Read SEBR SÕNGO, 1998 Bʋ-kaoodba 9 Bible Online

Bʋ-kaoodba 9 - SEBR SÕNGO, 1998 bible

Bʋ-kaoodba 9

¹A Yerubaal biig a Abimelɛk waa Sikɛm a yɛs-rãmb sʋka n yeel a ma wã roog rãmba:

²«Gom-y woto ne Sikɛm tẽnsoaben-dãmbã: Bõe n são y yĩnga, a Yerubaal kamb pisopoe sẽn na n dɩt naam y zugu bɩ nin-yend bal sẽn na n ya y soaala? Pʋs n tẽeg-y tɩ maam ne yãmb yaa zɩɩma ye.»

³A Abimelɛk yɛs-rãmba taasa koɛɛga Sikɛm tẽnsoaben-dãmbã la b yam ra kẽ-la a Abimelɛk tɩ b ra yetame: «A yaa tõnd zɩɩm.»

⁴Dẽ la b kõ-a wanzurf wakɩ koeems pisopoe wala b sẽn geend wakɩr to-to a Baal-Berit wẽnd doogẽ. A Abimelɛk rɩka ligdã n na n yao nin-yaals la bi-beese sẽn na n pʋg a poore.

⁵A sẽn leb a ba-yiri, Ofra, a kʋ-la a ba-biis la a kẽem dãmba, bãmb pisopoe. Nin-yend n yaool n põse: yaa a Zotam, nugẽ-biigã sẽn da zoe n soonde.

⁶Sikɛm la Bɛt-Milo rãmb tigma taaba la b kaasa a Abimelɛk wala b naab, Sikɛm tẽnga, tẽn-kugra kʋka tẽngre.

⁷Rẽ waa n lʋɩ-la a Zotam tʋbrẽ, t'a rʋ Garizim tãnga. A zẽka a koɛɛg n tãs neba woto: «Kelg-y-ma, Sikɛm tẽnsoaben-dãmba, tɩ Soaala-Wẽnd me na kelg-y.

⁸Tɩɩsa yika raar a ye n dɩk sore n na n tɩ yug ned ninga sẽn na n dɩ-a naam b zugu. B yeela oliviye: ‹Yɩ tõnd dĩma!›

⁹Oliv tiig leokame: ‹M yɩta wãna n bas m kaama sẽn tar n waoogd wẽnd-dãmb la ninsaalba n tɩ lengd tɩɩsa a taab zugu?›

¹⁰Tɩɩsa lɛɛg n yeela kankanga: ‹Bɩ fo wa yɩ d dĩma!›

¹¹Kankanga leok-b lame: ‹M yɩta a wãna n bas m kamba ne b noosma n tɩ lengd tɩɩs a taab zugu?›

¹²Tɩɩsa bʋʋga bugsuntungu n yeel-a: ‹Bɩ fo wa yɩ d dĩma!›

¹³Bugsuntung yeel-b lame: ‹M maanda a wãna n bas m rãama sẽn noogd wẽnd dãmba la ninsaalb sũuri n kẽng n tɩ lengd tɩɩs a taab zutu?›

¹⁴Tɩɩsa kong n babsa gõaaga n yeel-a: ‹Bɩ fo wa yɩ d rĩma!›

¹⁵Tɩ gõaag leok-ba: ‹Sã n yaa ne yamleoogo la y taagd-m kaam tɩ m yɩɩ y dĩma bɩ y wa soond m maasmẽ. Y ka maan boto me, bugum n na n yi gõ-tuugã la Libã tɩ bɛda na n dɩɩ zãnga!›

¹⁶Dɩlla, m saam-biisi, a Zotam n gomde, sã n yaa ne yamleoogo la pʋ-peelem la yãmb yãk a Abimelɛk, ges-y yãmb sã n ka maan sõm-zɩtem ne a Yerubaal doogo, ges-y y sã n maana ne-a wala a sẽn da tog ne bũmb ninga.

¹⁷La m ba n yaool n zab yãmb yĩnga, a koosa a yõor n na n fãag yãmb Madiã nugẽ,

¹⁸la rũnna yãmb yika zabr ne m ba-roogo, yãmb kooda a kamba la tẽnsoaben-dãmb pisopoe, wakat a ye. La yãmb basa Sikɛm tẽnsoaben-dãmba, n yug wala y dĩma, yem-poak biig, a Abimelɛk, a sẽn yaa y yagenga yĩnga.

