Read SEBR SÕNGO, 1998 Bʋ-kaoodba 18 Bible Online

Bʋ-kaoodba 18 - SEBR SÕNGO, 1998 bible

Bʋ-kaoodba 18

¹Sasa kãng tɩ Israyɛl nan ka tar dĩm ye. Dẽ t'a Dã roog da baooda zĩig n na n kẽ t'a ra ka paam vẽenem a Israyɛl kamb a taaba sʋk ye.

²Dẽ me la a Dã kamba yiis neb a nu, tãb-biis sẽn tar sũuri. B yiis-b-la Sorea la Estaol tɩ b gilg n bãng tẽnga nenga. B ra yeel-b lame: «Saag-y n gese.» B waa n dʋ Efrayim tãmsã n kẽ a Mika zakẽ n yõg gãag-soabendo.

³B sẽn wa n kolg a Mika yirã, b wʋma Levitga koɛɛga. Dẽ la b waa n sok-a: «Ãnda n tall foom n wa ka? Fo maanda bõe ka? F paoong zema bõe ka?»

⁴A yeel-b lame: «A Mika maan-m-la woto, n paas woto; a yaood-m-la ligdi tɩ m tʋmd maan-kʋʋd tʋʋmde.»

⁵Tɩ b yeel-a: «Sã n ya boto, bɩ f sok Wẽnd n gese sorã d sẽn togdã na n baasa neere.» Levitga leok-b lame:

⁶«Kẽng-y ne laafi tɩ Soaala-Wẽnd meng n yãagd yãmb y sora zugu.»

⁷Neb a nu wã rɩka b sore n tɩ kẽ Layis. B mikame tɩ Layis rãmb da zĩi ne laafi, wala Sidõ rãmba, b ra ka nong zabr ye la b sũur da zãra ne yɩɩre. Nanambg a to ra ka rɩt naam b zug ye la ned ba a ye ra ka kẽed tẽngã n dat n dɩ naam ye. Layis rãmba da zãra ne Sidõ rãmba la b ra ka kẽ ned ba a ye soolmẽ ye.

⁸Neb a nu wã leba b tẽngẽ la Sorea ne Estaol dãmb sok-b lame: «Yãmb tagsdame tɩ bõe?»

⁹Tɩ b leoke: «Yik yã! D tɩ tak zabr ne-ba. D saaga tẽngã la yaa tẽn-sõngo. La yaa bõe tɩ y zĩ sɩɩ n ka leokdẽ? Da kao-y woto n zĩi n wa pa bob ye, n wa pa kẽng n deeg tẽng sẽn ya tẽn-sõng n maan y soolem ye.

¹⁰Y sã n wa kẽ tẽngã y na mik tɩ tẽnga rãmb ka zĩi n yɩɩdẽ ye. Gɩdgr buud kõn gɩdg-y tẽnga kõom ye, tɩ Soaala-Wẽnd dɩk-a lame n sagl y nugẽ. Tẽn-kãng gãe ne kood buud fãa.»

¹¹Woto wã, Dã rãmba yii Sorea la Estaol ne tãb-biis kobs-yoobe sẽn bob b zab-teedo.

¹²B rʋʋ n tɩ wẽ-la b sik Kiriyat-Yearim, a Zɩɩda soolmẽ. Yaa rẽ me yĩng la boond zĩ-kãng tɩ Maane-Dã, a Dã sika, n tãag rũnna. A bee Kiriyat-Yearim nin-taoore.

¹³B sẽn dʋ Efrayim tãmsã, b taa a Mika yiri.

¹⁴Neb a nu wã sẽn da zoe n wa tẽngã, Layis tẽngã, yeela b saam-biisã: «Yãmb ka mi tɩ yi-kãnga rãmb tara b wẽn-naande la nin-naands b sẽn waoogde, n paas wẽn-naand a to sẽn bolg ne wanzurfu? Marsã wã bãng-y y sẽn na n maanega.»

¹⁵B teesa a Mika yirã, n kẽ Levitga sẽn da nok zak ningã; b pʋʋsame n sok zaka rãmb keelem.

¹⁶Tao tao tɩ tãb-biis kobs-yoobã gũbga zaka noore.

¹⁷Neb a nu wã, b sẽn da tʋm b rãmb pipi wã, dʋʋ yĩngr doogã n kẽ n dɩk wẽn-naandsã la nin-naandsã la bũmb ning sẽn da bolg ne wanzurfã. Wakat kãng tɩ maan-kʋʋda ra yɛsa rignoorẽ ne tãb-biisa kobs-yoob sẽn bob zabrã.

¹⁸Maan-kʋʋda sẽn yãe tɩ b kẽeda a Milka zakẽ la b loogd ne bõn-sõma wã, soka woto: «Yaa bõe la y maanda?»

¹⁹B leok-a lame: «Sĩndi, pĩ f noore, la tũ tõndo. Foo n na n yɩ tõnd maan-kʋʋda la d ba. Ges bʋg n são: fo sẽn ya nin-yend maan-kʋʋda bɩ f sẽn na n lebg sak a ye tõre, a Israyɛl doog a ye, maan-kʋʋda?»

²⁰Leokra taa maan-kʋʋda yam. A reega wẽn-naandsã la nin-naandsã la a tũu Dã rãmb n looge.

²¹B le rɩka sore n tees Layis. B lʋɩɩsa kom-bõonesa taoore, rũmsã la teedã.

²²Dã rãmba da paam n zãaga ne a Mika yirã la a Mika yagsa tigma taaba n sɩng Dã rãmba pʋgbo.

²³B kelmame, b kaasa a Dã nebã tɩ bãmb me lɛɛg n teedg n gũud-b la b yet a Mika: «Bõe tɩ f rãmb neba woto?»

²⁴A Mika leokame: «Ka yãmb n loogd ne m wẽnd-dãmb m sẽn da pees la m sẽn da rõog m yĩng laa, ka yãmb n loogd ne m maan-kʋʋd la? Y kees-m-la bõe? La y yɩta a wãn n le sokd ma: ‹Bõe n tar foo?› »

²⁵Tɩ Dã rãmb yeele: «D da le wʋm ye, ka rẽ f sẽn lak b rãmb sɩɩga na lɛɛg n yẽeg-f lame n yãk f yõore la b wã f zaka.»

²⁶Dã neba loogame. A Mika sẽn yãe t'a pãng ka ta bãmba a leba a yiri.

²⁷Dɩlla Dã rãmb looga ne a Milka wẽn-naandã la a maan-kʋʋdã. B taa Layis la b kẽe n kooda zãng ne b sʋʋse neb sẽn da zĩ sɩɩ n pa tẽed yeele. B tol n yõoga b tẽnga bugum.

²⁸Ned ba a ye ka wa a sõngr ye t'a ra zãra ne Sidõ la a ra ka lʋɩ ned ba a ye soolmẽ ye. Layis ra bee Bɛt-Reob tãng pennẽ. Dã rãmb le maneg n me-a lame n kẽ.

²⁹B bool-a lame tɩ Dã, b yaab a Israyɛl biig a ye yʋʋre. Tẽnga pipi yʋra la Layis.

³⁰Dã rãmb mee waoogr zĩiga n ning a Mika sẽn kɩt tɩ b maana. A Moyiiz yagenga la a Zersom biig, a Yeonatã, ne a meng kamba n yɩ a Dã maan-kʋʋdba n ta wakat ninga b sẽn tall-b n loog yembdo.

³¹B baoo zĩig n ning a Mika wẽn-naandã la a paa Silo n tãag wẽnd dooga lʋɩɩse.