Read SEBR SÕNGO, 1998 Bʋ-kaoodba 2 Bible Online

Bʋ-kaoodba 2 - SEBR SÕNGO, 1998 bible

Bʋ-kaoodba 2

¹Naaba-Wẽnd malɛk n yi Gilgal n wa Bokim n yeel a Israyɛl: «M yiis-y-la Ezipt n tɩ kẽes-y tẽng ning m sẽn da kãab y yaab rãmba. M da yeelame tɩ m kõn sãam m zooda ne yãmb, abada.

²[4†] Yãmb me ra reegame tɩ y kõn yõg zood ne tẽnga rãmb ye. Y yeelame tɩ y na n wãa b tẽn-kuga zãnga. Y yaool n pa kelg m koɛɛg ye. Ges-y y sẽn maan bũmb ninga!

³Ad-m sẽn leok wakat kãnga: M kõn dig nin-bãmba y taoore ye. Bãmb n na n wa ne yãmb pɛta la b wẽn-naandsa na n yɩɩ bẽdgo, y yĩnga.»

⁴Soaala-Wẽnd Malɛka sẽn gom n sɛ, neba fãa naaga taab n yãbda la b kaasdẽ.

⁵Dẽ la b pʋd zĩ-kãng tɩ Bokim: B kʋʋ maando n sigs Naaba-Wẽnd sũuri.

⁶A Zozuwe sẽega Israyɛl kambã n kɩt tɩ ned kamb fãa tɩ kẽe a tẽngẽ n deeg-a n soog zãnga.

⁷A Israyɛl tũu Soaala-Wẽnd neere n tãag a Zozuwe loogre, n tãag nin-kẽemsa loogre, neb niyns sẽn paam n dɩ Naaba-Wẽnd ne a Israyɛl zooda kaset kãsengã.

⁸A Nun biiga la Naaba-Wẽnd tʋʋm-tʋmd, a Zozuwe, ki-la a yʋʋm koabg la piiga.

⁹[5†] Yaa a sẽn paam a pʋɩɩr zĩig ningã la b mum-a. Yɩɩ Timnat-Eres, a Efrayim tãng zugu, Gaas tãng nug goabga.

¹⁰Sẽn zĩnd-ba a Zozuwe zamaanẽ wã me waa n loogame. Bãmb poore yɩɩ Zamaan sẽn ka paam n bãng Soaala-Wẽnde, n ka paam n bãng b sẽn maan bũmb ning fãa a Israyɛl yĩnga.

¹¹Israyɛl kamb tʋma sẽn pa ta Soaala-Wẽnd yam, n pʋg Baal dãmba.

¹²B basa Soaala-Wẽnde, b yaab rãmb Wẽnd, sẽn sõng-b tɩ b yi Ezipt tẽnga la b pʋga tẽnga rãmb sẽn da waoogd wẽnd niynsã. B wõgemda b taoore la rẽ wã, b beega Soaala-Wẽnd.

¹³B basa Naaba-Wẽnd n na n waoog a Baal, n waoog Astarte rãmba, b wẽn-pogse.

¹⁴Dẽ puuga Soaala-Wẽnd sũuri tɩ b bas a Israyɛl fãadb nusẽ, fãadb sẽn loog ne b laogo. Naaba-Wẽnd koos-b-la ne b bɛɛba sẽn da gũbg-bã. B pa le tõog n yaas b taoor ye.

¹⁵B sã n yi zabr fãa, Soaala-Wẽnd basda bãmbã la b rɩɩ bõne, wa b meng sẽn da togs-b la b ra kãab-ba. A Israyɛl nimbãanega sɩd wa n yɩɩ wʋsgo.

¹⁶Dẽ me la Soaala-Wẽnd kõ a Israyɛl bʋ-kaoodba, [6] taoor dãmba, sẽn fãag-b fãadba nusẽ.

¹⁷B pa kelg b sẽn yãk b rãmb tɩ b ges b yella ye. B tɩ kẽe wẽnd dãmb a taaba, n wõgemd b taoore, n bas sor ning b ba-rãmb sẽn sulg b mens n tũ a soabã. B pa wẽneg b ba-rãmb ye.

¹⁸La Soaala-Wẽnd sã n da lʋɩɩs ned b taoore, b ra paada ne b nedã la a vɩɩma tɛka Soaala-Wẽnd da fãagda a Israyɛl ne a bɛɛba. Bɛɛba sẽn mii n wa sɩbgd-b tɩ b waasdẽ wã, Naaba-Wẽnd zoeta b nimbãanega.

¹⁹Bʋ-kaooda sã n ki b le yikda wẽnem sẽn zʋʋg b ba rãmb rẽnna la yaa wẽn-naands la b ra pʋgda n waoogd-ba, n yĩgimd b taoore. B tʋʋm yooda la b minim wẽnsa pa tol n woog ye.

²⁰Dẽ la Soaala-Wẽnd sũur wa n pʋʋg ne a Israyɛl tɩ b yeele: «Nin-bãmba sãama zoodã m sẽn da yõg ne b yaab rãmba, b pa kelg m koɛɛg ye.

²¹Mam me kõn le sẽeg b taoore, bɛɛb niyns a Zozuwe sẽn loog n ka rig b rãmba ye.»

²²Woto la Soaala-Wẽnd fɛɛs a Israyɛl n ges a sã n na n tũume bɩ a sã n ka na n tũ a yaab rãmb sore.

²³Ad-y yaa rẽ yĩnga la Naaba-Wẽnd kees bɛɛbã. B pa yãg ne b rigb ye, b pa rɩk-b zãnga n sagl a Zozuwe nugẽ ye.