Read SEBR SÕNGO, 1998 1TIMOTE 1 Bible Online

1TIMOTE 1 - SEBR SÕNGO, 1998 bible

1TIMOTE 1

¹Maam a Pol sẽn lebg a Zezi Krista Tʋʋm-tʋmd ne Wẽnnaam d Fãagda noore, la Krista a Zezi, d Teegda, raabo,

²[1†] maam n pʋʋsd a Timote, m bi-roak menga, tẽeba pʋgẽ. Bɩ Wẽnd Ba la Soaal a Zezi Krista sudg foom b nimbãan-zoeere kũuni la b laafi!

³M sẽn waa n dabd Masedoan, m kos-f lame tɩ f pa Efɛɛz la f sõng tɩ neb kẽer bas b zãms paala,

⁴la b lak b mens ne solem vɩʋʋdo, ne saam-dãmb dot sõt-n-ka-sɛtẽ, sẽn wat ne no-koɛɛma n yɩɩd b sẽn pukd Wẽnd sẽn yals bũmb ning ne tẽeb kũuni.

⁵M da kos-f la rẽ tɩ m datẽ lame tɩ taab nonglma yɩ pʋ-peelem bũmbu, n ka naag ne zãmbo bɩ tẽeb sẽn kedb ye.

⁶Neb kẽer ka sak rẽ n kẽ moogo, tɩ b goama lebg goam vɩʋʋdo;

⁷b tẽedame tɩ b yaa Noora karen-saamb bɛda mik b ka tar b goama sore, la b ka mi sẽn ya zabr ning tãnsobend la b reegr ye.

⁸Sɩda, d miime, Noora yaa sõmbo d sã n dat-a ne a sẽn wat ne bũmb ningã,

⁹tɩ y mi tɩ b pa yiis-a nin-sõng yĩng ye: yaa tʋb-pa-wʋmda, tõata, sẽn ka pʋʋsda Wẽnde, yel-maanda, wẽn-tʋʋsa, wẽnd bɛyã, ba la ma kʋʋda, nin-kʋʋda,

¹⁰yoaada, ra-taad-noanga, yembs koaasa, tẽn-wãada, zirẽ-be-neda, pʋlen-sãamda la sẽn tʋmda tʋʋm niyns fãa zãmsg sõnga sẽn gɩdgde.

¹¹La zãmsg sõngã yaa Koe-noogã Wẽnd sẽn bobl maam a soabã, Wẽnd ning sẽn pida ne ziiri la a ya sũ-noog buud fãa yẽgrã.

¹²M pʋʋsda sẽn ko-a maam pãnga: a Zezi Krista, tõnd Soaalã. B tagsame tɩ m na tõog bãmb tʋʋmnã la yaa rẽnd yĩng la b bool maam,

¹³[2†] maam ne m yɩ wẽn-kɩɩs pĩnda, maam ne m nams m taaba la m yaal-ba. B kõ-m la sugri, tɩ m da ka mi ye, tɩ m da ket n yaa tẽeba sãana.

¹⁴Yaa tẽeb la nonglem ning sẽn pid Krista a Zezi la b sudg maam n daale.

¹⁵Gomd sẽn ya sɩda tɩ b tog n deeg-a zãng la woto: Krista a Zezi waa dũnia n na n fãag yel-wẽn-maandba la maam, maam la pipi.

¹⁶La m sã n paam tɩ Krista zoe m nimbãanega, yaa sẽn na n yɩla tɩ Krista reng ne maam n puk b sũ-maasem zãnga la b kɩt tɩ m lebg makre neb niyns sẽn na n tẽ-b bãmb n paam vɩɩm sẽn kõn sɛ wã yĩnga.

¹⁷Bɩ zamaan fãa Dĩma, kõn-luk-m-zĩigẽ soaba Wẽnde, nif sẽn ka tõe n teege, sẽn ka be taare, bɩ b paam pẽgre la ziir sẽn kõn sɛ, tɩ yʋʋm tong taab n tõt sɛɛbo. Ami!

¹⁸Ad-m sẽn yet tɩ f gũus ne bũmb ninga, m biiga Timote, la zĩ kanga m zemsa ne bãngra goama sẽn da yiis f poorẽ al daar zãra, tɩ f tog n maan tẽegre la f zab zab-sõngã,

¹⁹ne tẽeb la f pʋ-peelma; ad yaa rẽ n paoog neb kẽere, la b tẽeba looga wa koom sẽn lood ne a sẽn vele.

²⁰Ada Imene, ada Aleksãndr. M kong n bas-b-la ne Sʋtãan tɩ b bãng yam la b ra le saag n tʋʋs Wẽnd ye.