Read SEBR SÕNGO, 1998 1SAMWƐL 17 Bible Online

1SAMWƐL 17 - SEBR SÕNGO, 1998 bible

1SAMWƐL 17

¹Dasem-kãense, Filisti rãmba da tigma b tãb-biisi n na n maan zabre. B sũu taab Soko, a Zɩɩda soolmẽ la b gãnega tãpo, Efes-Damim, Soko la Azeka sʋka.

²A Sol ne a Israyɛl kamb me tigma taaba, bãmb me gãnega tãpo, bãoogẽ, la b tonga taab rũnug-rũnuga n na n zab ne Filisti rãmba.

³Filisti rãmb dag n bee tãng a ye pennẽ; t'a Israyɛl kamba me be tãng a to pennẽ. Bãg-faag n da be sʋka.

⁴Gat dao a ye n yɩ Filisti rãmba tãb-sikã, a yʋʋr da boondame t'a Goliyat. A woglem da yaa kãntɩɩs a yoobe la nug-yakemde.

⁵A da fõgna kut zug-peoogo, n yeelg kut fuug sẽn wẽnd piryãong poore. Fuuga zɩslem taa neb a yiib zɩɩbo.

⁶A ra vila a nao wã ne kut gãmbre, n zãad zũud kãnde.

⁷A kãnd-daooga da yaa wa sʋnd koeer-bõanga; kãnda meng zɩslem taa yubl sẽn pid koom. Ned n da tʋk a gãongã n kẽnd a taoore.

⁸Filisti rao wã yalsame n gom ne a Israyɛl sẽn da tong taab rũnug-rũnugã, zabra yĩngã, a zẽka a koɛɛg n kelme: «Bõe tɩ y na n yi n tong taaba zabre yĩnga? Mam ka Filisti tãb-biig tɩ yãmb yaa a Sol yem-daada bɩ? Tũus-y nin-yend t'a wa zab ne maam.

⁹A sã n tõog n zab ne maam n kʋ-ma, tõnd na lebg yãmb yemse la sã n ya maam n tõoge, n kʋ yãmb nedã, yãmb n na n yɩ tõnd yemse la d tʋʋm-tʋmdba.»

¹⁰Filisti rao wã le yeelame: «Maam n baood a Israyɛl tãb-biisa noor dũnna; kõ-y maam ned a ye, tɩ d zab taab n gese!»

¹¹A Sol ne a Israyɛl kamba fãa wʋma Filisti rao wã goama, la b yɛɛsame, rabeem kãseng yõk-b lame.

¹²A Daviid da yaa Efrata sakẽ daoa, Bɛtelyɛɛm tẽnga, a Zɩɩda tẽn-peelmẽ. A ba wã la a Zese la a Zese kamb yɩɩ bãmb b nii. A Sol wakata t'a Zese da paam n kʋʋlame la a me ra yɩɩ zab-zabda.

¹³A Zese kom-bɛd a tãabã da tũ-la a Sol n kẽng tãpo. Kamba a tãabã sẽn kẽng tãpã yʋy la woto: kãsma, a Eliyab, sẽn pʋgda soaba, a Abinadab, a tãab soaba, a Sama.

¹⁴A Daviid n da ya yao-zʋʋga. Yẽ kẽem-dãmb da tũ-la a Sol, zabrẽ.

¹⁵La a Daviid da kẽnda a Sol nengẽ la a lɛɛgd n wat Bɛtelyɛɛm n kɩɩmd a ba rũmsi.

¹⁶Filisti gãndaoogã da wata yibeoog la zaabr fãa, la a tãoosa raooda woto dasem pis-naase.

¹⁷La a Zese waa n yeela a biiga, a Daviid: «Deeg ki sẽn kɩɩm wamd a ye, la bur piiga, n zoe n kẽng n tɩ kɩs f kẽem dãmba sẽn be tãb-sika pʋga.

¹⁸Deeg bĩs kaam gil piiga n tɩ kõ tãb-biis tusr tãnsoabã. F na sok n bãng f kẽem dãmba sã n tara laafi, la reeg b nengẽ bũmb sẽn kõt kaseto tɩ b keta ne yõore.

¹⁹B bee ne a Sol la a Israyɛl tãb-biisã, tɩ-wogda bãoogẽ wã n zabd ne Filisti rãmbã.»

²⁰A Daviid yika yibeoog pĩnda, n bas a piisã ne rũm-kɩɩma, n tʋk toaalã, n maan wa a ba sẽn yeele. A taa tãb-sikã. Segame tɩ tãb-biis ra yita tãb-sikã n tees zabra sẽn zabdẽ, n kelemd b kɛlenga.

