.

⁶B na n pʋga tõndo n wa zãag ne b tẽngã. B na n tagsa woto: ‹Ges-y b sẽn lɛɛg n zoet wala pĩndã.› Tɩ tõnd sɩd tar zoeese.

⁷Yaa wakat kãng la yãmb na n yi y sẽn da solg zĩig ningã n kẽ b tẽngã, la Wẽnnaam, y Soaala, na rɩk-ba n ning y nugẽ.

⁸Y sã n kẽ tẽngã bɩ y ning-a bugum. Yaa woto la y na n maan. Gũus-y tɩ yaa mam meng noore.»

⁹A Zozuwe basa neba tɩ b loog n tɩ soond Betɛl ne Ayi tẽnsʋka, Ayi nin-taoore. Yʋn kãnga a Zozuwe paa ne zãma wã.

¹⁰Vẽkẽmbeoogo a yika pĩnda n ges a nebã, n dɩk Ayi sore tɩ nin-kẽemb be a taoore.

¹¹Tãb-biisã sẽn da ketã pʋg-b lame n ta Ayi tẽnga nug goabga n wẽ b sika. Bok n da be sʋka.

¹²A Zozuwe yãka tãb-biis na ta tus a nu n solg-b Betɛl ne Ayi tẽnsʋka, Ayi nin-taoore.

¹³Zãma wã wẽe a sik tẽnga nug goabga, n yaool ning tãb-biis niyns sẽn tog n pa poorẽ wã tẽnga nin-taoore. Yʋn kãnga a Zozuwe paa bãg-faagẽ wã.

¹⁴Ayi dĩma sẽn yãe a Israyɛl sẽn segende a yika zãnd-zãnd n na n tak zabr ne-a. A siga ne a nebã n tees Yamsem Mogre. A ra ka mi tɩ tãb-biis n soond a tẽnga kudgẽ ye.

¹⁵A Zozuwe ne a neba pa yaas b taoor ye, b zoeeme n tees weoogo.

¹⁶B tigma tẽnga rãmb fãa tɩ b yi n dig-ba, tɩ b sɩd yi n na n dig a Zozuwe. Mik bãmb sẽn pʋgd a Zozuwe wã b zãaga ne b tẽnga.

¹⁷B fãa yiime. Rao ba a ye ka pa tẽngã n ka yi n pʋg a Israyɛl ye. B yii pʋgbo, n tar pʋgbo, n pa lebs n pag tẽnga kʋɩlens ye.

¹⁸Soaala-Wẽnd yeela a Zozuwe: «Zẽk f kãndã f sẽn zãadã n tees Ayi tɩ m na n ning-a-la f nugẽ.» A Zozuwe zẽka kãndã a sẽn da zãadã n tees Ayi.

¹⁹Nuga sẽn zẽke la sẽn da solg-ba sẽn yi n tar zoeese n tɩ kẽ tẽngã. Tẽnga pa-la b nugẽ, la tao-tao bal tɩ b ning-a-la bugum.

²⁰Ayi rãmb sẽn wẽnemd b poorẽ, bõe la b yãend yã? Bug-zõos sẽn nukd ne b tẽnga n kuiis yĩngri. Ned ba a ye ka le paam gãbe n na n wudg n leb goabg bɩ rɩtg ye. Woto bãmb sẽn da pʋgd neb niyns n tees we-raoogã, nin-bãmb n lɛɛg n digd-ba.

²¹B sẽn bãng tɩ sẽn da soond-ba kẽe tẽngã, b sẽn yãe tɩ tẽnga bug-zõos nukd n kuiis yĩngri, a Zozuwe ne zãma wã wẽnemda b neng n tak zabr ne Ayi rãmba.

²²Wakat kãng me tɩ sẽn kẽ-b tẽnga sãagame n yi n pẽoog Ayi rãmba sʋka. Ayi rãmb kii zãnga, ned ba a ye ka põs ye.

²³Dĩma bal la b yõk vɩɩga n wa kis a Zozuwe.

²⁴A Israyɛl kʋʋ Ayi tãb-biisa gilli, sẽn da pʋg-b we-raoogẽ wã, wala tẽnga noorẽ. Sʋʋga sẽn wa n dɩ b fãa n sɛ, a lɛɛg n kẽ Ayi, n kood sẽn kell-bã.

²⁵Sẽn ki-b baraare, pagb la rapa, yɩɩ tus piig la a yiibu.

²⁶A Zozuwe nuga sẽn da zẽk ne kãndã kell n zẽkame tɩ kãab wẽnga wa rɩ Ayi rãmb n sɛ.

²⁷A Israyɛl sẽn sooge yɩɩ Ayi laogo la a rũms bala tɩ boto la Soaala-Wẽnd ra yeel a Zozuwe.

²⁸A Zozuwe kɩtame tɩ b yõog Ayi tẽngã; a lebga yi wãando la raboogo n ta rũnna.

²⁹A bao tɩɩga n luul Ayi dĩma t'a pa be n ta zaabre. Wĩndg sẽn lʋɩ, a kɩtame tɩ b sik-a. B loba a yĩnga tẽnga noore n wʋk kug n zam-a, la kuga saong ket n bee ne rũnna.

³⁰ [14†] A Zozuwe mee maan-kugr a Israyɛl Wẽnd la a Soaala yĩnga, Ebal tãng zugu,

³¹[15†] wala Soaala-Wẽnd tʋʋm-tʋmd a Moyiiz sẽn da wilg Israyɛl kamba la a sẽn da gʋls a noora sebrẽ. Maan-kugra mee ne kug sẽn ka pees ne lar ye. Yũ-noog maand la b kʋ yã, n paas laafi kosg maand, maand sẽn na n dɩ ne sũ-noog Wẽnd taoore.

³²A Israyɛl yĩnga, a Zozuwe gʋlsa Noorã kug zugu. Yaa noor ninga a Moyiiz sẽn da gʋls Israyɛl kamba fãa taoorã.

³³Israyɛl neba gilli ne nin-kẽembã, ne taoor dãmbã, ne bʋ-kaoodbã, fãa ra yɛsa yĩngri, kuga walsa koglg goabg la rɩtgo. B ra yɛsa Levitsa sẽn ya maan-kʋʋdba la sẽn zɩt-b kuga walsa koglg taoore ne sãamba la tẽnga dãmba, tɩ pʋɩ-sʋk tees Garizim tãnga, tɩ pʋɩ-sʋk tees Ebal. Soaala-Wẽnnaam tʋʋm-tʋmd a Moyiiz da yeelame tɩ b maan boto, n kãab a Israyɛl kãab noodo.

³⁴Dẽ poore a Zozuwe karma sẽn be sebra pʋgẽ zãnga, kãab noodã wala kãab beedã, n tũ sẽn gʋlsa zãnga.

³⁵[16†] A Zozuwe ka karem n long gom pɛdg meng ye. Neba fãa gill kelg-b lame, pagba la kom-bõonego, sãamba sẽn da nok Israyɛl.