Read SEBR SÕNGO, 1998 A Filemo 1 Bible Online

A Filemo 1 - SEBR SÕNGO, 1998 bible

A Filemo 1

¹Maam a Pol sẽn be roogẽ Krista yĩnga, ne m saam-biig a Timote n pʋʋsd d zoa la d sõangd a Filemo,

²[1†] d tão sõnga Afia, d ba-biig la d tʋmd-n-taaga a Arkip la Tigenga kamb fãa sẽn segd taab a zakẽ.

³Wẽnnaam d Ba la Soaala Zezi Krista sik y fãa zutu b bark la b laafi!

⁴M tara Soaala bark pʋsgo f yĩnga la m tẽegda f yell m pʋʋsg pʋgẽ.

⁵M wʋmdame tɩ b tar-f pẽgre. Yaa Krista a Zezi bɩ nin-sõma wã poorẽ, b pẽgda f nonglem la f tẽebo.

⁶Wẽnd na kɩt tɩ f tẽeba yals foo sõng-taab-tʋʋmda zugu. Wẽnd na kɩt t'a vẽneg f yam zãnga tɩ f yãend bõn sõng ning fãa d sẽn tõe n maan Krista yĩnga.

⁷La sɩda m paama sũ-noog kãsenga la m sũura gãandame, m sẽn wʋm f nonglma ne f taaba kibare; b yeel-m lame, m saam-biiga, tɩ f maasa nin-sõma wã sũuri.

⁸Dẽ n so tɩ ne m sẽn tõe n soond Krista maasmẽ n gom-f vẽenega la m wilg-fu f sẽn tog n maane,

⁹m baas n tʋlgame n lʋɩɩs nonglma taoore la m kos foom m kosgo. Sẽn na n goma wã, ya a Pol, yaa nin-kẽem a Pol, ya b sẽn balg a soab bãeens marsã, Krista a Zezi yĩngã.

¹⁰[2†] M kosga yaa m biiga yĩnga, biig ning m sẽn dog m bãeensa roogẽ, t'a reeg yʋʋr a Be yõodo (Onezim).

¹¹Nin-kãng tʋʋmd ka naf-f pĩnd ye la marsã a na zĩnd yõodo, foo wala mam yĩnga.

¹²M lebsd-a la f nengẽ la ad-a lebga m sũur neda.

¹³M da nongẽ lame t'a pa m sɛɛgẽ n tʋm fo ziigẽ, m bãeensa roogẽ, tɩ f mi tɩ Koe-nooga yĩnga b balg-m lame.

¹⁴La ad-m pa tʋlg n maan fɩ tɩ f zɩ tiir ye, tɩ m pa rat tɩ yel-sõmda tũ ne moadg ye; m datame t'a yɩ yamleoog bũmbu.

¹⁵Tõeeme marsã t'a Onezim sẽn da zãag ne foom bilfr bala bɩ a lebg f soolem yʋʋm tõt sɛɛbo.

¹⁶La kõn le yɩ wala f yem-daoog ye, a lebga f babi-nongre. A sẽn lebg mam bi-nongr mengã, zamaana rãmb nifẽ, wa Krista nifẽ, fo nengẽ wã na yɩɩg boto.

¹⁷Bɩ f ges bũmb ning sẽn be tõnd d yiiba sʋka la f reeg-a wa mam menga.

¹⁸Tõe t'a ra beeg-f lame bɩ a ra looga ne f bũmbu, bɩ f bas tɩ rẽ paka maam marsã.

¹⁹Maam a Pol meng n lʋɩɩsd m toogo, n gʋlsd-f woto ne m nugu: maam n na n yao. La rẽ yaa m sẽn pa rat n gom samd ning f sẽn tog n yao-ma; yaa fo menga la f tog n dɩk n yao maam.

²⁰M saam-biiga, Soaala yĩng bɩ f ra zãgs m kosg ye; maag m sũur Krista yĩnga.

²¹M gʋlsd-f la ne saagr kãsenga tɩ f mii noor deegre; m tara kaset meng tɩ f tõe n kõome tɩ yɩɩd m sẽn kot fooma.

²²M sẽn paasd yaa f segl m gãag roogo, tɩ ne yãmb pʋʋsgo, m na n leba y nengẽ.

²³ [3†] A Epafras tɩ m pʋʋs-fo: m sẽn kẽ roog Krista a Zezi yĩngã, yẽ la m sõsd-n-taaga.

²⁴[4†] Sẽn sõngd-b maama tɩ m pʋʋs-fo: a Mark, a Aristark, a Demas ne a Luk.

²⁵Soaala a Zezi Krista bark zĩnd ne-fo!