Read SEBR SÕNGO, 1998 1SAMWƐL 1 Bible Online

1SAMWƐL 1 - SEBR SÕNGO, 1998 bible

1SAMWƐL 1

¹Ned n da be Rama, Efrayim tãnga zugu, n boond t'a Elkana. Da yaa a Yeroam biiga, t'a Yeroam yaa a Eliyu biiga, t'a Eliyu yaa a Towu biiga, a Suf biiga, a Efrayim tẽn-peelmẽ.

²A Elkana da tara pagba a yi: a yembr yʋʋr la a An, a yembr yʋʋr a Penina. A Penina da tara kamba, la a An yẽ da pa tar biig ye.

³Yʋʋmd fãa, daoã da yita a tẽngẽ, n kẽnd Silo n waoogd Tãnsoaba-Wẽnde la a kʋʋd-b maoongo. A Eli kamba a yiibã n da be be, n tʋmd maan-kʋʋr tʋʋmde. Yaa a Ofni la a Pinas.

⁴Daar ning a Elkana sẽn kʋ a maoongã, a yãka pʋɩɩre n kõ a paga a Penina, ne a kom-dibli la a kom-pugli wa a sẽn yib n maandẽ.

⁵A Elkana ra nonga a pag a An n yɩɩda, ne Soaala sẽn da mong-a rogma, woto a pʋɩɩra yɩɩ waoor pʋɩɩre.

⁶A An pʋg-to wã ra zabda pʋg-taar ne-a, la a paoogd-a, Wẽnd sẽn da mong a rogma yĩnga.

⁷La yʋʋmd fãa a Penina da maanda boto, a sã n wa Soaala-Wẽnd waoogr zĩigẽ fãa, dẽnd a maan bũmb n yik a An sũuri. Dẽ la a An wa n yik yʋʋmd a ye n tar yãbr la a zãgsd rɩɩbo.

⁸A sɩda, a Elkana, yeel-a lame: «Yaa bõe yĩnga la fo yãbda, n zãgsd rɩɩbo, la f sãamd f sũuri? Mam ka be yõod f yĩnga, n yɩɩd kamb piig bɩ?»

⁹B sẽn dɩ la b yũ n sɛ, a An tɩ yalsa Silo pʋʋsga rooga noorẽ. Maan-kʋʋd a Eli da zao a goeel zugu, rignoorẽ be.

¹⁰A An sũur da sãama al wʋsgo; la a ra pʋʋsdame, la a kiigd nintãm. A pʋʋsa Soaala-Wẽnd woto:

¹¹[1†] «Israyɛl Wẽnnaam, ges-y y yem-poaka sũ-sãangã, da yĩm-y m yell ye, zoe-y m nimbãanega, kõ-y-m bi-ribla, mam na rɩk-a n kõ yãmba, a vɩɩm zãnga, la barg kõn tol n põng a zug ye.»

¹²A An kaoosame n tar pʋʋsgo. A Eli maaga a meng n get paga noore.

¹³A An da gomda ne a menga. A no-gãndã n da yaagde la a koɛɛga ra pa yit ye. A Eli tagsame t'a tɩga rãam.

¹⁴Rẽ la a sok-a: «Rãama na n yɩlma f nengã n ta wakat bʋgo? Bɩ f tɩ gãand tɩ f rãamã yi wɛ!»

¹⁵A An leok-a lame: «Ka boto ye, m naaba, m ka no-koeem ned ye, mam ka yũ rãam bɩ toose sẽn tõe n lub ned ye; mam sũura koees la m da zukd Wẽnd taoore, n wilgd m sũ-sãanga.

¹⁶Bɩ y ra tẽ tɩ yãmb yem-poakã yaa pʋg-yaalg ye; yaa sũ-sãanga la toog n wʋm maam, n kɩt tɩ m yõk goama n ta marsã.»

¹⁷T'a Eli na n leok-a: «Kẽng ne laafi! La Israyɛl Wẽnnaam reeg kosg ninga fo sẽn kos bãmbã!»

¹⁸T'a An yeele: «La Wẽnd na kɩt tɩ m paam bark yãmb nifẽ!» Paga kulame. A rɩɩme, la a neng pa le gãnem wa pĩnd ye.

¹⁹Zaka rãmb yika yibeoogo pĩnda, la b sẽn wõgemd n pʋʋs Soaala-Wẽnd n sɛ, b leba b yiri, Rama.

²⁰Dẽ loogr poore, a Elkana bãnga a paga, tɩ Naaba-Wẽnd me tẽeg a An yelle. Yʋʋmda pʋgẽ, a An dɩka pʋga, n wa rog bi-ribla, n pʋd a yʋʋr t'a Samwɛl, tɩ yaa Soaala la a ra kos-a.

²¹A sɩda, a Elkana tʋlgẽ lame n le kẽne, ne a zak rãmba fãa, n tɩ kʋ yʋʋmd-yʋʋmd maoong, la a pids a pʋlengo.

²²A An barsame n pa kẽng ye, a yeela a sɩdã: «Biiga sã n wa sigi, m na tall-a n kẽng n tɩ wilg-a Wẽnde, t'a kell n pa b roogẽ daar fãa.»

²³A sɩda, a Elkana, yeel-a lame: «Maan wa f sẽn dat, gũ f biiga sigbu. Soaala-Wẽnd ye n sak bala n pids b kãabgo!» La paga paame: a yẽsma a biiga al t'a wa sigi.

²⁴A sẽn sik a biigã, a tall-a lame n kẽng Silo, la a yãka yʋʋm a tã naafo la zom peoogo, la rãam ne ko-waooga. A talla a biigã n kẽng Wẽnd waoogra zĩigẽ, Silo: la biiga paa be n tʋmnẽ

²⁵B kʋʋ loalgã, la b talla biigã n tɩ kɩs a Eli.

²⁶A An yeelame: «M naaba, y kabre! Sɩd ne sɩda, wala yãmb meng sẽn vɩ wã, ad-y yaa maam la pag ninga sẽn yalsa yãmb sɛɛgẽ ka n da pʋʋsd Naaba-Wẽndã.

²⁷Yaa bi-kãnga yĩnga, la m da pʋʋsda, la Soaala-Wẽnd reega kosgo ninga mam sẽn kos bãmbã.

²⁸Dẽ n so tɩ mam dɩkd-a n kõtẽ; a vɩɩm zãnga, a na yɩɩ Wẽnd soolem.» B fãa wõgemda Soaala taoore.