Read SEBR SÕNGO, 1998 1SAMWƐL 15 Bible Online

1SAMWƐL 15 - SEBR SÕNGO, 1998 bible

1SAMWƐL 15

¹ [23†] Wẽnd kãnga, a Samwɛl yeela a Sol: «Yaa maam la Naaba-Wẽnd tʋm yã tɩ m wa pʋdg f zugu naam kaam, tɩ f yɩ b buud a Israyɛl dĩma, kelg Soaala-Wẽnd sẽn yet bũmb ning marsã.

²[24†] Ad Soaala sẽn gomde, a Israyɛl tãb-biisa Wẽnd sẽn yete: ‹Mam na n soka a Amalɛk sẽn sɩng tɩ bũmb ninga t'a gɩdg a Israyɛl sore a sẽn waa n yi Ezipt tẽnga n wat ka.

³Marsã, bɩ f kẽng n tɩ tak zabr ne a Amalɛk. F tog n wẽename tɩ f kõn deeg a bũmb ba a ye n soog ye. Da bas-a ye! F na n kʋʋ fãa, pagba, rapa, kom-peels la kom-kɩdse, niis la la piisi, yʋgma la bõeense.› »

⁴A Sol boola neba fãa, n sõd-b Telɛm tẽnga. Tãb-biisa yɩɩ tus bobs-yi. A Zɩɩda neba yɩɩ tus piiga.

⁵A Sol sẽn ta Amalɛk rãmb tẽngẽ, a soos n gãnega tãpo kʋɩl bɛɛg noorẽ.

⁶A yeela Kenitsã: «Bɩ y loog n yi a Amalɛk sʋka, bɩ y serg n bas-a, tɩ m da wa lagem yãmb ne bãmb n sãam ye, tɩ yãmb maana a Israyɛl kamb fãa neere, b sẽn wa n yit Ezipt n watẽ.» La Kenitsa serg n basa a Amalɛk.

⁷A Sol zaba ne a Amalɛk, sẽn sɩng Avila, n tãag Sur sẽn tot ne Ezipt, yaanga.

⁸B yõka Amalesitsa dĩma, a Agag, vɩɩga. B kãabame tɩ ned ba a ye kõn põs ye la b kood-b la fãa ne sʋʋse.

⁹A Sol ne a neba yaool n basa vɩɩse a Agag, n paas rũms niyns sẽn ya-b sõma, bɛd la bõonese, yʋʋmd yɛng pe-bi. B pa sak tɩ kãab beeda rɩ bãmb ye. Yɩɩ sẽn ka sõmb la sẽn ka yõodã bala la b yõog bugum.

¹⁰Wẽnd kãnga Naaba-Wẽnd goma ne a Samwɛl, b yeel-a lame:

¹¹«M sẽn kɩt t'a Sol lebg dĩma ka le noom maam ye, t'a wẽnemdame n bas maam, la a pa sakd n deeg m noor ye.» A Samwɛl sũura sãama ali t'a yãbe ne Soaala-Wẽnd, yʋng kãnga.

¹²A Samwɛl sãda beoogo n na n tɩ seg a Sol. La b waa n yeel-a lame: «A Sol sẽn ta Karmɛl, a maana yʋ-baoore, n me bũmb be, la a sãag n diga taoore, a taa Gilgal.»

¹³A Samwɛl babsa a Sol. La a sẽn ta a nengẽ, a Sol yeel-a lame: «Wẽnd sudg y zug barka! M sakame n deeg Soaala gomde.»

¹⁴A Samwɛl wẽneg n sok-a lame: «La yaa bõe rũmsi, wa piis la niis, n tar yãbre tɩ lʋɩt m tʋbrẽ?»

¹⁵A Sol yeelame: «B tall-b-la Amalɛk rãmba tẽngẽ n wa ka, tɩ neba keesa pe-sõma wã la nag-sõma wã n na n kʋ maoongo n kõ Soaala, fo Wẽnnaama; sẽn keta fãa, tõnd kʋ-b lame.»

¹⁶Dẽ la a Samwɛl yeel a Sol: «Yals ka tɩ m togs-f Naaba-Wẽnd sẽn yeel-m bũmb ninga yʋngẽ.» T'a Sol yeele: «Bɩ y togse!»

¹⁷A Samwɛl yeelame: «Fo sẽn dag n ya wa zaalem f meng nifẽ, fo ka lebg a Israyɛl sagsã naab bɩ? Soaala-Wẽnd ka pʋdg f zug naam kaam, tɩ f yɩ a Israyɛl dĩm bɩ?

