Read SEBR SÕNGO, 1998 Bʋ-kaoodba 1 Bible Online

Bʋ-kaoodba 1 - SEBR SÕNGO, 1998 bible

Bʋ-kaoodba 1

¹A Zozuwe kũum poore a Israyɛl soka Soaala-Wẽnde: «Ãnda n na n babs Kanaã rãmb pipi n tak zabr ne ba?»

²Tɩ Soaala-Wẽnd leok: «Na n yɩ-la a Zɩɩda; m na rɩk tẽngã n sagl a nugẽ.»

³Dẽ n so t'a Zɩɩda me yeel a Simeõ: «Yãag maam m pʋɩɩr tẽngẽ tɩ d zab ne Kanaã rãmba. Dẽ poore m me na yãag foom f soolmẽ n zab n sõng-fo.» A Simeõ sakame.

⁴A Zɩɩda dʋʋ n paama a bɛɛbã la Naaba-Wẽnd dɩk-b lame n sagl a nugẽ, yɩɩ Kanaã rãmba n paas Perizitse. Bezɛk tẽnga b kʋʋ neb tus piiga.

⁵Sɩd yaa Bezɛk la b seg dĩm a Adoni-Bezɛk. B taka zabre la b tõoga Kanaã rãmb la Perizitse.

⁶Dĩma Adoni-Bezɛk loba nao, la b sẽn dig-a n yõke, b fiuusa a nug-raado la a nao-raado.

⁷Dẽ la a Adoni-Bezɛk yeel yã: «Dĩm dãmb pisopoe n ka le tar nug-raad la nao-raad n vũnumd, m dɩɩba roagendga tẽngre, n wʋkd dɩ zeremse. M sẽn maan m taaba la Wẽnd dol-ma.» B tall a lame n kẽng Zerizalɛɛm la a tɩ kii be.

⁸A Zɩɩda neba taka zabr ne Zerizalɛɛm dãmba. Bãmb n tõoge la b kooda tẽnga rãmb ne sʋʋse n lɛɛg n yõog tẽnga bugum.

⁹Zɩɩda neba yaool n sigame n zab ne Kanaã rãmba; kẽer da ti b rot tãnga zugu, tɩ kẽer be Negɛb, tɩ kẽer be tẽn-nabrẽ.

¹⁰Dẽ poore yɩɩ zabre ne Kanaã rãmba sẽn da kẽed Ebrõ. Yaa Ebrõ la b sẽn da boond pĩnd tɩ Kiriyat-Araba. B tõoga dĩm dãmba, a Sesayi, a Ayiman la a Talmayi.

¹¹B yii be n tɩ zab ne Debir dãmba. Debir da boondame tɩ Kiriyat-Sefɛr.

¹²A Kalɛb yeelame: «Ned ninga sẽn na n tõog Sefɛr, m na rɩk m bi-pugla, a Aksa, n kõ-a t'a maan a paga.»

¹³A Otniyɛl n tõog Sefɛr tẽnga. Yẽ yaool n da yaa a Kenaz biiga la a Kenaz yaa a Kalɛb yẽere. A Kalɛb sɩd dɩka a Aksa n kõ-a.

¹⁴A Aska sẽn ta a Otniyɛl zakẽ, a sagl-a lame t'a kos a Kalɛb pʋʋgo. Paga ra zomba bõanga la a sẽn sigi, a Kalɛb sok-a lame: «Yaa bõe la f rata?»

¹⁵T'a leoke: «M kot-y-la kũuni, y sẽn kõ-m vẽenem Negɛb bɩ y kõ-m koom zĩisi.» A Kalɛb kõ-a-la zĩis sẽn tar koom, tãnga zug la tẽn-nabrẽ.

¹⁶A Moyiiz rɛɛmba yagense, Kenitsa, yãaga a Zɩɩda kamba. B yii komsa tẽnga n dig Zɩɩda we-raoogẽ sẽn be Arad nug rɩtgo. B waa n fãooga ne Israyɛl.

¹⁷A Zɩɩda yãaga a Simeõ, a saam-biiga. B tõoga Kanaã rãmb sẽn da kẽed Sefat la b kãaba tẽnga beedo. Yaa rẽ yĩng la tẽnga boond tɩ Orma, raboogo.