¹⁹Sã n yaa ne yamleoogo la pʋ-peelem la y maand dũnna ne a Yerubaal doogo, bɩ a Abimelɛk noog y sũuri la yãmb me yɩɩ a sũ-noogo.

²⁰Dẽ sã n ka be bɩ bugum yi a Abimelɛk nengẽ n dɩ Sikɛm la Bɛt-Milo taoor dãmba, bɩ bugum yi Sikɛm la Bɛt-Millo taoor dãmba nengẽ n dɩ a Abimelɛk!»

²¹A Zotam sẽn gom n sɛ, a zoeeme; a tɩ kẽe Beer; a tɩ kẽe be n paam n zãag ne a saam-biig a Abimelɛk.

²²A Abimelɛk dɩɩ naam yʋʋm a tã a Israyɛl zugu.

²³Wẽnd wa n zablga a Abimelɛk ne Sikɛm tẽnsoaben-dãmbã tɩ bãmb me yik n sɩng a Abimelɛk tõdgre.

²⁴Ade, yell ning sẽn maane ne a Yerubaal kamb pisopoe wã, da togame tɩ b bãng tɩ yaa a Abimelɛk n na n dɩ zɩɩma raagr taale, tɩ yẽnda n kʋ a ba-biisi, la yaa Sikɛm tẽnsoaben-dãmba me, tɩ bãmb n tus-a t'a kʋ a saam-biisi.

²⁵Sikɛm taoor dãmba solga neba tãmsa zutu tɩ b gũusd so-loaadbã n fãad-ba. Waa n lʋɩ-la a Abimelɛk, tʋbrẽ.

²⁶Daar a ye, a Ebɛd biig, a Gaal, ne a yaopa waa Sikɛm la a goama kẽe Sikɛm taoor dãmb sũurẽ.

²⁷B sak n yi b pʋtẽ n tõs b sib biisi, n kõg b rãam, n maan kibsa la b waoog b wẽnde. B rɩɩme, b yũume la b kãaba a Abimelɛk beedo.

²⁸A Ebɛd biig, a Gaal, yeel-b lame: «A Abimelɛk yaa bõe. Sikɛm ka labs ne d wa sulg d zug a Abimelɛk taoore? A yaa bõe? A yaa a Yerubaal biiga la yẽ n kõ a tãnsoab, a Zebul, tẽnga soolem. Da maan-y yel-sõm-zɩtem ne a Amor, tɩ yaa yẽ maasem yĩng la Sikɛm be. Bõe yĩng la d na n sulg d zugu a Abimelɛk taoore?

²⁹Ade, b sã n da rɩkẽ tẽnga gesg n kõ maam, m naan n n tus a Abimelɛk n leb kɛɛnga! M naan n yeel-a: ‹Paas f tãb-biisa sõor la f wa tɩ d seg taaba.› »

³⁰Kombere a Zebul bãnga goam nins a Ebɛd biig, a Gaal, sẽn yiis a noorẽ la a sũur puugame.

³¹A maana zãmbo n tʋm neb tɩ b tɩ yeel a Abimelɛk: «Ad a Ebɛd biig, a Gaal, waa Sikɛm ne a yaopa la b zẽkda tẽnga rãmb zutu tɩ b yi fo poorẽ.

³²Dẽ yĩnga, yi yʋngo, foo ne f nebã n tek n wũund pʋtẽ wã.

³³Yibeoogo, sõor sã n yẽege, f na n yik n tak zabre. A Gaal ne a neba sã n yi n na n seg foo, f na maan ne-a wa f sẽn date.»

³⁴A Abimelɛk yii yʋngo ne a nebã la b waa n soonda Sikɛm noorẽ. A welga a neba sags a naase.

³⁵A Ebɛd biig, a Gaal, sẽn waa n yi n tek n yaas tẽnga noorẽ, a Abimelɛk ne a neba me pusga vugri n yi.

