Read SEBR SÕNGO, 1998 1SAMWƐL 13 Bible Online

1SAMWƐL 13 - SEBR SÕNGO, 1998 bible

1SAMWƐL 13

¹A Sol wa n lebga dĩm n sɩng a naam dɩɩb Israyɛl kamb zugu; a naama yʋʋmd a yiib soaba,

²a tũusa tãb-biis tus a tã, Israyɛl neba sʋka: tus a yiibu n da be ne-a, Mikmas tẽnga la Betɛl tãng zugu; neb tusri n da be ne a Zonatã, Gibea tẽnga, Bẽnzame soolmẽ. A Sol basa sẽn ketã, tɩ ned kam fãa leb a yiri.

³Daar a ye, a Zonatã luba Filisti rãmba sẽn da ning komber ning Gibea wã. Neba waa n bãnga yellã. A Sol kɩtame tɩ b peeb bargo a soolma fãa pʋgẽ, n yet tɩ b sõng tɩ tẽnga kẽedba, Ebre rãmba fãa wʋm a bʋʋrã.

⁴Sɩda, kibarã taa Israyɛl gilli. B bãngame t'a Sol kʋʋ Filisti rãmb kombere, tɩ b yik n maand beem ne a Israyɛl. Woto wã neba fãa sũ taaba a Sol poorẽ, Gilgal tẽnga.

⁵Filisti rãmba me sũu taaba n na n tak zab ne a Israyɛl. B da tara bilim-bilm tus pis-tã, [18] wed-dʋʋdb tus a yoobe; tãb-biisa sõor da zema mogra noor bĩisri. B waa n siga Mikmas, Bɛt-Aven yaanga.

⁶A Israyɛl mikame tɩ na n yɩɩ yell ne-a. Bɛɛba da rɩdgda wʋsgo tɩ b zoe n tɩ soond tãmsẽ, bogdẽ, pĩisẽ, gasd pʋgẽ solgr zĩisẽ la ko-bao pʋsẽ.

⁷Neb kẽer me rʋʋga Zʋrdẽ kʋɩlgã n kẽng Gad la Galaad soolmẽ. A Sol da ket n bee Gilgal, la neba fãa sẽn da be ne-a wã da rigdame.

⁸[19†] A gũu rasma a yopoe, n zems a Samwɛl sẽn bas-a daarã; a Samwɛl ka wa Gilgal ye tɩ neba fãa sẽeg n basd a Sol.

⁹T'a Sol yeele: «Wa-y ne yũ-noog maoongã la maan-dɩtgã.» A kʋʋ maandã.

¹⁰A Sol sẽn kʋ yũ-noog maoongo n sɛ, la a Samwɛl sẽn wẽneg n wa. A Sol yi n seg-a lame n na n pʋʋs-a.

¹¹A Samwɛl sokame: «Fo maana bõe?» A Sol leokame: «Mam sẽn wa n yãe tɩ neba sẽegdame, n basd maama, tɩ yãmb me pa watã, tɩ wakata yaool n loogã, tɩ Filisti rãmba me sũ taab Mikmasã,

¹²mam yeelame: ‹Filisti rãmba na n wa paam-m-la Gilgal tɩ m nan pa sigs Naaba-Wẽnd sũur ye.› Wakat kãng la mam me keng m pelga, n kʋ maoongo.»

¹³A Samwɛl yeela a Sol: «Fo maana gãeemdo! Fo ka tũ Soaala-Wẽnnaam, sẽn da kõ-f noor ninga ye. Soaala-Wẽnd da na n paasa f naam pãng tɩ f soogẽ Israyɛl daar fãa.

¹⁴[20†] Marsã, f kõn kaoos f naama zaoorẽ ye. Naaba-Wẽnd bao-la b sũur neda, n tũus-a, t'a na n yɩ b buuda naaba, tɩ Soaala-Wẽnd kõo foo noore, la fo ka reeg ye.»

¹⁵La a Samwɛl yika Gilgal n kẽng Gibea, a Bẽnzame soolmẽ. A Sol sõda neba sẽn kell ne-a wã: neb kobs-yoobe.

¹⁶A Sol ne a biiga Zonatã la a neba da bee Gibea, a Bẽnzame soolmẽ, tɩ Filisti rãmba ra be Mikmas.

¹⁷Daar a ye, tãb-biis sẽn pid ne raoodo, yii Filisti rãmba sikẽ n welg sags a tãabo. Sak a ye rɩka Ofra sore, Sual tẽnga.

¹⁸A yiib soaba rɩka Bɛt-Orõ sore, t'a tãab soaba tũud tãng ning sẽn luga Kata bãooga noorẽ, sẽn dabd zĩ pɛɛlẽ.

¹⁹Sẽeb da ka le ket Israyɛl tẽn-tõra ye, tɩ Filisti rãmba ra kõ b meng yam n yeele: «D tog n maoome tɩ Israyɛl kamba ra tõog n kud sʋʋs la kãn ye.»

²⁰Woto Israyɛl neba gilli ra kẽnda Filisti rãmba nengẽ, n na n saas wãka, lare, kutoaaga bɩ kãnde.

²¹F wata ne wakɩ koeems a yiibu f sã n dat saas wãgs a tã, bɩ kutoos a tã, bɩ kõs a tã, bɩ lay a tã, bɩ pɛɛm niyns sẽn tar n tikd nag-koodsã a tãabo.

²²Woto wã Mikmas zabra daar taame, tɩ tãb-biisa fãa sẽn da be-b ne a Sol la a Zonatã ra pa tar sʋʋga bɩ kãnd ye. A Sol ne a biiga Zonatã bala la b da paam n kõ.

²³Filisti rãmba tãb-biis sull a ye wa n yiime n tees Mikmas.