Read SEBR SÕNGO, 1998 1PIYƐR 4 Bible Online

1PIYƐR 4 - SEBR SÕNGO, 1998 bible

1PIYƐR 4

¹Dɩlla Krista sẽn yãend toog woto, b yĩngẽ, bɩ tagsg kãnga wa kõ-y raoodo. Ned ninga sẽn yãenda toog a yĩngẽ, yẽ soab laka a meng ne yel-wẽnde;

²n na n vɩɩnd tẽng zug vɩɩma marsã, wala Wẽnd sẽn date; ka na n le yɩ wa zʋg wẽnga sẽn dat ye.

³Y sẽn yik pĩnd n tũ bu-zẽmba raabã, ka sek-y sɩda? Yãmb saka b yoobo, b yel-yoodo, b rã-tɩgre, b rɩ-bɛda, b yũud n pa roogdẽ, b bõn-naands waoog yoodo.

⁴Ad-y yãmb sẽn pa le naag bãmba n dʋʋg kʋɩl ning sẽn na n dɩ-bã, b pa wʋmd a võor ye. Dẽ la b yik n tar yãmb paoogre marsã.

⁵Mik rẽ fãa na n waa Bʋ-kaood yɛnga taoore, sẽn vɩ-b la sẽn ki-b Bʋ-kaoodã.

⁶Ad-y yaa rẽnd yĩnga la kɩɩm-kulga meng paam tɩ b moon Koe-noogã, woto ninsaalb sẽn paalg b rãmb bʋʋd tẽng zugã tõog n paama yĩngr vɩɩma Wẽnd nengẽ.

⁷Ad-y Dũni wã yikr kolgame; bɩ y yɩ neb sẽn tar gũusgu la y yõk y menga n tõog n pʋʋse.

⁸[20†] Bũmb zãnga tall-y taab nonglem tɩ nonglem luta yel-wẽna.

⁹Maan-y taab gãag-sobẽndo sẽn ka naag ne yẽgeng ye.

¹⁰Bɩ ned kam fãa yik n sõnga taaba wala a sẽn paam tɛka, wala y lebga Wẽnd kũun ka tɛka pʋɩtb-a.

¹¹Ned sã n gomd bɩ a gom wa Wẽnd sẽn gomde. A sã n deeg taab sõngr tʋʋmde, a sõng wala Wẽnd n kõta noore. Woto bũmb fãa pʋgẽ Wẽnd na paam pẽgre, Krista a Zezi maasmẽ. Bãmb n so naam la ziir sẽn ka sɩng la sẽn kõn zĩnd sɛɛbo. Ami!

¹²M kom-sõma, da yɛɛs-y bugum ninga sẽn wulumd yãmb sʋka wa bõn-lingdem ye tɩ yaa Wẽnd n dat n fɛɛs yãmba.

¹³Y sã n naag Krista n namsdẽ bɩ y noog y sũuri tɩ b ziira pukr daare y na naag n lang la y kɩdem sũ-noogo.

¹⁴Sã n ya Krista yʋʋr yĩng la b yaand yãmba, yãmb zug yaa noogo. Ad-y yaa Wẽnd Vʋʋsem ne b zɩiri, Wẽnd Vʋʋsem n sig yãmba.

¹⁵Bɩ yãmb ned ba a ye ra wa namse, a sẽn ya nin-kʋʋd, bɩ wagdr, bɩ tẽn-wãad, bɩ tẽn-kãn neda yĩng lɛ-lɛ!

¹⁶A sã n namsdẽ bɩ yɩ a sẽn tũud Krista yĩnga; a ra zoe yãnd ye la a pẽg Wẽnd tɩ b Yʋʋr n lebg yẽ me rẽnna.

¹⁷Ad-y wakata taame tɩ bʋʋda na n sɩnge ne Wẽnnaam meng zaka neba; la sã n ya ne tõnd la bʋʋda na n sɩnge, sẽn tõdg b Wẽnnaam Koɛɛga reegrã, bãmb dãmb baasg na n yɩɩ wãna?

¹⁸[21†] Nin-sõng paam n põs sã n ka naana, nin-wẽng la yel-wẽn-maand na n kẽe yɛ?

¹⁹Dẽn yĩnga bɩ Wẽnd sẽn tʋlg b rãmb ne namsgo dɩk b mens n bas ne b Naanda la Sɩd Soaba la b wɩng ne neer maanego.