Read SEBR SÕNGO, 1998 Bʋ-kaoodba 21 Bible Online

Bʋ-kaoodba 21 - SEBR SÕNGO, 1998 bible

Bʋ-kaoodba 21

¹Kãabg ning a Israyɛl sẽn da kãab Mispa la woto: «Ned ba a ye kõn dɩk a bi-pugl n kõ a Bẽnzame ye.»

²Woto wã zãma wã waa Betɛl, n zĩnd Soaala-Wẽnd taoore tɩ wĩndig wa kẽ la b tar yãbr la waasgo.

³B ra yetame: «Soaala-Wẽnde, Israyɛl Wẽnde, bõe t'a Israyɛl tak yel-beed a zugu, n zĩ rũnna t'a buuda sak a ye ka le ketẽ?»

⁴Vẽkẽmbeoogo b yika pĩnda n me maan-kugri beenẽ, b kʋʋ yũ-noog maand la laafi kosg maando.

⁵Dẽ poore b yeelame: «Ya buuda sak bʋgo n pa rũnna tigsga n pa wa?» B ra le wẽename tɩ b na n kʋʋ ned ninga sẽn pa na n wa Mispa, Soaala-Wẽnd taoore.

⁶Sɩda a Israyɛl da lɛɛg n yãbda a Bẽnzame n yetẽ: «Rũnna-rũnna, sak a ye n menem Israyɛl tẽn-peelmẽ.

⁷D na n yãee pagb yɛ n kõ sẽn põs-bã? Tõnd ka wẽen ne Wẽnd tɩ d kõn dɩk d kom-pugli n kõ-b bɩ?»

⁸Dɩlla a Israyɛl sokame: «Yaa sak a bõe n ka wa Mispa tigsgã?» Mik segame tɩ Yasbe sẽn be Galaad ned ba a ye ka wa Mispa tigsga ye.

⁹B sɩd sõda taaba la b pa yãe Galaad Yasbe ned ba a ye ye.

¹⁰Dẽ la b tʋm Yasbe tãb-biis tus piig la a yiibu la b kõ-b-la no-kãnga: «Tɩ kẽ-y Galaad Yasbe tẽnga n kʋ Yasbe rapa n paas pagb la kamba.

¹¹Ad-y sẽn na n maan bũmb ninga. Y na n kãaba beedo rapa gilli la pagb niyns fãa sẽn tar-b sɩdba. Y ka na n kʋ bi-pugl sẽn nan pa kul sɩd ye.» B sɩd maana boto.

¹²Pʋg-sɛdba sõor yɩɩ kobs-naase; yaa kom-pugli sẽn nan ka kul sɩdba. B tall-b lame n dig Silo, Kanaã tẽnga.

¹³Dẽ poore b tʋma neb Rimõ tãngẽ tɩ b tɩ gom bas-y-tɩ-sɛ goam ne Bẽnzame rãmba.

¹⁴A Bẽnzame sak n waame. B rɩka Galaad Yasbe pabg nins sẽn da kellã n kõ-ba la pa ta b fãa ye.

¹⁵A Bẽnzame nimbãaneg yõk-b lame tɩ Soaala-Wẽnd da sakame tɩ sak a ye boog Israyɛl buudẽ.

¹⁶Buuda kãsem-dãmb waa n yeelame: «Bõe la d na n maane tɩ sẽn kell-bã paam pagba, a Bẽnzame pagb la sẽn ki zãng la.

¹⁷Bũmb tõe n keesa a Bẽnzame yĩnga, t'a rooga ra menem Israyɛl tẽn-peelmẽ?

¹⁸Tõnd la sẽn ka le tõe n dɩk d kamb n kõ bãmb la!» Israyɛl kamba ra waa n kãaba woto: «Wẽnd na sãam ned ning fãa sẽn na n kõ pag a Bẽnzame neda!»

¹⁹B yeela taaba: «Ade, kibs a ye la b maand yʋʋmd-yʋʋmd fãa, Soaala-Wẽnd yĩng, Silo. Silo bee Betɛl goabga, sor ning sẽn dʋʋd Betɛl n tat Sikɛm, n yaool be Lebona rɩtgo.»

²⁰Ad-b sẽn yeel Bẽnzame kamba: «Kẽe-y bugsuntundã n soonde!

²¹Maan-y gũusgu la y sã n wa yãe Silo kom-pugli tɩ b yit n na n sao, bɩ y yi, y sẽn solgẽ wã. Ned kam fãa yõk a paga n leb Bẽnzame tẽn-peelmẽ.

²²B ba-rãmb bɩ b kẽem-dãmb sã n wa n na n zab ne yã, d na yeel-b woto: ‹Maan-y-b sugri, tɩ zabra wakato, b ka tõog n paam pag bãmb ned kam fãa yĩng ye. Yãmb meng pʋs n ka tõe n kõ-b pagb ne yamleoogo, n ka beeg Naaba-Wẽnd, y wẽenega poor ye.› »

²³A Bẽnzame maana wala b sẽn wilgã, b kẽe saoodba sʋka la ned kam fãa yõka a paga n looge, n lɛɛg n wa b tẽngẽ n le maneg-a n me n kẽ.

²⁴A Israyɛl me sẽegame; ned kam fãa leba a tẽngẽ la a sakẽ.

²⁵ [23†] Wakat kãng tɩ Israyɛl nan ka tar dĩm ye la ned kam fãa ra maanda a sẽn date, a sẽn tẽed tɩ yaa sõmbo.