³⁶A Gaal sẽn yãe neba a yeela a Zebul: «Ges-y neb sẽn sigd tãngã.» T'a leok:

³⁷«Ad yaa tãmsa maasem la fo sẽn mamsd ne nebã.» T'a Gaal le yeele: «Ges-y neb sẽn sigd tãnga yũugẽ, tɩ kẽer yit bagba kʋk sẽnẽ.»

³⁸Dẽ la a Zebul yeela: «Yaa bõe la f zelemd da togsda? Ka foo n da sokd t'a Abimelɛk yaa bõe tɩ f zug na n sulg a taoore? Ka fo sẽn da sãbsd b rãmba la f sẽn ne wã? Yi marsã n tak zabr ne ba.»

³⁹A Gaal lʋɩ Sikɛm tẽnsoaben-dãmba taoore n tak zabre ne a Abimelɛk.

⁴⁰A Abimelɛk riga a Gaal t'a wudg, a neba wʋsg kiime, b pa paam n kẽ tẽnga pʋg ye.

⁴¹A Abimelɛk waa n kẽe Aruma la a Gaal diga a Zebul ne a ba-biisã tɩ b ra zĩnd Sikɛm ye.

⁴²Vẽkẽmbeoogo Sikɛm dãmba yii b tẽngẽ tɩ b wa yeel a Abimelɛk tɩ b rabda b pʋtẽ.

⁴³Woto a welga a neba sags a tã n bao zĩig n solg b pʋtẽ. Neba sẽn waa n yita a bʋʋg-b lame n pãb-ba.

⁴⁴A Abimelɛk ne a neba yɛdgame n pag tẽnga noore, tãb-biis a taaba riga Sikɛm dãmba sẽn da sẽeg pʋtẽ wã n kʋ.

⁴⁵Raara tõre a Abimelɛk zaba ne tẽnga pʋgẽ dãmba. Tẽnga lʋɩ-la a nugẽ t'a kood nebã, n wã rotã, n bao yamsem n fẽrg tẽngã.

⁴⁶B sẽn wʋm dẽ, Migdal-Sikɛm tẽnsoaben-dãmba zoeeme n tɩ soond tãng bokẽ, El-Berit wẽnd doog pʋga.

⁴⁷B wilga a Abimelɛk tɩ Migdal-Sikɛm nin-bɛdã tɩ soonda be.

⁴⁸A rʋʋ Salmon tãng zug, yẽ ne a nebã. A reeg-a lare n kɛɛg tɩɩg willi n tʋk-a n palg a bãoko, la a yet a nebã: «Yãmb sẽn yãe tɩ m maan bũmb ningã, maan-y boto tao-tao.»

⁴⁹Ned kam fãa kɛɛga a willi n tʋk n pʋgd a Abimelɛk, b tɩ sam-b-la tãnga boko la b ning-a-la bugum tɩ bokẽ dãmba paa a pʋgẽ. Migdal-Sikɛm neba kii zãnga, pagb la rap na ta tusri.

⁵⁰A Abimelɛk teesa Tebɛk, a sẽn pag tẽnga noya, a tõog-a lame.

⁵¹Do lug-lug a ye n da be tẽnga sʋka tɩ pagba la rapa fãa zoe n tɩ soond be. Tẽnga nin-bɛda me ra bee be. B ra maneg n paga tẽnga noore n yaool dʋ gaosgã.

⁵²A Abimelɛk paam n taa ro-lug-lugã n tak zabre. A sẽn waa n ta ro lug-luga noorã, a kolg n na n ning-a-la bugum

⁵³[12†] Pag a ye lobga a zug ne neer t'a zuga wã.

⁵⁴Tao-tao t'a boola a wed-kɩɩma n yeel-a: «Wõog f sʋʋg n kõs-ma tɩ b ra wa yeele: ‹Yaa pag n kʋ-a.› » Wed-kɩɩma sɩd kõs-a lame n kʋ.

⁵⁵Israyɛl kamb sẽn wʋm a Abimelɛk kũum, b fãa leba b tẽnsẽ.

⁵⁶Wẽng ning a Abimelɛk sẽn maana lɛɛg n lʋɩ-la a zugu. A ra tʋma a ba wẽnga n kʋ a kamb pisopoe.

⁵⁷Yaa boto me la b kɩt tɩ Sikɛm dãmb dɩ b wẽnema taale. A Yerubaal biig, a Zotam, kãab wẽnsa pidsame.