Read SEBR SÕNGO, 1998 3 ZÃ 1 Bible Online

3 ZÃ 1 - SEBR SÕNGO, 1998 bible

3 ZÃ 1

¹ [1†] Yaa maam, nin-kẽema, n pʋsd a Gayus m sẽn nong ne nonglem menga.

²M kotame, m zoa sõngo, tɩ Wẽnd kõ-f laafi zãnga, f yĩng la f sɩɩg laafi.

³Kristneb n wa ka la b kõo f kaseto tɩ f vɩɩma tũuda tɩrga, m gomda a sẽn ka lak ne sõmblem la sɩd sorã, ad-m sũur yɩɩ noog al wʋsgo.

⁴Ade, bũmb ka be n noogd m sũuri n yɩɩd m sẽn wʋmd tɩ m kamba tũuda sɩda sora ye.

⁵M zoa nongre, f sɩd rɩka f meng zãng n kõ kristnebã ba b sã n ya bu-zẽmba.

⁶B fãa pẽga f nonglma Tigenga taoore. Fo me na maan neere n sõng-b ne b so-toaka rɩɩbo wala Wẽnd sẽn date.

⁷Yaa Krista yʋʋr yĩng bala la b rɩk sore n pa sak n deeg bũmb bu-zẽmba nengẽ ye.

⁸D tog n deega neba woto buudu tɩ woto la d naagd-b n tʋm sɩda wilgr tʋʋmde.

⁹M da paam n gʋlsa sebr n kõ Tigengã. La a Diotrefɛs, ned sẽn pid ne tɩtaam la a baood n na n yɩ taoor soaba, pa sak n deeg-d ye.

¹⁰Woto wã, m sã n ta be m na tẽeg a sẽn maan fãa, n paas gom-beed niyns fãa a sẽn yelg tõnd poorẽ. Rẽ pa sek-a ye, t'a zãgs t'a meng kõn deeg saam-biisa sãando, la a gɩdgd sẽn dat-b n deeg-bã, n tol n yiisd-b Tigengu pʋgẽ.

¹¹M bi-nongre, da togs sẽn maand-a wẽng ye, togs sẽn maand-a neere. Sẽn maanda neer bee Wẽnd maasmẽ. Sẽn maanda wẽng ka mi Wẽnd ye.

¹²A Demetriyus poorẽ neba fãa kõta kaset sõngo; Sɩd soaba meng naag n kõta kaseto. Mam meng kõta kaseto la fo mi tɩ m kaset yaa sɩda.

¹³M da rat n togs-f la koees wʋsgo, la m pa tʋlg tɩ yɩ ne ribl bẽesgo, ribl ne gʋlsg sabl ye.

¹⁴M saagdame tɩ m kõn kaoos n yãend-f ye; woto d na paam n sõs ne taaba.

¹⁵Laafi zĩnd ne fo! F zo-rãmba fãa tɩ b pʋʋs-fo; fo me pʋʋs d zo-rãmbã n kõ-do; pʋʋs-ba a yeyn-ye, ned kam fãa ne a yʋʋre.