Read SEBR SÕNGO, 1998 1PIYƐR 3 Bible Online

1PIYƐR 3 - SEBR SÕNGO, 1998 bible

1PIYƐR 3

¹ [13†] Yãmb me, pagba, sak-y y sɩdb-rãmba. Sɩdb-rãmba kẽer pa rat n deeg Koe-nooga ye la b pagba vɩɩm sõngã n na n tak-ba tɩ pa tũ ne b noor gomd ye.

²Rẽ yaa b sã n ne tɩ y zãaga y mense ne yoob n tog ne waoogre.

³[14†] Bɩ y faongã ra yɩ faong sẽn ne yɩng ye, faong sẽn baood ne zoobd pãnengo, sãnem teedo la fʋ-neeb ye.

⁴Faongã tog n yɩɩ pʋgẽ faongo: yaa sũur sẽn ka sak wẽnga, n tar bʋgsem, n ka mi fudgr ye. Dẽ n be neer Wẽnd nifẽ.

⁵Ya woto la pĩnd pʋg-sõma wã sẽn da tẽed-b Wẽndã ra baood b faong la b sakd b sɩdb-rãmba.

⁶[15†] Woto la a Sara ra sakd a Abraam la a boond-a t'a zu-soaba. Yãmb me lebga yẽ kamba yãmb sã n baood neere n zĩ wɩsa n pa yɛɛsd bũmb ba a ye.

⁷ [16†] Sã n ya yãmba, sɩdb rãmba, zĩnd-y ne y pagba ne wʋm taab yam, wa ne zĩnd-n-taaga sẽn ka tar pãng wʋsg ye. Kõ y pagã a waoogr pʋɩɩre, wa neb sẽn naag taab n dɩt beoog vɩɩma yõodo. Woto bũmb kõn sãam yãmb pʋʋsg ye.

⁸M sẽn kot bũmb zãnga, yaa y fãa yɩ yam yɛnga, ne taab kũmbu, ne taab nonglem, ne taab nimbãan-zoeere la ne yam-sulgri,

⁹n ka lebsd wẽnga, n ka lebsd tʋʋr lɛ-lɛ. Yãmb yee n kãab noogo la y ra kãab beed ye, tɩ b welg-y la toore, sẽn na n yɩlẽ tɩ y wa rɩ pʋlemd nooga yõodo.

¹⁰Sɩd me ned ninga sẽn baooda a yõore la a rat vɩɩm noogo, bɩ a paam-a, a yõk a zelemde la a vẽ ne goam wẽna la zirẽ-beedo.

¹¹A zãaga meng ne wẽnga la a maan neere, n bao laafi la a wɩng n wa paam-a.

¹²[17†] Soaala neng togla nin-sõma la b tʋb kelgda b pʋʋsgo. Soaala nini yaool n gẽenda sẽn maand-b wẽnga.

¹³Yell bʋg n tõe n pak yãmba, yãmb sã n baood neer ne y sũur fãa?

¹⁴Ad-y y zug yaa noogo y sã n pʋs n namsdẽ y sõmblema na paas yĩnga; dɩlla da zoe-y rabeem ye la y ra bas tɩ sũur kiuus ye.

¹⁵[18†] Y sẽn tog n maane, yaa waoogd Soaala, Wẽnd Nedã, y sũurẽ la rẽ tɩ y bob n yɛsame n na leok sẽn na n soka yãmbã: bõe saagr la y zĩi n saagdẽ?

¹⁶Leok-y ne sũ-bʋgsem la waoog taab yam, wa neb sẽn mi tɩ b sũur ka kiuusd ye. Woto b sẽn wɩt yãmb bũmb ning poorẽ wã na n lɛɛg n pids ne yãnde neb niyns fãa sẽn sãbsd y vɩɩm sõngã, Krista tũudma pʋgẽ.

¹⁷Maan neer tɩ b nams fo, Wẽnd sã n data, n são maan wẽnga n paam yĩn-maasem.

¹⁸Krista meng kii vugri, yel-wẽna yĩnga. Sẽn ka tar-a yelle kii yell maandb yĩnga, sẽn na n yɩlẽ n tall-do n taas Wẽnde. B yĩngẽ wã la b lebg-bõn kɩɩnga, b sɩɩgẽ wã b kell n yɩɩ bõn vɩɩga.

¹⁹B sɩɩgã n tol n taas Koe-noogã neb niyns sẽn da pag roogo.

²⁰[19†] Bãmb dãmb n zãgs tẽeb pĩnda, Wẽnd sũ-maasma wakato, a Nowe sẽn waa n kaad a koglga wakato, tɩ yaa koglg kãng pʋga la neb sẽn paoode, neb a nii bala, paam n dʋʋg kooma n põse.

²¹Dẽ me n makd sooba sẽn fãagd yãmb me marsã. Ka yĩnga rẽgd la a pekd ye, a kɩtame tɩ ned kam fãa rɩk a menga n ko Wẽnd ne pʋ-peelem, A Zezi Krista sẽn vʋʋga yĩnga.

²²Bãmb n dʋ arzãna n zĩ b Ba rɩtgo la rẽ tɩ b reng n tõoga yĩngr Sõgen-kambã, yĩngr Kãsem-dãmbã, la Pãn-dãmba fãa.