²¹Israyɛl kamba ne Filisti rãmba tedgame n tees taaba.

²²A Daviid sika a sẽn da zɩtã n bas ne sẽn get-b teedã. A zoe n taa zabra zĩigẽ, n pʋʋs a kẽem-dãmbã.

²³A sẽn waa gomd ne bãmba, Gat gãndaoog ning sẽn da boond t'a Goliyatã, le yi n yalsa Filisti rãmba ne a Israyɛl kamba sʋka. A le goma wala a sẽn zoe n gom pɩnda, t'a Daviid wʋme.

²⁴A Israyɛl sẽn yãe neda bala, b fãa zoeeme, tɩ rabeem kãseng yõk-b lame.

²⁵Israyɛl kamba ra yetame: «Way! Yãmb yãee dao wã sẽn wata bɩ? A kolgdame n na n bao a Israyɛl noore. Ned ninga sẽn na n kʋ-a, dĩma na kõ a soab arzɛgs wʋsgo, b na kõ-a a bi-pugla t'a maan a paga, la b na bas a ba ne a zak rãmba yõor yaood la tʋʋma taale.»

²⁶A Daviid soka sẽn da be a sɛɛgẽ wã: «Sẽn kʋʋda Filisti rao kãnga, n dok a Israyɛl yãnde, b na n maana a soab bõe? Filisti kãnga, nin-dẽgdã, yaa ãnna, n wat n tʋʋsd Vɩɩm Naaba-Wẽnde tãb-biisi?»

²⁷Neba le togs-a lame: «Yaa wa d sẽn yeelã la b na n maan ne sẽn na n kʋ-a Filisti rao wã.»

²⁸A kẽema a Eliyab sẽn wʋm t'a Daviid gomd ne nebã, a sũur puuga ne-a, t'a yeele: «F waa ka n na n maan bõe? F basa rũm-bõonesa gũub ne ãnna we-raoogẽ wã? Mam mi-la f ka tõe n zĩnd f zĩ yɛngã la f raab yoodã. F waame bala n na n ges zabrã.»

²⁹A Daviid leokame: «Mam maana bõe, ka m sẽn goma bal laa?»

³⁰A basa yẽnda la a goma ne ned a to, a soka wala pĩnda, la b leok-a la wala b sẽn zoe n leok-a wã.

³¹B sẽn wʋm a Daviid goama, b taas-b la a Sol, la a Sol kɩtame tɩ b bool-a.

³²A Daviid tɩ yeela a Sol: «Bɩ ned ba a ye da bas raood, Filisti rao kãngã yĩng ye! Ad-y mam na n zaba ne-a.»

³³A Sol yeela a Daviid: «Fo pa tõe kẽng n tɩ zab ne Filisti rao kãnga ye, fo yaa yãaga, la Filisti raoã yaa zab-zabda al a yãadmẽ.»

³⁴A Daviid leoka a Sol: «Mam da gũuda m ba rũmsi, m naaba, gɩgemde bɩ rũng sẽn ya toaaga n yɩɩd gɩgemde, sã n da wa n na n yõk rũnga,

³⁵m da wudgdame, n pʋg-a; m da pãbd-a lame; m da gʋsgda rũngã, a noorẽ. A sã n da baood zabre ne mam menga, m da gãta a gɛdã n tar a pãbre t'a wa ki.

³⁶Yaa woto la mam kʋ bõnyẽega la gɩgem-padre. [26] La ade, na n yɩɩ boto me ne Filisti rao kãnga, ne nin-dẽgdã, t'a baoo Vɩɩm Naaba-Wẽnd tãb-biisa noore.»

³⁷A Daviid le yeelame: «Naaba-Wẽnd sẽn fãag maam, tɩ m tɩlg ne gɩgemde la gɩgem-padre, bãmb n na n fãag maam Filisti rao kãnga nugẽ.» A Sol yeela a Daviid: «Kẽnge! La Wẽnd na zĩnd ne-fo!»

³⁸A Sol yeelga a Daviid a meng futu, n fõgneg-a kut zug-peoogo, n sog kut fuugu a yãoogẽ.

³⁹A Daviid boba a Sol sʋʋgã n paas futã, n mak t'a na n kẽnge, n pa tõog ye. A ra zɩ n tʋk zɩɩb a woto ye. Woto a yeela a Sol: «Mam pa na n tõog n kẽne ne woto fãa tɩ m ka minim ye.» A piida rẽ fãa n dʋʋge.