¹⁸Gaza ne a tẽn-peelma lʋɩ-la a Zɩɩda nugẽ, n paas Askelõ ne a vẽenema, Ekrõ me ne a vẽenema.

¹⁹Soaala zĩnda ne a Zɩɩda t'a tɩ wẽ tãnga zug rãmba. Sã n ya bãoogẽ dãmba, a pa tõog bãmb ye, tɩ b ra zaoo kut bilim-bilm.

²⁰B rɩka Ebrõ n kõ a Kalɛb wala a Moyiiz sẽn pĩnd n togse, yẽ n tõog a Anak kamb a tãabã.

²¹[1†] A Bẽnzame kamba ka rig Zebuzitsa sẽn da kẽed Zerizalɛɛma ye, la al ne rũnna, Zebuze rãmb ket n bee Zerizalɛɛm ne a Bẽnzame kamba.

²²A Zozɛf kamba dʋʋ Betɛl la Soaala-Wẽnd pʋga b poore.

²³A Zozɛf kamba tʋma lɩɩsdba, Betɛl tẽnga. Betɛl da boondame tɩ Luz.

²⁴Lɩɩsdba yãee ned sẽn yit tẽnga pʋga, tɩ b yeel-a: «Daoa, wilg d zĩig ninga d sẽn tõe n paam n kẽ tẽngã tɩ d na bas f ne yõore.»

²⁵La a wilg-b-la b sẽn tõe n tũ zĩig ninga n paam n kẽ tẽnga pʋga. B kẽe n kooda tẽnga rãmb ne b sʋʋse; sẽn põs yaa raoã ne a zaka la a ba-biisi.

²⁶Nin-kãng n kẽ Ititsa tẽn-peelmẽ n me a tẽnga n pʋd-a t'a Luz. Yʋ-kãng la b ket n boonda ne rũnna.

²⁷A Manase pa zab n tõog Bɛt-Seã la a tẽn-toos ye. A pa tõog Taanak ne tẽns niyns sẽn kẽed-b yẽ ye. A pa tõog Dor ne a tẽn-toos ye. A pa tõog Yibleam ne a tẽn-toos ye. A pa tõog Megido ne a tẽn-toos ye. Kanaã rãmba kell n pa b tẽn-peelmẽ.

²⁸[2†] A Israyɛl sẽn wa n mik t'a pãnga paasame, dẽ marsã la a yaool n modg-b ne tʋʋma la a pa rig-b n yiis ye.

²⁹[3†] A Efrayim me ka tõog n yiis Kanaã rãmba sẽn da be Gezer ye. Kanaã rãmba naaga a Efrayim n kẽed Gezɛr.

³⁰A Zabulõ ka tõog n dig Kitrõ la Naalal dãmb ye. Kanaã rãmb paa ne a Zabulõ la yaa bãmb n da so kooma yõngre la raada wesbo.

³¹A Asɛr pa tõog Ako, Sidõ, Alab, Akzig, Elba, Afik la Reob dãmb ye.

³²A Asɛr kamba kong n naaga Kanaã rãmb sẽn da vɩ bãmb sʋka la sẽn yɩ-b tẽnga pipi soaalba.

³³A Neftali kamb ka rig Bɛt-Semɛs la Bɛt-Anat rãmb ye. A tɩ kẽe n naaga Kanaã rãmba sẽn da so tẽngã, b kɩtame bala tɩ Bɛt-Semɛs la Bɛt-Anat rãmb soog tʋʋma n tʋmnẽ.

³⁴Amoritsa ka bas a Dã kamba tɩ b sig tẽn-nabrẽ ye, b paalg-b-la tãnga zugu.

³⁵Amoritsa paa Ar-Eres, Ayalõ, Salabim tẽnga. A Zozɛf sẽn wa n mik t'a pãng paasame a kẽes-b-la tʋʋmde.

³⁶Edomitsa toaaga sɩngda Akrabim tãng pennẽ, sɩngda pĩigã sẽn pukẽ wã n kuiis yĩngri, tãnga zugu.