Read SEBR SÕNGO, 1998 1SAMWƐL 10 Bible Online

1SAMWƐL 10 - SEBR SÕNGO, 1998 bible

1SAMWƐL 10

¹A Samwɛl rɩka kaam tʋko, n pʋdg a Sol zugu, n mobg-a, n yeele: «Ka Naaba-Wẽnd n taag foom ne naam kaam, tɩ f yɩ a Israyɛl naab bɩ? Yaa foo n na n fãag Soaala pʋɩɩrã a bɛɛba sẽn gũbg-a wã nusẽ.

²Dũnna, fo sã n bas maam n looge, fo na n sega dapa a yiibu, a Rasɛl yaooga sɛɛga, a Bẽnzame soolma toaagẽ, b na n yeel-f lame: ‹Bõeensã fo sẽn da kẽnge n na n tɩ bao wã, yãeeme la ade, marsã, f ba ka le tagsd bõeensã yell ye, b bʋʋda fo poorẽ n yetẽ: m biiga yelle na n yɩɩ wãna?›

³Fo na n yii be, n yõsg n ta taoore, Tabor tɩɩg ning sẽn wẽnd kʋka tẽngre, bee, fo na n sega dapa a tã sẽn dabd Betɛl, n na n tɩ pʋʋs Wẽnd, t'a yembre tʋk bulli a tã, a yembre bur a tã, a yembr rãam ne ko-waooga.

⁴B na n soka foom f keelem, n yãk bur a yiib n kõ-fo, tɩ fo reeg-ba f nusẽ.

⁵F sã n yõsg be, f na n taa Wẽnd tãnga, Filisti rãmba sẽn ning b toaaga kugra zĩig ningã. Tẽnga pʋgẽ fo na n sega bãngdba sẽn yit maoonga zĩigẽ n watẽ, tɩ neb lʋɩ b taoore ne kʋnde la gãngãoog, la wɩɩs la pɛndga, tɩ bãmb meng wɩlemd bãngr goama.

⁶Wẽnd Pãng na n siga f zugu, tɩ fo lagem bãmba, n wɩlem bãngr goama la fo na n teemame, n paam zʋg a to.

⁷Fo sã wa yãe tɩ makr kãens fãa taasame, bɩ f maan f sẽn tog n maan bũmb ningã, tɩ Soaala-Wẽnd bee ne foom. Dẽ poore fo na n denga maam n kẽng Gilgal,

⁸la ade mam na n wa bʋʋga foom, n kʋ bark pʋʋsg la yũ-nood maando. Fo na n yalsa dasma a yopoe tɩ m yaool n wa f nengẽ n wilg-f f sẽn tog n maan bũmb ninga.»

⁹A Sol sẽn wẽnemd bala, t'a na n loog n bas a Samwɛl, Soaala-Wẽnd kõ-a-la zʋg a to. Yɛla fãa pidsa badaare.

¹⁰A Sol sẽn ta Gibea, la bãngdb kʋʋngo sẽn sũ taaba n wa seg-a; la Naaba-Wẽnd pãng sig-a lame, a yama fʋsga a yĩngã t'a sɩng bãngr goam wɩlengo, bãmb sʋka.

¹¹Sẽn da mi-b yẽnda al daar zãrã sẽn mik t'a bee bãngdb sʋka n gomd bãngr goama, ra yetame: «Yaa bõe n paam a Kis biigã? A Sol me lebga bãngd laa?»

¹²[11†] Ned a ye n zĩnd be n sãbse: «Bãmba tara ba meng bɩ?» Yaa rẽ me tɛk la neba sɩng n wẽed baobg n sogsd taaba: «A Sol me lebga bãngd laa?»

¹³A sẽn wa n paam t'a yama leb a yĩnsẽ, a Sol kẽnga maoonga zĩigẽ.

¹⁴A ba-bila soka yẽnda ne a sõgna: «Yãmb da kẽnga ye?» Tɩ b leoke: «D ra kẽnga bõeens baoobo. Tõnd ka yãe bũmb ye, yaa rẽ la d kẽng a Samwɛl nengẽ.»

¹⁵A Sol ba-bila yeel-a lame: «Togs maam a Samwɛl sẽn yeel yãmb bũmb ninga.»

¹⁶A Sol leoka a ba-bilã: «A wilga tõnd bala tɩ bõeensã yãeeme.» A pa saag n togs a Samwɛl sẽn yeel bũmb ning naama poorẽ ye.

¹⁷A Samwɛl boola neba fãa tɩ b tigim taaba, Mispa, la a yeela Israyɛl kambã:

¹⁸«A Israyɛl Wẽnnaama koɛɛga: ‹Maam n yiis yãmb Ezipt tẽnga, n fãag yãmb Ezipt rãmb nusẽ, la dĩm dãmb fãa sẽn da wẽoogd yãmba nusẽ.›

¹⁹La rũnna yãmb zãgsda y Wẽnnaama, sẽn yols yãmb ne bãas buud fãa, la namsgã buud fãa, la yãmb yet-b lame: ‹Ning dĩm d sʋka.› Marsã, wa-y Soaala-Wẽnd taoor ka, roogo fãa ne a neba, sak fãa ne a neba.»

²⁰A Samwɛl kɩtame t'a Israyɛl sagsa kolge, la a sẽn sok Soaala-Wẽnde, b teesa a Bẽnzame saka.

²¹A Samwɛl kɩtame t'a Bẽnzame sak kolge, yir woo yiri, la yaa a Matri yiri la b tees yã. Dẽ poore, yaa a Kis biiga a Sol la b yãk yã. B bao-a lame, la b pa yãend-a ye.

²²Tɩ b le sok Soaala-Wẽnde: «Ned a to waa ka bɩ?» Tɩ Soaala-Wẽnd leoke: «Ad-a Sol, a soonda teeda zĩigẽ!»

²³Tɩ b zoe n tɩ yiis-a be, t'a wa yals neba sʋka. A ra yɩɩda bãmb fãa ne zug woglem. Sẽn da taa a bãok ka ye.

²⁴A Samwɛl yeela neba fãa: «Yãmb yãee Naaba-Wẽnd sẽn tũus a soaba bɩ? Nebã fãa sʋka, a ka tar a to ye.» La neba fãa zẽka b koɛɛg n kaase n yetẽ: «Wẽnd na wogl dĩma yõore!»

²⁵A Samwɛl wilga neba, naama dɩɩb sẽn na n yɩ a soaba; la a gʋlsa rẽnda sebr a ye pʋgẽ n tɩ rɩgl Naaba-Wẽnd taoore.

²⁶A Sol me kula a yiri Gibea: la gãndaado, Wẽnnaam sẽn segl b rãmb sũya, yãag-a lame.

²⁷La nin-yaals me yaool n zĩnda be n yeele: «Bõe? Yão n na n fãag tõnd bɩ?» La b paoog-a lame: b ka wa ne b kũun n pʋʋs-a ye, la a Sol maana wala pa zab-a ye.