⁴⁰A rɩka a dasaar a nugẽ, n tũus kʋɩlga kug saal a nu n sui a pe-kɩɩm korgẽ, gɩf a ye pʋgẽ; loaabg bala n da paase la a looga woto n na n tɩ zab ne Filisti raoã.

⁴¹Filisti nin-daooga lʋɩɩsa a taoore sõgna sẽn zɩt a gãongã n segd a Daviid.

⁴²A nif sẽn pẽnega a Daviid, a yõka a tʋʋre, t'a yãeeme tɩ nan yaa bi-bilf bala, bi-moomde, n tar neerem.

⁴³Filisti raoã yeela a Daviid: «M yaa baag laa? Tɩ f wat m segbo ne dasaare?» La a kãab-a-la beedo, n bas-a ne a wẽnd dãmba.

⁴⁴A le yeel-a lame: «Zoe n wa, tɩ m dɩk f nemdã n kõ yĩngri luiili la we-rũmsi tɩ b rɩ.»

⁴⁵A Daviid leoka Filisti raoã: «Fo wat n na n zaba ne maam, ne sʋʋga la kãnde la kãnd bila, mam yẽ wat n na mao ne foo, Pãens rãmba Wẽnda yaa m zab-teedo, Israyɛl Wẽnnaam n pids-m ne raoodo, f sẽn sãbs b tãb-biisa yĩnga.

⁴⁶Dũnna menga Naaba-Wẽnd na n dɩka foom n ning m nugẽ; m na n kʋʋ foom, n fiuug f zugu; dũnna, m na n dɩka Filisti rãmba yĩnsi n kõ yĩngr luiili la we-rũmsi. Dũni zãng fãa na bãng t'a Israyɛl Wẽnda la Wẽnd.

⁴⁷La zãma wã na bãnge, tɩ Soaala-Wẽnd ka fãagd ne sʋʋga bɩ ne kãnde, tɩ Wẽnd la Tãnsoaba la b na n dɩka yãmb n ning tõnd nugẽ.»

⁴⁸Filisti rao wã yikame, n yãosdẽ, n wat a Daviid segbo. A Daviid wudgame n tɩ seg Filisti rao wã n na n zab ne-a.

⁴⁹Tao tao bala a Daviid tʋma a nug a korgẽ, n sak kugr a yembre, n lobg-a ne a loaabgã, la a yõka Filisti rao wã dĩiri la kugrã suda Filisti rao wã dĩiri, t'a lʋɩ, t'a neng fõgneg tẽnga.

⁵⁰Yɩɩ woto! Ne loaabga la kugri, a Daviid pãng yɩɩga Filisti rao wã, a lub-a lame, n kʋ-a, t'a nug yaool n pa zãad sʋʋg ye.

⁵¹ [27†] A Daviid wudgame, n tɩ yals Filisti rao wã sɛɛgẽ, n gãd a sʋʋgã n wõog-a a wʋʋgẽ, n kʋ a Goliyat, n fiuug a zugu. Filisti rãmba sẽn yãe tɩ b gãndaoog kiime, b zoeeme.

⁵²La a Israyɛl ne a Zɩɩda rapã zẽka b koees n kelme, n zoet n pʋgd Filisti rãmba bãooga pʋga, n dig ba, n tɩ tãag Ekrõ. Filisti rãmba sẽn paam sãmpogrã rʋʋga sora zugu, sẽn sɩng Saarayim, n tɩ tãag Gat, la Ekrõ.

⁵³Israyɛl kamba sẽn dig Filisti rãmba n zãage, b lɛɛg n wa zɛ b tãb-sikã.

⁵⁴A Daviid rɩka Filisti rao wã zugu, n tɩ bas Zerizalɛɛm, la a bĩnga a zab-teedã a roogẽ.

⁵⁵A Sol sẽn da reng n yãe a Daviid t'a kẽnd n segd Filisti rao wã, a ra soka a Abnɛr, a tãnsoabã: «Bi-bɩɩg kãnga ba yaa ãnda, Abnɛr?» T'a Abnɛr ra leoke: «Ne yãmb sẽn vɩ wã, dĩma, m ka mi ye.»

⁵⁶Dĩma yeelame: «Sok f toore n bãng bi-kãnga ba sẽn yaa a soaba.»

⁵⁷Yɩɩ woto la a Daviid kʋ Filisti raoa n lɛɛg n wa, tãnsoaba Abnɛr peega a Daviid n kẽng dĩma nengẽ. A ra zãada Filisti raoa zug a nugẽ.

⁵⁸A Sol sok-a lame: «M biiga, fo ba la ãnda?» A Daviid leokame: «Mam ba yaa yãmb sõgen a Zese, Bɛtelyɛɛm neda.»