¹⁸B tʋma foom, n yeel-fo: ‹Aya! Wẽen tɩ f kõn kees Amalɛk buud ye, zab ne-a n wa menes-a zãnga.›

¹⁹La bõe yĩnga, tɩ fo pa kelg Soaala-Wẽnd koɛɛga? La bõe yĩng tɩ fo kẽng tao-tao n tɩ wʋk te zɛɛdma, n maan yel-wẽnde, Soaala-Wẽnd nifẽ?»

²⁰A Sol leoka a Samwɛl: «Mam yẽ sẽ, m kelga Soaala-Wẽnd koɛɛg neere, mam tũu sor ning Soaala-Wẽnd sẽn wilg maama, m waa ne a Amalɛk dĩma, a Agag; la mam sãama Amalesitsã.

²¹Yaa nebã n yãk te zɛɛdma pʋgẽ, rũm-bɛd la rũm-bõonego, piis la niis, sẽn ya sõmb n yɩɩd-b taaba la sẽn lebg kãab beed bũmbu, n na n tɩ kõ Soaalã, fo Wẽnnaama, Gilgal tẽnga.»

²²A Samwɛl leokame: «Soaala nonga yũ-nood maando, n nong sugr kosg maand wa b sẽn nong b noora deegra bɩ? Ayo! Sakre n são maoongo sulg-m-meng n são pe-raada kaam.

²³Zẽk f meng ne Soaala, wẽen tɩ fo sẽn gãdã, n yɛse dẽ wẽnem yɩɩda kabl Wẽnde, dẽ wẽnem yɩɩda bagr ne a zirẽ-beedã. Fo sẽn zãgs Soaala gomd kelgrã, bãmb me basda foom, f ka le ya rĩm ye.»

²⁴A Sol yeela a Samwɛl: «Mam maana yel-wẽnde! M zãgsa Wẽnd noore la m pa sak fo goam ye; mam zoe neba nifu, n kelg bãmb koɛɛga.

²⁵Marsã, m yõkd y sɛɛga; kõ-y maam m yel-wẽnda sugri, la leb-y n wa-y ne maam tɩ m tɩ wõgemd Soaala-Wẽnd taoore n waoog ba.»

²⁶T'a Samwɛl na n leok a Sol: «Mam kõn leb n tũ-f ye, tɩ fo zãgsa Wẽnd noore, la Soaala-Wẽnd me zãgsa foom, f kõn le yɩ a Israyɛl dĩm ye.»

²⁷A Samwɛl sẽn wẽnemd t'a na n looge, a Sol gãda a fuug noor tɩ kẽege.

²⁸[25†] T'a Samwɛl yeele: «Dũnna Soaala-Wẽnd gʋsga a Israyɛl rĩung f nugẽ; b na n dɩk-a lame n kõ ned a to sẽn ya sõng n yɩɩd foom.»

²⁹A tol n le paasame: «Soaala sẽn ya a Israyɛl pãngã, pa gird n le gõms wa ninsaal ye.»

³⁰A Sol le yeelame: «M maana yel-wẽnde la marsã m kota yãmba, tɩ y ra ning-m yãnde, m nin-kẽembã la a Israyɛl fãa taoore, la y lebg n wa mam nengẽ, tɩ m paam n pʋʋs Soaala-Wẽnnaam.»

³¹A Samwɛl lebg n tũ-a lame, la a Sol tɩ wõgemd n pʋʋsa Naaba-Wẽnde.

³²La a Samwɛl yeelame: «Tall-y Amalesitsa dĩma, a Agag, n wa m taoore.» A Agag kolga ne yẽesem. A ra yeta a sũurẽ: «M tẽed tɩ m kõn le lemb kũum ne a tɩɩsma ye.»

³³Mik a Samwɛl na n yeelame: «Wala fo sʋʋg sẽn kɩt tɩ pagba pa na n le yãend b kamba, woto me pagba sʋka, fo ma kõ le yãend a biig ye!» La a Samwɛl kʋ-la a Agag, Soaala-Wẽnd waoogr zĩigẽ, Gilgal tẽnga.

³⁴Rẽ poore, a Samwɛl leba Rama, t'a Sol me kul a yiri, Gibea.

³⁵Badaar tɛka, n ta a kũum, a Samwɛl pa leb n yãend a Sol ye. A Samwɛl da yãbda a Sol, tɩ b sẽn bas-a t'a rɩ Israyɛl naama ra pa le noom Naaba-Wẽnd ye.