Read SEBR SÕNGO, 1998 Bʋ-kaoodba 13 Bible Online

Bʋ-kaoodba 13 - SEBR SÕNGO, 1998 bible

Bʋ-kaoodba 13

¹Israyɛl kamb le sɩngame n maan sẽn ka tat Naaba-Wẽnd yam tɩ Wẽnd bas-b Filisti rãmb nugẽ, yʋʋm pis-naase.

²Ned n da be Sorea t'a yʋʋr boond tɩ Manoa, a Dã sakẽ. A paga ra yaa pʋg-kiiri n da ka tar biig ye.

³Soaala-Wẽnd lika pagã n yeel-a: «Fo yaa pʋg-kiiri n ka rog biig ye.

⁴La marsã tɛka, maan gũusgu! Da yũ rãam la sẽn wẽnd rãam buud ye. Da wãb rũn-dẽgd ye.

⁵F na n dɩka pʋga n dog biiga. Barg da sɩɩs a zug ye, tɩ b na n dɩk-a lame n kõ Soaala-Wẽnde t'a nan ket a ma pʋgẽ. Yẽ n na n fãag a Israyɛl, Filisti rãmb nugẽ.»

⁶Paga bʋʋga a sɩda n yeel-a: «Wẽnd nin-sõng n gom ne maam la f sã n yãee a sẽn yaa a soaba, bãng malɛka. A yãeeb wata ne yɛɛsgo. M pa sok-a a sẽn yitẽ ye, la yẽ me ka togs maam a yʋʋr ye.

⁷La ad-a sẽn yeel-ma: ‹F na n dɩka pʋga la f na n doga biiga. Marsã tɛka da le yũ rãam la rãam buud ye, da wãb rũn-dẽgd ye, tɩ biiga na n yɩɩ Wẽnd pʋɩɩr a ma pʋgẽ n tãag a kũum.› »

⁸A Manoa goma woto ne Wẽnde: «Soaala, m kot-y lame tɩ y sẽn tʋm ned ninga le lɛɛg n wa n wilg d sẽn na n maan bũmb ning ne biigã, a rogem poore.»

⁹Naab a Wẽnd deega a Manoa kosgo la malɛka le waame dẽ tɩ paga ra zĩi a pʋʋgẽ a ye. A sɩda ra ka be ne-a ye.

¹⁰Paga yika tao-tao n bʋʋg a sɩda n yeel-a: «Ad ned ninga sẽn lika maam nin-daarẽ wã le waame.»

¹¹A Manoa yikame n pʋg a pagã n ta raoa nengẽ n yeel-a: «Yaa yãmb n gom nin-dãarẽ ne pʋg kãnga bɩ?» La a leokame: «Yaa maam!»

¹²T'a Manoa le sok n paase: «La y sẽn yeela sã n wa pidsi bõe la d na n maan biiga poorẽ?»

¹³Soaala-Wẽnd malɛka yeela a Manoa: «Bũmb ning fãa sẽn ya kisgu paga yĩnga, a yɩ kisgu ne biiga me.

¹⁴Bugsuntungu, rãam, rãam buud fãa, rũn-dẽgd buud fãa, paga ra sɩɩs ye, a reeg noy-niyns fã m sẽn kõ-a.»

¹⁵Dẽ la a Manoa leok malɛka: «M kotame tɩ y pa ne tõnd tɩ d yõk d bullã n maan zẽed bilfu n kõ yã.»

¹⁶A Manoa ra ket n ka mi tɩ yaa Soaala-Wẽnd malɛk ye. Tɩ malɛka na n leok-a: «Ba m sã n sak gõogrã m kõn sak n dɩ bũmb ye. Sã n ya maoong la f rat n kʋ bɩ f kʋ-a Naaba-Wẽnd yĩnga.»

¹⁷A Manoa yeelame: «La yãmb yʋʋr la a bõe tɩ d tõog n pʋʋs d zaamẽ, yɛla sã n taase?»

¹⁸[19†] Malɛka yeelame: «Bõe yĩng la f rat n bãng m yʋʋre? Ad yaa yʋ-bãnde.»

¹⁹A Manoa rɩka bullã n paas kũun a taaba la a yõog-b-la pĩig zugu tɩ b rɩ bugum zãnga, Wẽnd ning tʋʋm sẽn ya tʋʋm bãna yĩnga.

²⁰Maan-kugra bugum dʋʋ yĩngri t'a Manoa ne a paga yãe malɛka sẽn tũud-a n dʋʋda. Dẽ la b wõgemd b neng tẽnga.

²¹Malɛka ka le lik a Manoa ne a paga ye la woto b bãngame tɩ sɩd yɩɩ Soaala-Wẽnd n da tʋm-a.

²²A Manoa yeela a pagã: «Tõnd na n sɩd kiime tɩ d yãee Wẽnde.»

²³La paga leokame: «Wẽnd sã n da ratẽ tõnd kũum b kõn deegẽ d maoonga la d kũuna la d kõn paamẽ n bãng d sẽn wʋma ye.»

²⁴Paga wa n doga biiga n pʋda a yʋʋr Sãmsõ. Biiga bɩɩme, ne Naaba-Wẽnd barka,

²⁵la yaa a Dã sikẽ, Sorea ne Estaol tẽnsʋka, la Wẽnd sɩng n pids-a ne b pãng la b yam.