Read SEBR SÕNGO, 1998 Rut 4 Bible Online

Rut 4 - SEBR SÕNGO, 1998 bible

Rut 4

¹A Booz tɩ zĩnda noor ninga tẽnga rãmb sẽn kaood b bʋʋdã la a waa n yãee raoa a ye sẽn tõe n welg a roagda a Elimelɛk raboogo, la a bool-a lame n yeel-a: «Zagla, yaas ka! Wa zĩnd ka bilfu!» A waa n zĩndame.

²A Booz tũusa tẽnga nin-kẽems piiga n yeel bãmb me tɩ b zĩnd la b zĩndame.

³A yaool n yeela a roagdã: «Ad-a Nowemi, pag ninga sẽn da kẽeda Moab tẽnga lɛɛg n waame la a rat n koosa d kẽem a Elimelɛk pʋʋgã bogre.

⁴Dẽ la m tʋlg n wilg-fu, tɩ f bãnge, la m yet tɩ f ra pʋʋgã tɩ tẽnga rãmb la tẽnga nin-kẽemba yɩ d kaseto. F rat n yaoo pʋʋga bɩ f yao, f pa rat bɩ f wilg-ma. Foo n so koɛɛga pipi tɩ sã n ya rogmẽ wã foo n pẽ n yɩɩd maam.» La raoã yeelame t'a na n daa pʋʋgã.

⁵T'a Booz na n paase: «Bãng tɩ f sẽn deeg pʋʋga raare, baraar me f reegda a Rut, Moab biigã, a Nowemi bi-pagã, n tong a Elimelɛk rogem yũuga, a Elimelɛk meng soolmẽ.»

⁶Raoã leokame: «Sã n ya boto m pa tõe n da pʋʋga ye tɩ m na n bõna m menga. Bɩ fo ra pʋʋgã tɩ mam ka tõe ye.»

⁷Yaool n da yaa Israyɛl rãmb dog-n-miki tɩ f sã n da bũmbu, bɩ f sã n tek bũmbu n dat n pids kaseto, bɩ f yãk f neodr n kɩse. Yaa boto la Israyɛl kamba da pidsd b kaseto.

⁸[4†] Daoã yeela a Booz: «Fo ra pʋʋgã!» A sẽn yeele a pidga a neodr n kɩs kaset yĩnga.

⁹A Booz yeela nin-kẽemsã la tẽnga rãmba: «Ya y fãa taoore la m deegd a Nowemi nugẽ, a Elimelɛk, ne a kamba a Kilyõ la a Malõ sẽn da so fãa.

¹⁰[5†] Yaa y nifẽ la m deegd a Rut, Moab biiga, a Malõ pʋg-kõorã, n na n tong m kẽema rogem yũuga, a meng soolmẽ t'a yʋʋr da menem a buudẽ la a tẽngẽ ye. Dẽ fãa yaa y nifẽ.»

¹¹[6†] Sẽn da zĩ-b tẽnga bʋʋd sẽn kaood noor ningã, fãa yeelame: «Yaa d nifẽ.» La b paasame: «Bɩ Wẽnd kɩt tɩ pag ning f sẽn na n peegã wẽneg a Rasɛl ne a Lea. Tɩ bãmb b yiib n mee Israyɛl doogo. Wẽnd na kɩt tɩ f kɩ yẽgen Efrata, Wẽnd na kɩt tɩ f yʋʋr yi Bɛtelyɛɛm!

¹²[7†] Wẽnd na yalg f buudu ne pʋg kãngã, tɩ f buuda wẽneg a Perɛs buudu, a Zɩɩda ne a Tamar biigã buudu!»

¹³A Booz peega a Rut n maan a paga. B sẽn bãng taaba, Wẽnd sõngame t'a Rut rɩk pʋga n dog biiga.

¹⁴Tɩ pagb naag taab n yeel a Nowemi: «Wẽnd paam barka b sẽn sõng tɩ roagd kees sẽn na n tong a Elimelɛk rogem yũug a Israyɛl tẽn-peelmẽ.

¹⁵Biiga na le pids f vɩɩma ne sũ-noogo la a na bʋk f sũur f kʋʋlem pʋgẽ. F bi-paga sẽn nong-fa roga biig n kõ-fo la f nanda pʋg kãnga n yɩɩd kamb a yopoe.»

¹⁶A Nowemi reega biigã n sagl a naoẽ. Yẽ n ges a yelle.

¹⁷A Nowemi yagsã kõo biiga yʋʋre. B yeelame: «A Nowemi paama biiga!» B pʋd-a-la Obɛd. A Obɛd n dog a Zese, [8] a Zese n dog a Daviid.

¹⁸A Perɛk kamb la woto: A Perɛk n dog a Esrõ.

¹⁹A Esrõ n dog a Ram, a Ram n dog a Aminadab.

²⁰A Aminadab n dog a Nasõ, t'a Nasõ dog a Salma.

²¹A Salma n dog a Booz t'a Booz dog a Obɛd.

²²A Obɛd n dog a Zese la a Zese n dog a Daviid.